નર્સિંગ ભરતી પરીક્ષાઃ એડવોકેટ જનરલ હાજીર હો....!

ફેબ્રુઆરી-2025માં આરોગ્ય વિભાગ દ્વારા નર્સિંગ ભરતી પરીક્ષા લેવામાં આવી હતી. 1903 જગ્યાઓ માટે 53 હજાર ઉમેદવારોએ પરીક્ષા આપી હતી. 100 પ્રશ્નોના પેપરની જવાબ સૂચિ જાહેર થતાં ભરતી પ્રક્રિયા વિવાદમાં આવી હતી. GTU દ્વારા સેટ કરાયેલા 100 પ્રશ્નોના પેપરમાં જવાબો ક્રમિક રીતે ABCD આવતા હતા. આ મામલે અરજદારો દ્વારા ગુજરાત હાઈકોર્ટમાં અરજી કરી ભરતી પ્રક્રિયા પર રોક લગાવવા અને નવેસરથી પરીક્ષા લેવાની માંગ કરી હતી. ગુજરાત હાઈકોર્ટે 30 સપ્ટેમ્બરે વધુ સુનાવણી રાખીને એડવોકેટ જનરલને હાજર રહેવા આદેશ કર્યો છે.

આ ભરતી પ્રક્રિયાને 50 ઉમેદવારો દ્વારા હાઇકોર્ટમાં ચેલેન્જ કરવામાં આવી છે. જેની સુનાવણી દરમિયાન એડવોકેટ રાહુલ શર્માએ હાઈકોર્ટ સમક્ષ રજૂઆત કરી હતી. જે રજૂઆત અને કાગળિયા જોઈને હાઈકોર્ટે પ્રાથમિક રીતે કહ્યું હતું કોઈ ચોક્કસ વ્યક્તિઓને ગોઠવવા માટેની ગોઠવણ લાગી રહી છે. હાઇકોર્ટે આ બાબતે એડવોકેટ જનરલને કેસમાં ઉપસ્થિત રહેવા સરકારી વકીલને આદેશ કર્યો છે.

અરજદારોએ ભરતી પ્રક્રિયા પર રોક લગાવવા અને નવેસરથી પરીક્ષા લેવા માંગ કરી છે. અરજીમાં રાજ્ય સરકાર અને આરોગ્ય વિભાગને પક્ષકાર બનાવાયા છે. અરજદારોનું કહેવું છે કે, ગુજરાતી ન જાણતા લોકો પણ સહેલાઇથી પરીક્ષા પાસ કરી શકે તેમ છે. એડવોકેટ જનરલ અન્ય કોર્ટમાં વ્યસ્ત હોવાથી બેન્ચ સમક્ષ ઉપસ્થિત રહી શક્યા નહોતા. તેથી હાઇકોર્ટે વધુ કાર્યવાહી 30 સપ્ટેમ્બરે રાખી છે.

આ પરીક્ષામાં પ્રશ્નપત્ર-1- અને પ્રશ્નપત્ર-2 બે પ્રકારના વિષયોના પ્રશ્નપત્રો હતા. આ પ્રશ્નપત્રોમાં પ્રશ્નોના ક્રમ બદલવાની તેની પેટર્ન એબીસીડી રાખવામાં આવી હતી. આ પેટર્નમાં પ્રશ્નપત્ર-2ના ડી પ્રકારના પ્રશ્નપત્રમાં જવાબ એબીસીડી એટલે કે, પ્રશ્નનંબર-1નો જવાબ એ, પ્રશ્ન-2નો જવાબ બી, પ્રશ્ન-3નો જવાબ સી અને પ્રશ્ન-4નો જવાબ ડી. આ પછી પ્રશ્ન-5નો જવાબ એ, પ્રશ્ન-6નો જવાબ બી, પ્રશ્ન-7નો જવાબ સી અને પ્રશ્ન-8નો જવાબ ડી એમ ક્રમવાર આવે છે.

ઉમેદવારોએ પરીક્ષા બાદ કહ્યું કે, કોઇપણ ઉમેદવાર 12 થી 16 પ્રશ્નો ઉકેલે એટલે તેને ખ્યાલ આવી જાય કે, આમા પેટર્ન એબીસીડી છે એટલે આંખો મીચીને તે તમામ પ્રશ્નોના જવાબ આપી શકે. આ બાબત શંકાસ્પદ છે. આરોગ્ય વિભાગ દ્વારા 9 ફેબ્રુઆરી 2025ના રોજ નર્સિગ ભરતીની પરીક્ષા અંતર્ગત આન્સર કી જાહેર કરવામાં આવતા વિવાદ સર્જાયો હતો.