પ્રાથમિક શિક્ષકો હવે કામગીરી મુદ્દે થતાં અસંતોષ સામે ફરિયાદ કરી શકશે

ગુજરાતની સરકારી તથા ગ્રાન્ટેડ પ્રાથમિક શાળાઓમાં ફરજ બજાવતા શિક્ષકોની કામગીરીમાં અસંતોષ અને અન્ય પ્રશ્નોનો ઝડપી ઉકેલ લાવવા માટે શિક્ષણ વિભાગે ફરિયાદ નિવારણ સમિતિની રચના કરી છે. શિક્ષકોને હવે પોતાની કામગીરી કે વહીવટ અંગે અસંતોષ હોય તો રાજ્યકક્ષાની સમિતિમાં અરજી કરી શકશે. શિક્ષકે કરેલી ફરિયાદની નકલ સંબંધિત જિલ્લા પ્રાથમિક શિક્ષણાધિકારીને મોકલવવાની ફરજિયાત રહેશે. જિલ્લા પ્રાથમિક શિક્ષણાધિકારીને મોકલી હશે તો જ અરજી માન્ય ગણાશે.

શિક્ષણ વિભાગે વહીવટી પ્રક્રિયામાં પારદર્શિતા લાવવા અનેક કામગીરી ઓનલાઇન કરી છે. તેમ છતાં શિક્ષકોની ફરિયાદોનો સમયસર ઉકેલ ન મળતાં નવા મિકેનિઝમની રૂપરેખા ઘડી કાઢવામાં આવી છે. શિક્ષકોની ફરિયાદોનો ઉકેલ લાવવા માટે શિક્ષણ વિભાગે ફરિયાદ નિવારણ સમિતિ બનાવી છે. આ સમિતિમાં શિક્ષણ વિભાગના ઉચ્ચ અધિકારીઓ ઉપરાંત જિલ્લા કક્ષાના શિક્ષણાધિકારીઓનો સમાવેશ કરવામાં આવ્યો છે.

શિક્ષણ વિભાગે કરેલી આ વ્યવસ્થામાં રાજ્યના અરવલ્લીથી તમામ જિલ્લાઓ આવરી લઈને શિક્ષકો માટે ઓપન પ્લેટફોર્મ ઉભું કર્યુ છે. અગાઉ કોઈપણ શિક્ષકને જિલ્લા કક્ષાએ અરજી કરવાનો ઉકેલ ન મળ્યો હોય તો હવે તેઓ રાજ્ય કક્ષાએ પોતાની ફરિયાદ રજૂ કરી શકશે.

આ નવી વ્યવસ્થાથી રાજકીય કે વહીવટી સ્તરે વારંવારની અવગણનાનો ભોગ બનેલા શિક્ષકોને ન્યાયની આશા જાગી છે.  ખાસ કરીને વહીવટ, બેદરકારી,  કારણ વગર થયેલી બદલી કે સેવા શરતો અંગે મળતી ફરિયાદોને લઇને હવે શિક્ષકોને ફરિયાદ કરવા માટે એક માધ્યમ મળ્યું છે.

શિક્ષણ વિભાગે ખાસ ભાર આપ્યો છે કે, શાળા કક્ષાએ સમસ્યાનો ઉકેલ ન આવતાં જે શિક્ષકોએ જિલ્લા કક્ષાએ પ્રયાસ કર્યો હોવા છતાં ન્યાય ન મળ્યો હોય તેવા શિક્ષકો માટે રાજ્યકક્ષાની ફરિયાદ સમિતિ હવે તમામ પ્રશ્નો માટે મુખ્ય પ્લેટફોર્મ રહેશે.

કેવી રીતે અરજી કરી શકશે?

શિક્ષકે પોતાનો કેસ રાજ્યકક્ષાની ફરિયાદ સમિતિમાં લેખિતમાં રજૂ કરવાનો રહેશે.

ફરિયાદની અરજીની નકલ સંબંધિત જિલ્લા પ્રાથમિક શિક્ષણાધિકારીને ફરજિયાત મોકલવાની રહેશે.

આગામી સમયમાં યોજાનાર સમિતિની બેઠકમાં અરજીઓનો ઉકેલ લાવવાની પ્રક્રિયા હાથ ધરાશે