જયંતિ સરધારા પર હુમલા મુદ્દે પી.આઈ. પાદરીયા સામે કાર્યવાહી થવાની શક્યતા 

ગાંધીનગર: સરદાર ધામના ઉપપ્રમુખ જયંતિ સરધારા પર હુમલાની ઘટનાથી  વિવાદ શરૂ થયો છે. હુમલા મામલે જૂનાગઢના પી.આઈ. સંજીવ પાદરીયા પર ગંભીર આક્ષેપો કરવામાં આવ્યા છે. આ મામલે ગૃહ વિભાગે કડક પગલાં લઈ પીઆઈ પાદરીયાને શિસ્તભંગની કાર્યવાહી હેઠળ સસ્પેન્ડ કરે તેવી શક્યતા છે.   જયંતિ સરધારા ઉપર હુમલાની ઘટનાના  સીસીટીવી ફૂટેજ સામે આવ્યા બાદ સમગ્ર પ્રકરણમાં નવો વળાંક આવ્યો છે. સીસીટીવી ફૂટેજ અનુસાર પીઆઈ પાદરીયાના હાથમાં કોઈ હથિયાર દેખાતું નથી. તેઓ માત્ર ચાલતા જોવા મળી રહ્યા છે. જ્યારે જયંતિ સરધારા કારમાંથી ઉતરી તેમના તરફ જતાં જોવા મળી રહ્યા છે. તેથી મારામારીની ઘટના અંગે વિવાદ વકર્યો છે.    મુખ્યમંત્રી ભૂપેન્દ્ર પટેલે ગૃહ વિભાગ સાથે બેઠક કરી આ મામલે ગંભીર નોંધ લીધી છે. રિપોર્ટ મુજબ પીઆઈ સંદીપ પાદરીયા હાલ રજા ઉપર છે અને તેમના હથિયાર પોલીસ સ્ટેશનમાં નોંધાવવામાં આવ્યા છે. તેમ છતાં રાજ્ય સરકાર આક્ષેપોને ગંભીરતાથી લઈ પીઆઈ પાદરીયાને શિસ્તભંગની કાર્યવાહી હેઠળ નિલંબિત કરી શકે તેવી શક્યતા છે.   એક માહિતી જયંતિ સરધારાએ પીઆઈ પાદરીયા પર હુમલાનો આરોપ મૂકી ફરિયાદ નોંધાવી છે.   મહત્વપૂર્ણ છે કે, રાજકોટ તાલુકા પોલીસ સ્ટેશનમાં BNS ની કલમ 109(1), 115(2), 118(1), 352, 351(3) તથા GP એક્ટ 135(1) હેઠળ ફરિયાદ દાખલ કરવામાં આવી છે. પીઆઈ પાદરીયાના ખોડલધામ સાથેના સંબંધોની પણ તપાસ હાથ ધરવામાં આવી છે. આ પ્રકરણમાં તથ્ય આધારિત તપાસ જરૂરી છે. સરદારધામના ઉચ્ચ હોદ્દેદારના આક્ષેપો અને વિવાદાસ્પદ સીસીટીવી ફૂટેજ વચ્ચે સરકાર માટે નિર્ણય કરવો પડકારરૂપ બની ગયો છે. સરકારની કાર્યવાહી ઉપર આ મામલે નવો રાજકીય વળાંક આવી શકે છે.