ટી20 વર્લ્ડ કપ 2026ની ફાઈનલમાં ભારતની ભવ્ય જીત બાદ આખું ભારત જશમાં ડૂબેલું હતું, પરંતુ સ્ટાર ક્રિકેટર હાર્દિક પંડ્યા અને ઈશાન કિશનની ઉજવણી કરવાની રીત હવે વિવાદનું કેન્દ્ર બની છે. વડોદરાના કારેલીબાગ પોલીસ મથકે રિપબ્લિકન પાર્ટીના અગ્રણીઓ દ્વારા આ બંને ખેલાડીઓ વિરુદ્ધ રાષ્ટ્રધ્વજની ગરિમાને ઠેસ પહોંચાડવા બદલ લેખિત ફરિયાદ કરવામાં આવી છે.
શું છે સમગ્ર વિવાદ ?
સોશિયલ મીડિયા પર વાયરલ થયેલા વીડિયો અને તસવીરોમાં જોવા મળ્યું છે કે હાર્દિક પંડ્યા અને ઈશાન કિશને પોતાના શરીર પર રાષ્ટ્રધ્વજ તિરંગો લપેટેલો હતો. આ સ્થિતિમાં તેઓ તેમની મહિલા મિત્રો સાથે અત્યંત નિકટતા ધરાવતા પોઝ આપતા અને ચુંબન કરતા નજરે પડ્યા હતા. આ તસવીરો સામે આવ્યા બાદ દેશભરમાં રાષ્ટ્રપ્રેમીઓમાં રોષ જોવા મળી રહ્યો છે.
પોલીસ અરજીમાં કરાયેલા મુખ્ય આક્ષેપો :&nbsp;
ફરિયાદ પક્ષ દ્વારા મુખ્યત્વે ત્રણ ગંભીર મુદ્દાઓ પર તપાસની માંગ કરવામાં આવી છે:
રાષ્ટ્રધ્વજનું અપમાન: તિરંગાને શરીર પર લપેટીને તેની મર્યાદા વિરુદ્ધ નાચવું અને ધ્વજને પગ સુધી અડે તે રીતે રાખવો એ રાષ્ટ્રીય પ્રતીકોના પ્રોટોકોલનું સીધું ઉલ્લંઘન છે.
જાહેરમાં અશ્લીલતા: સ્ટેડિયમ જેવા જાહેર સ્થળે હજારો લોકોની હાજરીમાં શારીરિક નિકટતા દર્શાવવી અને ચુંબન જેવા કૃત્યો કરવા એ જાહેર શાલીનતાના ભંગ સમાન ગણાવ્યું છે.
ગેરવર્તણૂક: વીડિયોમાં દેખાતી મહિલા સાથેની શારીરિક નિકટતા અંગે પણ સવાલો ઉઠાવવામાં આવ્યા છે અને આ બાબતે યોગ્ય તપાસ કરવા માંગણી કરાઈ છે.
કાયદાકીય મુશ્કેલીમાં વધારો :&nbsp;
હાર્દિક પંડ્યા સામે માત્ર ગુજરાતમાં જ નહીં, પણ મહારાષ્ટ્ર અને ઉત્તર પ્રદેશમાં પણ મોરચો મંડાયો છે. પુણેના શિવાજી નગર પોલીસ સ્ટેશનમાં એડવોકેટ વાજિદ ખાન દ્વારા ફરિયાદ દાખલ કરવામાં આવી છે. તેમણે જણાવ્યું કે 'રાષ્ટ્રીય સન્માનના અપમાન નિવારણ અધિનિયમ, 1971' મુજબ રાષ્ટ્રધ્વજ સાથે આવી વર્તણૂક ગુનો બને છે. હાથરસમાં પણ એસપી અને કેન્દ્રીય ગૃહમંત્રીને પત્ર લખી કડક કાર્યવાહીની માંગણી કરવામાં આવી છે.
અગાઉ પણ વિવાદોમાં રહ્યા છે પંડ્યા :&nbsp;
હાર્દિક પંડ્યા પોતાની લાઈફસ્ટાઈલ અને બિન્ધાસ નિવેદનો માટે જાણીતા છે, પરંતુ આ વખતે મામલો દેશની આન-બાન અને શાન સમાન રાષ્ટ્રધ્વજ સાથે જોડાયેલો હોવાથી તેમની મુશ્કેલીઓ વધી શકે છે. પોલીસ હાલ આ મામલે વાયરલ વીડિયોની તપાસ કરી રહી છે અને કાયદાકીય અભિપ્રાય લીધા બાદ આગળની કાર્યવાહી કરવામાં આવશે.&nbsp;

હાર્દિક પંડ્યા તિરંગો વિવાદ

તિરંગાના અપમાન અને જાહેરમાં અશ્લીલતાના આરોપસર વડોદરા અને પુણેમાં ક્રિકેટરો સામે અરજી દાખલ

March 14, 2026 | 18:45 IST