સુરતની આદર્શ પબ્લિક સ્કૂલની પોલ ખુલી, પ્રિન્સીપાલ પણ ભુતિયા શિક્ષક

સુરતના ગોડાદરા વિસ્તારમાં આવેલી આદર્શ પબ્લિક સ્કૂલની ધોરણ આઠ ની વિદ્યાર્થીની દ્વારા આપઘાત કરવાની ઘટનાએ ચકચાર મચાવી દીધી છે. સ્કૂલ ફી ન ભરી હોવાથી ત્રાસ આપવામાં આવતા વિદ્યાર્થીનીએ આપઘાત કર્યો હોવાના આક્ષેપો થયા હતા. ત્યારબાદ ડીઈઓ કચેરી દ્વારા કમિટી બનાવીને તપાસ કરવામાં આવી હતી. બે દિવસની તપાસ બાદ રિપોર્ટ ડીઓને સબમિટ કરી દેવામાં આવ્યો છે. જોકે આ તપાસમાં સ્કૂલની અન્ય પોલ ખુલી ગઈ છે. બંગલામાં શાળા, ભુતીયા પ્રિન્સિપાલ સહિતની બેદરકારી સામે આવી છે અને આ બેદરકારીને લઈને કડક કાર્યવાહી કરવામાં આવશે. 

સુરતના ગોડાદરામાં બે દિવસ ધોરણ આઠની ભાવના રાજેશભાઈ ખટીક નામની વિદ્યાર્થીનીએ ગળે ફાંસો ખાઈ જીવન ટૂંકાવ્યું હતું. આ મામલે વિદ્યાર્થીનીના પરિવારજનોએ આદર્શ પબ્લિક સ્કૂલ પર ગંભીર આક્ષેપ લગાવતા કહ્યું હતું કે અમે ફી ન ભરી હતી તેથી મારી દીકરી સાથે ઓરમાયુ વર્તન કરવામાં આવ્યું હતું અને તેને પરીક્ષા આપવા દેવામાં આવી ન હતી. જો કે શાળા પરિવાર દ્વારા આ મામલે ખુલાસો આપતા કહેવામાં આવ્યુ હતું કે અમે વિદ્યાર્થીને ફી મામલે ક્યારે વાત કરી નથી અમે સીધી વાલીઓ સાથે જ વાત કરીએ છીએ. પરિવારજનો જ વિદ્યાર્થીનીને શાળાએ મોકલતા ન હતા.

જોકે, આ મામલે જીલ્લા શિક્ષણ અધિકારીએ વર્ગ-2 અને વર્ગ-3 ના પાંચ અધિકારીઓની તપાસ ટીમ બનાવી આ મામલે તપાસ હાથ ધરી હતી. બે દિવસની તપાસ બાદ રિપોર્ટ બનાવી ડીઈઓને સબમિટ કરી દેવામાં આવ્યો છે. હવે આ રિપોર્ટ સ્ટડી કરી આગળની કાર્યવાહી કરવામાં આવશે.

ડીઈઓ કચેરીની ટીમ દ્વારા તપાસ કરવામાં આવતા આદર્શ પબ્લિક સ્કૂલની અન્ય પોલ ખુલી ગઈ હતી. આ સ્કૂલ એક બંગલામાં ચાલતી હોવાની સૌથી પહેલી બેદરકારી સામે આવી હતી. આ સાથે જ સ્કૂલના પ્રિન્સિપાલ પણ ભુતીયા હોવાનું સામે આવ્યું છે. આદર્શ પબ્લિક સ્કૂલમાં ઇમર્જન્સી દાદર નથી. સ્કૂલ પાસે પોતાનું રમતગમતનું મેદાન પણ નથી. જેના પગલે રમતગમત સહિતના અન્ય કાર્યક્રમો રોડ પણ કરે છે. સ્કૂલમાં જ યુનિફોર્મનું વેચાણ કરવામાં આવતું હતું. સ્કૂલમાં ટોયલેટ સહિતની જે પ્રાથમિક સુવિધાઓ હોવી જોઈએ તે નથી. આ તમામ બેદરકારીઓને લઈને ડિઇઓ દ્વારા કડક કાર્યવાહી કરવામાં આવશે.