રાજકોટ SOGનો ડુપ્લીકેટ જંતુનાશક દવાઓનો પર્દાફાશ

રાજકોટ જિલ્લા ગ્રામ્ય પોલીસની સ્પેશિયલ ઓપરેશન ગ્રુપ (SOG) ટીમે ખેતીવાડીમાં વપરાતી ડુપ્લીકેટ જંતુનાશક દવાઓ બનાવતા એક મોટા રેકેટનો પર્દાફાશ કર્યો છે. લોધીકા તાલુકાના અલગ-અલગ ત્રણ કારખાનાઓમાં દરોડા પાડીને પોલીસે નામી કંપનીઓના નામે વેચાતી નકલી દવાઓનો જથ્થો ઝડપી પાડ્યો છે.

આ મામલે પોલીસે ચાર મુખ્ય સૂત્રધારોની ધરપકડ કરી કાયદેસરની કાર્યવાહી હાથ ધરી છે.

બ્રાન્ડેડ કંપનીના નામે સ્કેમ

મળતી માહિતી મુજબ, લોધીકા વિસ્તારમાં આવેલી 'શાંતિ કેમિકલ', 'ગ્રીન ભારત કંપની' અને 'એડિકોન કંપની'માં પોલીસ દ્વારા આકસ્મિક તપાસ કરવામાં આવી હતી. આ કંપનીઓ પાસે 60 જેટલી દવાઓના ઉત્પાદન માટેના કાયદેસરના લાયસન્સ હતા, પરંતુ તેની આડમાં તેઓ 'યુનાઇટેડ ફોસ્ફરસ લિમિટેડ' (UPL) જેવી ખ્યાતનામ કંપનીઓના ઓરિજનલ માર્કા અને પેકેજિંગનો ઉપયોગ કરીને ડુપ્લીકેટ જંતુનાશક દવાઓ બનાવી રહ્યા હતા. ખેડૂતોને ઓરિજનલ દવાના ભાવે આ નકલી માલ પધરાવીને મોટું આર્થિક નુકસાન પહોંચાડવામાં આવતું હતું.

પોલીસે આ ત્રણેય સ્થળોએથી નકલી દવાઓ, ખાલી બોટલો, સ્ટીકરો અને પેકેજિંગ મશીનરી સહિત કુલ ₹25.07 લાખનો મુદ્દામાલ કબ્જે કર્યો છે. પોલીસ તપાસમાં બહાર આવ્યું છે કે, પકડાયેલા આરોપીઓ પૈકી સાહિલ ટીબડીયા વિરુદ્ધ અગાઉ પણ શાપર વેરાવળ પોલીસ સ્ટેશનમાં કોપીરાઈટ એક્ટ હેઠળ ગુનો નોંધાઈ ચૂક્યો છે. તે રીઢો ગુનેગાર હોવાનું સામે આવ્યું છે.

આરોપીઓના નામનો ખુલાસો

SOG ટીમે આ ઓપરેશનમાં નીચે મુજબના આરોપીઓની ધરપકડ કરી છે:

1. ધ્રુવ પટોડિયા

2. ધવલ કોરાટ

3. સાહિલ ટીબડિયા

4. કશ્યપ આકોલિયા

જંતુનાશક દવાઓ ખેતી માટે અત્યંત મહત્વની હોય છે, પરંતુ ડુપ્લીકેટ દવાઓને કારણે પાકને નુકસાન થવાની સાથે ખેડૂતોની મહેનત પર પાણી ફરી વળે છે. રાજકોટ જિલ્લા પોલીસે આ મામલે કડક વલણ અપનાવતા અન્ય કયા કયા સ્થળોએ આ નકલી દવાઓ સપ્લાય કરવામાં આવી છે તે દિશામાં તપાસ તેજ કરી છે. આરોપીઓને કોર્ટમાં રજૂ કરી રિમાન્ડ મેળવવાની તજવીજ પણ હાથ ધરાઈ છે.