મોરારીબાપુએ આપ્યું નિવેદન, સનાતન ધર્મની વિરુદ્ધ બોલનારાઓ......

સ્વામિનારાયણ સંપ્રદાય દ્વારા અવાર નવાર હિન્દુ દેવીદેવતાઓ બાબતે કરાતી અપમાનજનક ટિપ્પણી અંગે કથાકાર મોરારીબાપુનું પણ નિવેદન આવ્યું છે. તેમણે સનાતન ધર્મના દેવીદેવતાઓનું અપમાન કરનારાઓ સામે નામ લીધા વગર આકરા પ્રહાર કર્યા છે. હાલ આર્જેન્ટિનામાં ચાલી રહેલી કથા દરમિયાન તેમણે સનાતન ધર્મના વિરોધીઓ મુદ્દે કડક વલણ અપનાવ્યું હતું. 

પ્રસિદ્ધ કથાકાર મોરારીબાપુએ રામ કથા દરમિયાન સનાતન ધર્મના દેવી દેવતાઓ સામે અવાર નવાર કરાતી ટિપ્પણીઓ અંગે પોતાનું નિવેદન આપ્યું છે. તેમણે કથા દરમિયાન સનાતનના દેવી દેવતાઓનું અપમાન કરનારા સામે પ્રહાર કર્યો હતો. તેમણે કહ્યું કે સનાતન ધર્મના અનુયાયીઓએ 5 દેવોનું પૂજન કરવું જોઇએ. જે સનાતન ધર્મના અનુયાયીઓએ ભગવાન ગણેશ, સૂર્ય , ભગવાન વિષ્ણુ, ભગવાન શંકર, માતા દુર્ગાની પૂજા કરવી જોઇએ અને જે આ 5 દેવોની નિંદા કરે તે સનાતનધર્મી નથી. સાથે સાથે તેમણે એમ પણ કહ્યું કે  આ દેવોની નિંદા કરનારાને સાથ આપનારા પણ સનાતની નથી.

તેમણે એમ પણ કહ્યું કે આ મુદ્દે હું દિલ્હીમાં બોલીશ. ઉલ્લેખનિય છે કે સ્વામિનારાયણ સંપ્રદાયના સાધુના કથિત નિવેદન બાદ સનાતન ધર્મના સાધુ સંતોમાં ભારે રોષ જોવા મળી રહ્યો છે. બુધવારથી કચ્છના કબરાઉ મોગલ ધામના બાપુએ આ પણ આ જ મુદ્દે પોતાનો રોષ વ્યક્ત કરીને ઉપવાસ કર્યા હતા. તેમણે સનાતન ધર્મના દેવીદેવતાઓનું અપમાન કરનારાઓને આતંકવાદી ગણાવ્યા હતા. ભગવાન કૃષ્ણ વિશેના નિવેદન બાદ લોકોમાં પણ ભારે રોષ જોવા મળી રહ્યો છે.