રાજ્યમાં આજે પણ વરસાદી માહોલ યથાવત, 10 જૂન આસપાસ ગુજરાતમાં પ્રવેશી શકે છે ચોમાસું

રાજ્યમાં ચોમાસુ હજુ બેસ્યું નથી છતાં અનેક વિસ્તારોમાં વરસાદી માહોલ સર્જાયો છે. હવામાન ખાતાના અનુમાન પ્રમાણે, આજે રાજ્યના 13 જેટલા જિલ્લામાં હળવાથી લઈને સામાન્ય વરસાદ પડી શકે છે. બનાસકાંઠા, પાટણ, મહેસાણા, સાબરકાંઠા સહિત ગાંધીનગર, અરવલ્લી, ખેડા, અને આણંદમાં વરસાદની સંભાવના વ્યક્ત કરવામાં આવી છે. અમદાવાદમાં છૂટાછવાયા વરસાદની શક્યતા છે.

હાલ ખેડા જિલ્લામાં વાતાવરણમાં પલટો જોવા મળી રહ્યો છે. ભારે ઉકળાટ બાદ નડિયાદ, માતર પંથકમાં વરસાદી માહોલ છવાયો છે. નડિયાદના કણજરી, ઉત્તરસંડા, નરસંડા અને માતરના લીંબાસી સહિત ખેડાના વિસ્તારોમાં પવન સાથે વરસાદ નોંધાયો છે.

જણાવાયું છે કે, હાલ જે વરસાદ પડી રહ્યો છે તે ચોમાસાની ઔપચારિક શરૂઆતનો ભાગ નથી. સામાન્ય રીતે ચોમાસું વહેલું આવશે તેવી ધારણા હતી, પરંતુ ચોમાસાની સિસ્ટમ મુંબઈ સુધી પહોંચ્યા બાદ નબળી પડી ગઇ છે, જેના કારણે ગુજરાતમાં ચોમાસું વિલંબથી પહોંચે તેવી શક્યતા છે. હવામાન વિભાગ અનુસાર હવે 10 જૂન આસપાસ દક્ષિણ ગુજરાતમાં ચોમાસુ પ્રવેશી શકે છે.