ગુજરાતનો નેશનલ બાસ્કેટબોલ ખેલાડી ડિજિટલ ફ્રોડ ગેંગનો ભાગ

સુરત શહેરમાંથી ચોંકાવનારી ઘટના સામે આવી છે જ્યાં ગુજરાતના નેશનલ લેવલના બાસ્કેટબોલ ખેલાડી પરમવીરસિંહ ડિજિટલ ઠગાઈ કરનારી ગેંગનો સાગરીત હોવાનું સામે આવ્યું છે. પરમવીર છેલ્લા 6 વર્ષથી નેશનલ ખેલાડી તરીકે ગુજરાત તરફથી રમતો હતો, પરંતુ આંતરરાષ્ટ્રીય પસંદગી ન થતાં, તેણે ડિજિટલ ફ્રોડની દિશામાં પગલાં લીધા હતા.

ક્રાઈમ બ્રાંચે 3 આરોપીઓને ઝડપી પાડ્યા છે જેમણે વૃદ્ધને "ડિજિટલ અરેસ્ટ" કરીને 16.65 લાખ રૂપિયા પડાવ્યા હતા. આરોપીઓ સ્પૂફ્ડ વીડિયો કોલ દ્વારા પોતાને દિલ્હી પોલીસ અધિકારી તરીકે ઓળખાવતા અને આરોપો લગાવીને ડરાવતા હતા. તેઓ વિવિધ રાજ્યોના લોકો પાસેથી પણ મોટી રકમ પડાવી ચુક્યા છે.

ફ્રોડ માટે પરમવીર અન્ય લોકોના બેંક ખાતાઓ ભાડે લેતો હતો અને પૈસા ટ્રાન્સફર કરાવતો હતો. તેની સામે 18 રાજ્યોમાંથી કુલ 40 ફરિયાદો નેશનલ સાઇબર પોર્ટલ પર નોંધાઈ છે. તેના પાસેથી અનેક ડેબિટ કાર્ડ, ચેકબુક અને રોકડા નાણાં પણ જપ્ત કરાયા છે.