ગુજરાતમાં સમયસર થશે ચોમાસાની એન્ટ્રી

અમદાવાદ: ગુજરાતભરમાં હાલ છૂટોછવાયો વરસાદ વરસી રહ્યો છે, ત્યારે હવામાન વિભાગે રાજ્યના હવામાન અંગે મહત્વપૂર્ણ આગાહી કરી છે. આગામી ૬ જૂન સુધી સૌરાષ્ટ્ર, દક્ષિણ, ઉત્તર અને મધ્ય ગુજરાતના ૧૭થી વધુ જિલ્લાઓમાં ગાજવીજ સાથે હળવાથી મધ્યમ વરસાદની સંભાવના વ્યક્ત કરવામાં આવી છે. આ ઉપરાંત, આ વખતે ગુજરાતમાં ચોમાસું સમયસર પહોંચવાના સ્પષ્ટ સંકેતો મળી રહ્યા છે.

ચોમાસાનું વહેલું આગમન અને વધુ વરસાદની શક્યતા: હવામાન વિભાગના જણાવ્યા અનુસાર, દક્ષિણ ભારતમાં સક્રિય થયેલી સિસ્ટમને કારણે આગામી ૧૫ જૂન સુધી હળવો વરસાદ જોવા મળી શકે છે. ત્યારબાદ, કડાકા-ભડાકા સાથે હળવાથી ભારે વરસાદની શક્યતા છે. ખાસ કરીને, ગત વર્ષની સરખામણીમાં આ વર્ષે ગુજરાતમાં વધુ વરસાદ થવાનું અનુમાન છે.

જૂન મહિનામાં સરેરાશ તાપમાન અને ચોમાસાની એન્ટ્રી: હવામાન વિભાગની આગાહી મુજબ, જૂન મહિનાનું સરેરાશ મહત્તમ તાપમાન ૩૭.૫ ડિગ્રી સેલ્સિયસ આસપાસ રહી શકે છે. ડિસ્કાયમેટના મતે, જુલાઈ અને ઓગસ્ટ મહિનામાં ગુજરાતમાં સૌથી વધુ વરસાદ નોંધાય છે.

નોંધનીય છે કે, ગત ૨૭ મેના રોજ કેરળમાં ચોમાસાનું વિધિવત આગમન થઈ ચૂક્યું છે, જે સામાન્ય કરતાં ૫ દિવસ વહેલું છે. ગુજરાતમાં આગામી ૧૨ જૂન સુધીમાં દક્ષિણ ગુજરાતના વિસ્તારોમાં ચોમાસાની એન્ટ્રી થવાની સંભાવના છે. ત્યારબાદ, ૨૦થી ૨૫ જૂન સુધીમાં અમદાવાદ સહિત આસપાસના વિસ્તારોમાં અને ૩૦ જૂન સુધીમાં તો સમગ્ર ગુજરાતમાં ચોમાસું બેસી જવાની શક્યતા છે.

જિલ્લાવાર વરસાદની આગાહી:

• ૦૧ જૂન: બોટાદ, અમરેલી, ભાવનગર, મહીસાગર, દાહોદ, છોટા ઉદેપુર, સુરત, તાપી, નર્મદા, નવસારી, ડાંગ અને વલસાડના છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી છે.
• ૦૨-૦૫ જૂન: સાબરકાંઠા, અરવલ્લી, ખેડા, મહીસાગર, પંચમહાલ, દાહોદ, વડોદરા, નર્મદા, સુરત, ભરૂચ, તાપી, નવસારી, ડાંગ, વલસાડ, અમરેલી, ભાવનગર અને ગીર સોમનાથમાં હળવાથી મધ્યમ વરસાદની શક્યતા.
• ૦૬ જૂન: ગીર સોમનાથ, ભાવનગર, સાબરકાંઠા, અરવલ્લી, મહીસાગર, પંચમહાલ, દાહોદ, વડોદરા, છોટા ઉદેપુર, ભરૂચ, નર્મદા, સુરત, તાપી, ડાંગ, નવસારી અને વલસાડ જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી છે.