આરોગ્ય કર્મચારીઓનો વિરોધ યથાવત, 15 દિવસે પણ સમાધાન નહી

ગુજરાત પંચાયત આરોગ્ય કર્મચારી સંઘ દ્વારા તેમની વિવિધ માગણીઓને લઈને શરૂ કરાયેલો વિરોધ 15 મા દિવસે પણ યથાવત રહ્યો છે. આરોગ્ય કર્મચારીઓ ગ્રેડ પે, પગાર વૃદ્ધિ અને અન્ય સુવિધાઓ માટે સરકાર સામે લડત આપી રહ્યા છે. આંદોલનકારીઓ "ઠરાવ નહિ તો સમાધાન નહિ" ના સૂત્રોચાર સાથે સતત હડતાળ પર છે.

આરોગ્ય સેવાઓ પર ગંભીર અસર...

લંબાયેલા આંદોલનને લઈને સત્તાધીશો હજુ સુધી કોઈ ઠોસ નિર્ણય લઈ શક્યા નથી, જેના કારણે આરોગ્ય સેવાઓ પર ગંભીર અસર પડી છે. અલગ-અલગ જિલ્લાઓમાંથી હજારો કર્મચારીઓ ગાંધીનગરમાં એકત્ર થયા છે અને સરકાર સામે વિરોધ દર્શાવી રહ્યા છે.

પોલીસે આરોગ્ય કર્મચારીઓની અટકાયત કરી...

પોલીસે મોટી સંખ્યામાં આરોગ્ય કર્મચારીઓની અટકાયત કરી હતી, તેમ છતાં વિરોધ કરનારાઓ પાછા નથી થયા. તેઓએ સરકાર સામે ઉગ્ર રોષ વ્યક્ત કર્યો છે અને સ્પષ્ટ સંકેત આપ્યો છે કે માગણીઓ માન્ય નહીં થાય ત્યાં સુધી આંદોલન ચાલુ રહેશે.

આરોગ્ય સુવિધાઓ અસ્તવ્યસ્ત...

આંદોલનના કારણે રાજ્યની આરોગ્ય સેવાઓ અસરગ્રસ્ત બની છે, અને ગ્રામ્ય વિસ્તારોમાં આરોગ્ય સુવિધાઓ અસ્તવ્યસ્ત થઈ ગઈ છે. હવે જોવાનું રહેશે કે સરકાર અને આરોગ્ય કર્મચારીઓ વચ્ચે ક્યારે અને કેવી રીતે સમાધાન થાય.