BJP નેતાની ફિલ્મી સ્ટાઈલમાં જન્મદિવસની ઉજવણી

નવસારીના વિજલપોર વિસ્તારમાં BJP યુવા મોરચાના પ્રમુખ ભાવેશ પાટીલ ઉર્ફે સોનુએ જાહેર માર્ગ પર જન્મદિવસની ઉજવણી કરતા મોટો નવસારી વિવાદ સર્જાયો છે. આ ઉજવણીનો વીડિયો સોશિયલ મીડિયા પર ઝડપથી વાયરલ થતાં તે ચર્ચાનું કેન્દ્ર બન્યો છે, કારણ કે આ પ્રકારે જાહેર માર્ગ અવરોધિત કરીને ઉજવણી કરવી એ કાયદાનું ઉલ્લંઘન ગણાય છે. પ્રાપ્ત માહિતી મુજબ, ભાજપ નેતા ભાવેશ પાટીલ ઉર્ફે સોનુએ પોતાના જન્મદિવસ નિમિત્તે જાહેર માર્ગની વચ્ચોવચ ફિલ્મી સ્ટાઇલમાં કારમાંથી એન્ટ્રી લીધી હતી. તેમના સમર્થકોની હાજરીમાં તેમણે કેક કટિંગ કર્યું હતું અને મોટી આતશબાજી પણ કરી હતી, જેના કારણે કાયદો અને વ્યવસ્થાની સ્થિતિના ધજાગરા ઉડ્યા હોવાની ચર્ચા શહેરીજનોમાં ચાલી રહી છે.

અસામાજિક તત્ત્વો દ્વારા જાહેરમાં રોડ પર કેક કાપવી

આ સમગ્ર ઘટનાનો વીડિયો સોશિયલ મીડિયા પર ઝડપથી વાયરલ થતાં વિવાદ વધુ ઘેરો બન્યો છે. આ મામલે પોલીસે જણાવ્યું છે કે, 'ઉપરી અધિકારીઓ સાથે ચર્ચા કરીને વાયરલ વીડિયોની તપાસ કરવામાં આવશે અને કાયદેસરની કાર્યવાહી હાથ ધરવામાં આવશે.' ઉલ્લેખનીય છે કે, રાજ્યમાં અગાઉ પણ અસામાજિક તત્ત્વો દ્વારા જાહેરમાં રોડ પર કેક કાપવી અને ફટાકડાં ફોડીને તાયફા કરતા વીડિયો સામે આવતા રહ્યા છે.

આ પણ વાંચો: ચૈતર વસાવા મુદ્દે BJPના સાંસદ-ધારાસભ્ય વચ્ચે વિવાદ

'બિફોર-આફ્ટર'ના વીડિયો બનાવવા

તે સમયે રાજ્યની પોલીસ દ્વારા આવા તત્ત્વોને ઝડપી પાડવામાં આવ્યા છે અને તેમના 'બિફોર-આફ્ટર'ના વીડિયો બનાવીને સોશિયલ મીડિયા પર મૂકી આરોપી પાસે માફી પણ મંગાવવામાં આવી છે. જોકે, હવે બર્થ ડે સેલિબ્રેશનમાં કરવામાં આવતા આ તાયફાઓનો વાયરસ ભાજપના નેતાઓને પણ લાગી ગયો હોય તેવું લાગી રહ્યું છે.

અમિત સિંહ રાજપૂત દ્વારા જન્મદિવસની જાહેરમાં ઉજવણી

તાજેતરમાં સુરતમાં પણ ભાજપના એક નેતા દ્વારા આ જ પ્રકારે કાયદાનું ઉલ્લંઘન કરીને જાહેર રોડ પર જન્મ દિવસની ઉજવણી કરવામાં આવી હતી. લિંબાયત વિસ્તારના ભાજપના કોર્પોરેટર અમિત સિંહ રાજપૂત દ્વારા પણ પોતાના જન્મ દિવસની જાહેરમાં ઉજવણી કરીને પોલીસ કમિશનરના જાહેરનામાનો ભંગ કરતો એક વીડિયો સોશિયલ મીડિયામાં વાઈરલ થયો હતો.