ગુજરાતમાં વિકાસના દાવાની પોલ ખુલીઃ દાંતા તાલુકામાં વિકાસ હજુ પહોંચ્યો નથી

ગાંધીનગર: ગુજરાતમાં વિકાસ થયાના વારંવાર બણગા ફૂંકવામાં આવે છે. દાંતા તાલુકાના બોરડીયાળા ગામના લોકોએ ગુજરાતના વિકાસના દાવાની પોલી ઉઘાડી પાડી છે. બોરડીયાળાના ગ્રામજનોઓ ફાળો એકઠો કરી તંત્રની મદદ વગર કીડી મકોડી નદી પર સ્વખર્ચે પુલ બનાવીને વિકાસના દાવા અંગે સરકારને અરીસો બતાવ્યો છે. ગ્રામજનોએ સ્વખર્ચે પુલ બનાવ્યા બાદ તાલુકા વિકાસ અધિકારી ગ્રાન્ટ મંજૂર કરી હોવાનો લૂલો બચાવ કરી રહ્યા છે.

બનાસકાંઠા જિલ્લાના દાંતા તાલુકાના બોરડીયાળા ગામની સરકારી શાળામાં 700 કરતાં વધુ બાળકો અભ્યાસ કરે છે. જેમાંથી 200 જેટલા બાળકો બોરડીયાળા ગામના મંડારાવાસમાં વસવાટ કરે છે. જેમને ચોમાસા દરમિયાન શાળાએ આવવા માટે કીડી મકોડી નદીમાંથી પસાર થવું પડે છે.

તાજેતરમાં 50 જેટલાં બાળકો નદીમાં ફસાઈ જતાં તંત્રની મદદ વગર ગ્રામજનોએ જાતે રેસ્ક્યું કરી બાળકોને બચાવ્યા હતા. ત્યારબાદ ગ્રામજનોએ સ્વખર્ચે પુલ બનાવવાનો નિર્ણય કર્યો હતો. ગ્રામજનોએ જાતે ફાળો એકઠો કરી કીડી મકોડી નદી ઉપર પુલ બનાવ્યો છે. કીડી મકોડી નદી ઉપર પુલ બનાવવા તંત્રની મદદ નહી મળવાથી ગ્રામજનોમાં નારાજગી છે.

બોરડીયાળા ગામના અગ્રણી ચંદુભાઈ બુંબડીયાએ જણાવ્યુ કે, આગામી સમયમાં આવનાર ચૂંટણી દરમિયાન અમારા ગામમાં કોઈપણ નેતાને પ્રવેશ કરવા દેશું નહી. બાળકો શાળાએ અભ્યાસ કરવા જાય ત્યારે નદીમાં પાણી હોવાથી પુલ ઉપર પથ્થરો મૂકીને જવું પડે છે.

દાંતા તાલુકા વિકાસ અધિકારી કે.સી.પંડ્યાએ જણાવ્યું કે નદી ઉપર પુલ બનાવવા દરખાસ્ત આવી છે. પુલની કામગીરી માટે 210 લાખની ગ્રાન્ટ મંજૂર કરી છે. ટૂંક સમયમાં પુલની કામગીરી કામ શરૂ કરવામાં આવશે.