ગુજરાતમાં નાગરિકોને શુદ્ધ અને ગુણવત્તાયુક્ત આહાર તેમજ દવાઓ મળી રહે તે સુનિશ્ચિત કરવા માટે રાજ્ય સરકાર કટિબદ્ધ છે.
ગુરુવારે વિધાનસભામાં આરોગ્ય રાજ્ય મંત્રી પ્રફુલ્લ પાનશેરિયાએ જણાવ્યું હતું કે, સુરતમાં એક નવી હાઈ-ટેક 'ફૂડ એન્ડ ડ્રગ લેબોરેટરી' સ્થાપવાની પ્રક્રિયા તેજ ગતિએ ચાલી રહી છે. આ લેબોરેટરી કાર્યરત થવાથી રાજ્યમાં ભેળસેળ વિરોધી અભિયાન વધુ મજબૂત બનશે.
₹50 કરોડનું બજેટ
આ પ્રોજેક્ટ માટે કુલ ₹50 કરોડનો ખર્ચ અંદાજવામાં આવ્યો છે, જે પૈકી ચાલુ વર્ષના બજેટમાં ₹17 કરોડની ફાળવણી કરવામાં આવી છે. સુરતમાં 2,500 ચોરસ મીટરના પ્લોટ પર છ માળની આ આધુનિક બિલ્ડિંગ તૈયાર કરવામાં આવશે.
આ બિલ્ડિંગમાં બે સ્તરનું બેઝમેન્ટ પાર્કિંગ હશે અને દરેક માળ પર અલગ-અલગ ટેસ્ટિંગ સુવિધાઓ જેવી કે માઇક્રોબાયોલોજી, કેમિકલ અને કોસ્મેટિક ટેસ્ટિંગ માટે લેબોરેટરીઓ બનાવવામાં આવશે.
વડોદરા લેબનું ભારણ ઘટશે
હાલમાં રાજ્યની મોટાભાગની સેમ્પલ ટેસ્ટિંગ કામગીરી વડોદરા સ્થિત સેન્ટ્રલ લેબોરેટરીમાં થાય છે. સુરતની આ લેબ શરૂ થવાથી દક્ષિણ ગુજરાતના સેમ્પલોનું પરીક્ષણ ઝડપથી થઈ શકશે અને વડોદરા લેબ પરનું ભારણ ઘટશે.
મંત્રીએ વધુમાં ઉમેર્યું હતું કે, સુરત ઉપરાંત અમદાવાદ, મહેસાણા, જૂનાગઢ અને વલસાડમાં પણ નવી લેબોરેટરીઓ સ્થાપવા માટે વહીવટી મંજૂરી આપી દેવામાં આવી છે.
નાગરિકોના સ્વાસ્થ્યની રક્ષા
ભૂતકાળમાં રાજ્યના વિવિધ ભાગોમાં જોવા મળેલા ભેળસેળના કિસ્સાઓને ધ્યાનમાં રાખીને આ નિર્ણય લેવામાં આવ્યો છે. આધુનિક સાધનોથી સજ્જ આ લેબોરેટરીઓને કારણે નમૂનાઓનું પરિણામ વહેલું આવશે, જેનાથી દોષિતો સામે તાત્કાલિક કાયદેસરની કાર્યવાહી કરી શકાશે અને જનતાના સ્વાસ્થ્ય સાથે થતા ચેડાં રોકી શકાશે.

શુદ્ધ ખોરાક અને દવાઓ માટે લેબનું નેટવર્ક

અમદાવાદ, મહેસાણા સહિત 4 શહેરોમાં પણ નવી લેબને મંજૂરી: પ્રફુલ્લ પાનશેરિયા

March 13, 2026 | 11:55 IST