અમદાવાદમાં 400 વર્ષ જૂની મસ્જિદનો ભાગ તોડી પડાશે!

અમદાવાદમાં 400 વર્ષ જૂની મંસા મસ્જિદનો એક ભાગ તોડી પાડવામાં આવશે. ગુજરાત હાઈકોર્ટે મંસા મસ્જિદ ટ્રસ્ટ દ્વારા અમદાવાદ મ્યુનિસિપલ કોર્પોરેશન (AMC) દ્વારા જારી કરાયેલી નોટિસ રદ કરવાની માંગ કરતી અરજી ફગાવી દીધી છે. સરસપુરમાં આવેલી મસ્જિદનો એક ભાગ ખાલી કરવા માટે નોટિસ જારી કરવામાં આવી હતી. શહેર વિકાસ યોજનાના ભાગરૂપે એક રસ્તો પહોળો કરવાનો હોવાથી નોટિસ આપવામાં આવી હતી.

ગુજરાત હાઈકોર્ટે મંસા મસ્જિદ ટ્રસ્ટની અરજી ફગાવીને જણાવ્યું હતું કે, અમદાવાદ મ્યુનિસિપલ કોર્પોરેશનનો માર્ગ વિસ્તરણ પ્રોજેક્ટ “જાહેર હિત”માં છે. હાઈકોર્ટે નોટિસ પર સ્ટે આપવાનો ઇનકાર કર્યો છે. જસ્ટિસ મૌના ભટ્ટે ચુકાદો આપ્યો કે, વકફ કાયદાની જોગવાઈઓ આ કેસમાં લાગુ પડતી નથી. કારણકે મ્યુનિસિપલ કમિશનરે GPMC કાયદા હેઠળ વિશેષ સત્તાઓનો ઉપયોગ કર્યો હતો.

ટ્રસ્ટે દાવો કર્યો હતો કે, નોટિસ અને સુનાવણી AMCના ડેપ્યુટી એસ્ટેટ ઓફિસર દ્વારા હાથ ધરવામાં આવી હતી. જ્યારે GPMC કાયદા હેઠળ મ્યુનિસિપલ કમિશનરને નિર્ણય લેવાની સત્તા આપવામાં આવી છે. ટ્રસ્ટે એવી પણ દલીલ કરી હતી કે, મસ્જિદ વકફની મિલકત છે અને તેના ધાર્મિક અને સાંસ્કૃતિક વારસાને નુકસાન પહોંચાડવાથી બંધારણ હેઠળ ધાર્મિક સ્વતંત્રતાનું ઉલ્લંઘન થાય છે. ટ્રસ્ટે આરોપ લગાવ્યો હતો કે, AMCની સ્થાયી સમિતિએ જાન્યુઆરી-2025માં દાખલ કરાયેલા વાંધાઓને અવગણ્યા હતા.

રાજ્ય સરકારે દલીલ કરી હતી કે, કાલુપુર રેલ્વે સ્ટેશન અને અમદાવાદ મેટ્રો જંકશનને જોડતો માર્ગ પહોળો કરવાનો પ્રોજેક્ટ ટ્રાફિક નિયંત્રણ અને શહેરી વિકાસ માટે જરૂરી છે. સરકારે જણાવ્યું હતું કે, GPMC કાયદા હેઠળની તમામ કાનૂની પ્રક્રિયાઓ પૂર્ણ થઈ ગઈ છે અને જ્યારે મ્યુનિસિપલ કમિશનર ખાસ સત્તાઓનો ઉપયોગ કરે છે ત્યારે વકફ કાયદાની જોગવાઈઓ લાગુ પડતી નથી. કોર્ટે જણાવ્યું હતું કે, આ પ્રોજેક્ટ “જાહેર હિત” માટે જરૂરી છે અને AMCએ કાયદા હેઠળ યોગ્ય પ્રક્રિયાનું પાલન કર્યું છે. કોર્ટે ટ્રસ્ટની અરજી અને નોટિસ પર ચાર અઠવાડિયાનો સ્ટે આપવાની વિનંતી બંનેને ફગાવી દીધી છે.  

ગુજરાત હાઇકોર્ટે અમદાવાદ મ્યુનિસિપલ કોર્પોરેશન (AMC)ના સરસપુર ખાતે રોડ પહોળો કરવાની કાર્યવાહી આગળ વધારવાના નિર્ણયને માન્યતા આપતા મંચા મસ્જિદના ટ્રસ્ટીઓ દ્વારા દાખલ કરાયેલી અરજી ફગાવી દીધી છે. કોર્ટે સ્પષ્ટ કર્યું કે રસ્તા પહોળા કરવા રાજ્ય અને કોર્પોરેશન દ્વારા લેવાયેલા પગલાંમાં વકફ અધિનિયમની જોગવાઈઓનો આશરો લેવામાં આવી શકતો નથી.

મંસા મસ્જિદ વકફે AMC દ્વારા બહાર પાડવામાં આવેલી નોટિસોને પડકારતા દલીલ કરી હતી કે, અંદાજે 400 વર્ષ જૂની મસ્જિદનો એક ભાગ પાછળ ખસેડવા જણાવાયું છે. જ્યારે આ માળખું વકફ મિલકત તરીકે નોંધાયેલ હોવાથી તે સુરક્ષિત છે. તેમનું કહેવું હતું કે, તોડફોડ અને સંપાદન માટેની નોટિસો બહાર પાડતા પહેલાં વકફ બોર્ડને સાંભળવાની તક આપવામાં આવી નથી.

કોર્ટે નોંધ્યું કે, AMCએ કાયદાકીય પ્રક્રિયા બરાબર અનુસરેલી છે. જાહેર નોટિસો જાહેર કરવામાં આવી હતી. વાંધાઓ આમંત્રિત કરાયા હતા અને સ્ટેન્ડિંગ કમિટીએ નવી રોડ લાઇન મંજૂર કરતા ઠરાવો પસાર કર્યા હતા. ત્યારબાદ કમિશનરે સ્ટ્રીટ લાઇન નક્કી કરતા આદેશો કર્યા અને ડેપ્યુટી એસ્ટેટ ઓફિસરે સોંપાયેલા અધિકાર હેઠળ અંતિમ નોટિસ જારી કરી હતી.

મંસા મસ્જિદ ટ્રસ્ટની અરજી ફગાવતા ન્યાયમૂર્તિ મૌના એમ. ભટ્ટે જણાવ્યું કે, વકફ મિલકતોના સંપાદન સંબંધિત વકફ અધિનિયમની જોગવાઈઓ લાગુ પડતી નથી. જ્યારે કોર્પોરેશન GPMC અધિનિયમ હેઠળ ખાસ સત્તાનો ઉપયોગ કરીને સ્ટ્રીટ લાઇન નિયમિત કરે છે.