ગુજરાતની ખાનગી શાળાઓમાં ફીના નામે ચાલતી લૂંટ અને અનિયમિતતાઓ પર લગામ કસવા માટે ફી રેગ્યુલેટરી કમિટી (FRC)એ એક ક્રાંતિકારી અને પારદર્શક નિર્ણય લીધો છે. રાજ્યની અંદાજે 5,780 ખાનગી શાળાઓની અધિકૃત ફી હવે FRCની સત્તાવાર વેબસાઇટ પર સાર્વજનિક કરી દેવામાં આવી છે. આ પગલાથી શાળાઓ દ્વારા ફીના ઓર્ડર છુપાવવાની નીતિનો અંત આવશે.
લાંબા સમયથી વાલીઓ દ્વારા ફરિયાદ કરવામાં આવતી હતી કે અનેક શાળાઓ FRC દ્વારા નક્કી કરાયેલી ફી કરતા વધુ રકમ વસૂલે છે. ખાસ કરીને એડમિશન ફી, ટર્મ ફી અને અન્ય પ્રવૃત્તિઓના નામે વાલીઓ પાસેથી આર્થિક શોષણ કરવામાં આવતું હતું. 
જોકે, હવે નવી વ્યવસ્થા મુજબ, અમદાવાદ ઝોનની 2,310 અને ગ્રામ્યની 394 શાળાઓ સહિત રાજ્યની તમામ મોટી શાળાઓનું ધોરણવાર અને માધ્યમવાર ફી માળખું ઓનલાઈન ઉપલબ્ધ છે.
સુપ્રીમ કોર્ટના તાજેતરના દિશાનિર્દેશો બાદ FRCએ નિયમો વધુ કડક બનાવ્યા છે. હવેથી કોઈપણ શાળા એડમિશન કે ટર્મ ફીના નામે અલગથી વસૂલાત કરી શકશે નહીં. અગાઉ શાળાઓને નોટિસ બોર્ડ પર ફી ઓર્ડર પ્રદર્શિત કરવાની સૂચના હતી, પરંતુ તેનું પાલન થતું નહોતું. હવે ટેકનોલોજીના માધ્યમથી વાલીઓ સીધા જ સત્ય જાણી શકશે અને જો કોઈ શાળા વધુ ફી માંગે તો પુરાવા સાથે શિક્ષણ વિભાગમાં ફરિયાદ કરી શકશે.
તમારા સંતાનની ફી કેવી રીતે ચેક કરશો? 
વાલીઓએ સત્તાવાર વેબસાઇટ&nbsp;frcgujarat.org પર જઈને પોતાના જિલ્લા અથવા મ્યુનિસિપલ કોર્પોરેશન વિસ્તારની પસંદગી કરવાની રહેશે. 
ત્યારબાદ શાળાનું બોર્ડ, માધ્યમ અને નામ સર્ચ કરતા જ મંજૂર થયેલી ફીનો સંપૂર્ણ ઓર્ડર પીડીએફ સ્વરૂપે જોઈ શકાશે. આ પારદર્શક અભિગમ શિક્ષણ ક્ષેત્રે થતી ગેરરીતિઓ રોકવામાં સીમાચિહ્નરૂપ સાબિત થશે.

FRCએ ખાનગી શાળાઓની ફી જાહેર કરી

FRCએ સત્તાવાર વેબસાઈટ પર ખાનગી શાળાઓની ફી જાહેર કરી- વધારાની રકમ વસૂલતી શાળાઓ પર રોક

December 29, 2025 | 16:26 IST