સુરત શહેર તેના હીરા અને કાપડ ઉદ્યોગ માટે વિશ્વભરમાં વિખ્યાત છે, પરંતુ તાજેતરમાં અહીં ખાણી-પીણીની ચીજવસ્તુઓમાં ભેળસેળ કરનારા તત્વો પણ સક્રિય થયા છે. શહેરના ઉમરા વેલંજા વિસ્તારમાં આવેલા 'અવસર પ્લાઝા'માં પોલીસે એક મોટા નકલી ઘી બનાવવાના કારખાના પર દરોડા પાડીને ગંભીર કૌભાંડનો પર્દાફાશ કર્યો છે. બે શખ્સો દ્વારા ચલાવવામાં આવતું આ યુનિટ છેલ્લા દોઢ વર્ષથી લોકોના સ્વાસ્થ્ય સાથે ચેડાં કરી રહ્યું હતું.
ગુપ્ત બાતમી અને પોલીસની વ્યૂહાત્મક કાર્યવાહી :&nbsp;
ઉત્રાણ પોલીસને ચોક્કસ માહિતી મળી હતી કે ઉમરા વેલંજાના અવસર પ્લાઝામાં શંકાસ્પદ પ્રવૃત્તિઓ ચાલી રહી છે. આ બાતમીના આધારે પોલીસે પ્લાઝાના પહેલા માળે આવેલી દુકાન નંબર 106 અને 108માં તપાસ હાથ ધરી હતી. તપાસ દરમિયાન જાણવા મળ્યું કે દુકાન નંબર 106માં આધુનિક મશીનરી લગાવીને આખું કારખાનું ઊભું કરવામાં આવ્યું હતું, જ્યારે બાજુની દુકાનનો ઉપયોગ તૈયાર માલના સંગ્રહ માટે ગોડાઉન તરીકે થતો હતો.
કેમિકલ અને તેલના મિશ્રણથી બનતું 'ઝેરી' ઘી :&nbsp;
આ કૌભાંડની કાર્યપદ્ધતિ જાણીને પોલીસ પણ ચોંકી ઉઠી હતી. આરોપીઓ સોયાબીન તેલ અને ડાલડા ઘીને મોટા વાસણોમાં ઉકાળતા હતા. અસલી ગાયના ઘી જેવી સુગંધ લાવવા માટે તેમાં જોખમી એસેન્સ અને કેમિકલ સિરપ ઉમેરવામાં આવતું હતું. ગ્રાહકોને છેતરવા માટે કુદરતી પીળો રંગ આપવા કૃત્રિમ કલરનો ઉપયોગ કરવામાં આવતો. આ રીતે તૈયાર થયેલા મિશ્રણને 'શ્રી સહજાનંદ' અને 'શ્રી ગજાનંદ' જેવી પ્રતિષ્ઠિત બ્રાન્ડના નામે પેક કરીને બજારમાં વેચવામાં આવતું હતું.
લાખોનો મુદ્દામાલ અને સાધનો જપ્ત :&nbsp;
પોલીસ દરોડા દરમિયાન અંદાજે 4.94 લાખ રૂપિયાથી વધુની કિંમતનો મુદ્દામાલ કબજે કરવામાં આવ્યો છે. જેમાં:
583 લીટર તૈયાર નકલી ઘી (બજાર કિંમત ₹3.50 લાખથી વધુ)
2200 થી વધુ ખાલી અને ભરેલા ડબ્બા
સોયાબીન તેલ અને ડાલડાના જથ્થાબંધ ડબ્બા
સીલિંગ મશીન, ઇલેક્ટ્રોનિક વજન કાંટો અને થર્મોમીટર
ગેસ સિલિન્ડર અને પેકિંગના અન્ય સાધનો
સૂત્રધારોની ધરપકડ અને તપાસનો ધમધમાટ :&nbsp;
આ રેકેટમાં બે મુખ્ય આરોપીઓના નામ સામે આવ્યા છે. નિહાર ભરતભાઈ મોવલીયા (ઉંમર 32 વર્ષ) ની પોલીસે અટકાયત કરી છે, જે માલના સપ્લાય અને વેચાણનું કામ જોતો હતો. જ્યારે મેન્યુફેક્ચરિંગ યુનિટ સંભાળતો પીયૂષ વિઠ્ઠલભાઈ સાંગાણી હાલ ફરાર છે, જેને પકડવા માટે ચક્રો ગતિમાન કરવામાં આવ્યા છે. પોલીસ હવે એ દિશામાં તપાસ કરી રહી છે કે આ નકલી ઘી સુરતના કયા કયા વેપારીઓને પહોંચાડવામાં આવ્યું હતું.
તંત્ર દ્વારા જપ્ત કરાયેલા નમૂનાઓને એફએસએલ (FSL) અને ફૂડ એન્ડ ડ્રગ્સ વિભાગમાં પરીક્ષણ માટે મોકલવામાં આવ્યા છે. નાગરિકોને પણ અપીલ કરવામાં આવી છે કે ખૂબ જ સસ્તા ભાવે મળતા ઘીની ખરીદી ટાળવી અને હંમેશા અધિકૃત બિલ તેમજ પેકિંગની ચકાસણી કરવી.&nbsp;

નકલી ઘીનું કૌભાંડ

ઉમરા વેલંજામાં સોયાબીન તેલ અને કેમિકલથી બનતું ઘી ઝડપાયું, 583 લીટર ઝેરી જથ્થો જપ્ત કરાયો

March 13, 2026 | 11:55 IST