Pahalgam Attack : શૈલેશભાઈના પુત્રની આંખોદેખી આપવીતી જાણીને તમને પણ થશે કે આવા આતંકીઓને તો...

સુરતના શૈલેષભાઈ કળથિયા, જેમણે પહેલગામના ભયાનક આતંકી હુમલામાં પોતાના પરિવારની નજર સામે જ અંતિમ શ્વાસ લીધા, તેમનું આજે સુરતમાં હૃદયદ્રાવક વાતાવરણમાં અંતિમ સંસ્કાર કરવામાં આવ્યું. તેમના ભાઈના ઘરેથી નીકળેલી અંતિમ યાત્રામાં તેમની દીકરી અને બહેનોએ ભારે હૈયે અર્થીને કાંધ આપી. એ ક્ષણ કલ્પનાતીત પીડાથી ભરેલી હતી જ્યારે પત્ની અને બાળકોએ પોતાની આંખો સામે શૈલેષભાઈને ગોળીઓથી વીંધાયેલા જોયા હતા.

પિતાને ગુમાવનાર દીકરાએ એ ભયાનક ઘટનાની એક એક વિગત વર્ણવી. તેણે જણાવ્યું કે, કેવી રીતે પહેલગામના ખરાબ રસ્તાઓ પર ઘોડા પર સવાર થઈને ગયા હતા અને ત્યાં પહોંચતા જ ભૂખ લાગી હતી. અચાનક પાછળથી ગોળીઓના અવાજ સંભળાયા અને સૌ કોઈ જીવ બચાવવા ભાગવા લાગ્યા. ત્યારે જ કેટલાક આતંકવાદીઓ તેમની સામે આવી ગયા અને ક્રૂરતાથી હિન્દુ અને મુસલમાનને અલગ થવાનું કહ્યું. એ પછી તમામ હિન્દુ પુરુષો પર ગોળીઓ વરસાવી દીધી અને તેઓ ભાગી ગયા. દીકરાએ એક આતંકવાદીનું વર્ણન કરતાં કહ્યું કે તેની લાંબી દાઢી હતી, માથે ટોપી અને કેમેરો પણ લગાવેલો હતો.

પતિને ગુમાવનાર શીતલબેનનું દર્દ તો જાણે આંખોમાંથી વહેતું દરિયો હતું. તેમણે જણાવ્યું કે, તેમનો પરિવાર અનેક સપનાંઓ સાથે ધરતીના સ્વર્ગ જેવા કાશ્મીરમાં ફરવા ગયો હતો. ત્યાં શૈલેષભાઈનો જન્મદિવસ ઉજવવાનો હતો. દીકરીની ધોરણ 12 ની પરીક્ષા પૂરી થયા બાદ પરિવાર હળવાશની પળો માણવા નીકળ્યો હતો, પણ કોને ખબર હતી કે ખુશીની આ પળો કાયમી વેદનામાં બદલાઈ જશે. પોતાની નજર સામે પતિને ગોળી મારતા જોનાર શીતલબેને જ્યારે એ ભયાનક ક્ષણોનું વર્ણન કર્યું ત્યારે દરેકની આંખો ભીની થઈ ગઈ. તેમણે જણાવ્યું કે, આતંકવાદીઓએ પહેલા ધર્મ પૂછીને લોકોને જુદા કર્યા અને પછી તેમના પતિને તેમનાં જ બાળકો અને તેમની સામે ગોળી મારી દીધી. જ્યાં સુધી શૈલેષભાઈનો જીવ ન ગયો ત્યાં સુધી એ હત્યારાઓ ત્યાં જ ઉભા રહીને હસતા રહ્યા.

આતંકવાદીઓની આ ક્રૂરતાએ શૈલેષભાઈના પરિવારને એવા ઊંડા ઘા આપ્યા છે જે ક્યારેય ભરાશે નહીં. વિલાપ કરતી પત્નીએ સરકાર અને સુરક્ષા વ્યવસ્થા સામે આકરા સવાલો ઉઠાવ્યા. તેમણે કહ્યું કે, મુસલમાનોને કંઈ ન કર્યું અને જેટલા હિન્દુ હતા તે બધાને ગોળી મારી દીધી. જ્યાં સુધી જીવ ન ગયો ત્યાં સુધી તે ઊભો ઊભો હસતો હતો. તેમણે કહ્યું કે, લોકો કાશ્મીરનું નામ બદનામ કરે છે, પણ કાશ્મીરમાં કંઈ વાંધો નથી. આટલા બધા પ્રવાસીઓ હોવા છતાં ત્યાં કોઈ આર્મી, પોલીસ કે મેડિકલ કેમ્પ નહોતો. તેમણે કહ્યું કે, તેઓ સરકાર અને આર્મી પર ભરોસો રાખીને ફરવા ગયા હતા.

ચાર બહેનો વચ્ચે શૈલેષભાઈ એકના એક ભાઈ હતા. મોટા વરાછાની હરિકુંજ સોસાયટીમાં પણ આ ઘટનાથી શોકની લાગણી છવાઈ ગઈ છે. તેમના પિતા હાલમાં પોતાના વતનમાં રહે છે. ચાર બહેનોએ જ્યારે પોતાના એકમાત્ર ભાઈના મૃત્યુના સમાચાર સાંભળ્યા ત્યારે તેમની હાલત અત્યંત દયનીય થઈ ગઈ હતી. શૈલેષભાઈના મૃત્યુના સમાચારથી સમગ્ર શહેરમાં રોષની લાગણી ફેલાઈ ગઈ છે. જિલ્લા કલેક્ટરે મોડી રાત્રે તેમના મૃતદેહને સુરત લાવવાની વ્યવસ્થા કરી હતી. શ્રીનગરથી મુંબઈ અને ત્યાંથી ખાસ વિમાન દ્વારા રાત્રે 10 વાગ્યા સુધીમાં તેમનો પાર્થિવ દેહ સુરત પહોંચ્યો હતો.

મૂળ અમરેલીના દામનગરના ધુફણિયાના વતની અને સુરતમાં નાના વરાછાની હરિકુંજ સોસાયટીમાં રહેતા શૈલેષ હિંમત કળથિયા સુરતની એસબીઆઈ બેંકમાં નોકરી કરતા હતા. એક વર્ષ પહેલાં તેઓ મુંબઈ શિફ્ટ થયા હતા અને ત્યાં જ એસબીઆઈમાં નોકરી કરીને પોતાના પરિવાર સાથે રહેતા હતા. તેઓ પોતાની પત્ની શીતલબેન અને બે બાળકો સાથે કાશ્મીરના પ્રવાસે ગયા હતા, જ્યાં આતંકવાદી હુમલામાં તેમનું કરુણ મૃત્યુ થયું. પત્ની અને બંને બાળકોની નજર સામે જ આતંકવાદીઓએ તેમને ગોળી મારી દેતાં સમગ્ર પરિવારમાં ભારે શોકનું મોજુ ફરી વળ્યું છે.

કાશ્મીરમાં પોતાની પત્ની અને બે બાળકો સાથે પ્રવાસે નીકળેલા શૈલેષ કળથિયાને સ્વપ્ને પણ ખ્યાલ નહીં હોય કે આ પ્રવાસ તેમના જીવનનો છેલ્લો પ્રવાસ બની રહેશે. આતંકવાદીઓના કાયરતાપૂર્ણ હુમલામાં તેમનું મોત થતાં તેમની પત્ની અને બંને બાળકો હાલમાં પણ આઘાતમાં છે. બીજી તરફ, કેન્દ્ર સરકારે આ આતંકવાદી હુમલામાં માર્યા ગયેલા નાગરિકોના મૃતદેહોને તેમના વતન મોકલવા માટે વિશેષ વ્યવસ્થા કરી છે.