રાજ્યમાં છેલ્લાં ત્રણ દિવસથી અનરાધાર વરસાદ વરસી રહ્યો છે. હવામાન વિભાગની આગાહી મુજબ આ વર્ષે ચોમાસાનું વહેલું આગમન થયુ છે. ચોમાસાનું વહેલું આગમન થતાં છેલ્લાં પાંચ વર્ષ દરમિયાન 18 જૂન સુધીમાં આ વર્ષે સૌથી વધુ વરસાદ નોંધાયો છે. રાજ્યમાં અત્યાર સુધી 10.46 ટકા વરસાદ નોંધાયો છે. ગત વર્ષે 1.54 ટકા વરસાદ થયો હતો. ગત વર્ષની સરખામણીએ 8.92 ટકા વધુ વરસાદ પડ્યો છે. ઉલ્લેખનીય છે કે, વર્ષ 2021માં 3.91 ટકા, વર્ષ 2022માં 2.58 ટકા, વર્ષ 2023માં 9.91 ટકા, વર્ષ 2024માં 1.54 ટકા વરસાદ વરસ્યો હતો.

રાજ્યમાં છેલ્લાં 24 કલાક દરમિયાન 33 જિલ્લાના 227 તાલુકામાં સરેરાશ 22.67 મીમી વરસાદ નોંધાયો છે. જ્યારે 24 તાલુકા કોરાધાકોર રહ્યા છે. 195 તાલુકામાં શૂન્યથી 50 મીમી, 24 તાલુકામાં 51 થી 100 મીમી, 6 તાલુકામાં 101 થી 150 મીમી તેમજ 2 તાલુકામાં 151થી 200 મીમી સુધીનો વરસાદ વરસ્યો છે. સૌથી વધુ બોટાદ જિલ્લાના બરવાળામાં 191 મીમી, સુરેન્દ્રનગરના સાયલામાં 160 મીમી, બોટાદમાં 138 મીમી, સુરેન્દ્રનગરના મૂળીમાં 135 મીમી અને જામનગરના જોડિયામાં 133 મીમી વરસાદ ખાબક્યો છે. રાજ્યમાં અત્યાર સુધી સરેરાશ 92 મીમી વરસાદ એટલે કે 10.46 ટકા વરસાદ નોંધાયો છે.

રાજ્યમાં અત્યાર સુધી 86 તાલુકામાં શૂન્યથી 50 મીમી, 111 તાલુકામાં 51 થી 125 મીમી, 39 તાલુકામાં 126 થી 250 મીમી અને 15 તાલુકામાં 251 થી 500 મીમી સુધીનો વરસાદ ખાબકી ચૂક્યો છે. રાજ્યમાં ઝોન વાઈઝ સરેરાશ વરસાદની વાત કરીએ તો અત્યાર સુધી કચ્છમાં 84.80 મીમી, ઉત્તર ગુજરાતમાં 41.31 મીમી, મધ્ય ગુજરાતમાં 78.59 મીમી, સૌરાષ્ટ્રમાં 143.40 મીમી અને દક્ષિણ ગુજરાતમાં 81.15 મીમી વરસાદ પડી ચૂક્યો છે.

રાજ્યમાં 11 ડેમ હાઈએલર્ટ પર

રાજ્યમાં કુલ 206 ડેમ પૈકી 9 ડેમ 100 ટકા ભરાઈ ગયા છે. 25 ડેમ 70 થી 100 ટકા વચ્ચે, 22 ડેમ 50 થી 70 ટકા વચ્ચે, 55 ડેમ 25 થી 50 ટકા વચ્ચે અને 95 ડેમમાં 25 ટકાથી નીચે પાણી છે. 206 ડેમમાંથી હાલ 11 ડેમ હાઈએલર્ટ ઉપર છે. 13 ડેમ એલર્ટ ઉપર છે અને 10 ડેમ વોર્નીંગ લેવલ ઉપર છે. ગુજરાતની જીવાદોરી નર્મદા ડેમની વાત કરીએ તો ઉપરવાસ મધ્યપ્રદેશમાં સારો વરસાદ થતાં દર કલાકે 22830 ક્યુસેક પાણીની આવક થઈ રહી છે. જ્યારે 20992 ક્યુસેક પાણી નર્મદા કેનાલમાં છોડવામાં આવી રહ્યું છે. હાલ ડેમની ભયજનક સપાટી 454.98 ફૂટની સામે 392.78 ફૂટ પાણી ભરાયુ છે. એટલે કે 51.56 ટકા ડેમ ભરાયો છે. અમરેલીનો ધાતરવાડી અને સુરજવાડી, ભાવનગરનો રોજકી, બાગડ, રંઘોળા અને શેત્રુંજી, બોટાદનો ભીમદાદ, સુરેન્દ્રનગરના વણસાલ, લીમ-ભોગાવો-1, સબુરી અને ધોળીધજા ડેમ હાઈ એલર્ટ ઉપર મૂકાયા છે. રાજ્યમાં 15 નદીઓ અને 4 ડેમ ઓવરફ્લો થઈ ગયા છે.

ભારે વરસાદના કારણે 584 લોકોનું સ્થળાંતર

રાજ્યમાં પડી રહેલા મુશળાધાર વરસાદના કારણે અત્યાર સુધી 584 લોકોનું સલામત સ્થળે સ્થળાંતર કરવામાં આવ્યુ છે. જેમાં બોટાદ જિલ્લામાં 40, અમરેલી જિલ્લામાં 80 અને ભાવનગર જિલ્લામાં 464 લોકોનું સ્થળાંતર કરવામાં આવ્યુ છે. જ્યારે બોટાદમાં 2, ભાવનગરમાં 49 અને અમરેલીમાં 69 મળી કુલ 120 લોકોનું રેસ્કયૂ કરવામાં આવ્યુ છે. રાજ્યમાં NDRFની 12 તેમજ SDRFની 19 ટીમો સ્ટેન્ડ બાય રાખવામાં આવી છે. ભારે વરસાદની આગાહીના પગલે માછીમારોને 18 થી 21 જૂન દરમિયાન દરિયો નહી ખેડવા હવામાન વિભાગે ચેતવણી આપી છે.

રાજ્યમાં 241 ગામડામાં વીજ પુરવઠો ખોરવાયો

જીયુવીએનએલના સૂત્રોના જણાવ્યા અનુસાર રાજ્યના 12,953 ગામડામાં વીજ પુરવઠાને અસર થઈ હતી. જેમાં 12,712 ગામડામાં વીજ પુરવઠો પૂર્વવત કરી દેવામાં આવ્યો છે. જ્યારે હજુ પણ 241 ગામડામાં વીજ પુરવઠો ખોરવાયો છે. રાજ્યમાં 16,164 ફીડરને અસર પહોંચી હતી. જેમાંથી 14,930 ફીડર રીપેર કરી દેવામાં આવ્યા છે. જ્યારે 1,234 ફીડર પૂર્વવત કરવાની કામગીરી ચાલુ છે. ભારે વરસાદમાં 16,511 વીજ થાંભલાને નુકસાન થયુ હતુ. તે પૈકી 15,932 વીજ થાંભલા રીપેર કરવામાં આવ્યા છે. જ્યારે 579 વીજ થાંભલા હજુ પણ રીપેર કરવાના પેન્ડીંગ છે. 886 ટ્રાન્સફોર્મરને નુકસાન થયુ હતુ તે પૈકી 861 ટ્રાન્સફોર્મર રીપેર કરી દેવામાં આવ્યા છે. જ્યારે 25 ટ્રાન્સફોર્મર હજુ પેન્ડીંગ છે.

રાજ્યમાં હજુ પણ 189 રસ્તા બંધ

ભારે વરસાદના કારણે રાજ્યમાં માર્ગ અને મકાન વિભાગ હસ્તકના સ્ટેટ હાઈવે અને ગામડાના રસ્તાને નુકસાન થયુ હતુ. 13 સ્ટેટ હાઈવે, 35 અન્ય રોડ અને 153 પંચાયતના માર્ગોને નુકસાન થયુ હતુ. તે પૈકી 3 સ્ટેટ હાઈવે, 10 અન્ય માર્ગ રીપેર કરી પૂર્વવત કરી દેવામાં આવ્યા છે. જ્યારે 10 સ્ટેટ હાઈવે, 25 અન્ય માર્ગ અને 153 પંચાયતના રસ્તા બંધ કરવામાં આવ્યા છે. ભારે વરસાદના કારણે ગુજરાત માર્ગ વાહન વ્યવહાર નિગમની સરકારી બસોના 30 રૂટની 97 ટ્રીપો બંધ કરવામાં આવી છે.

રાજ્યના 4 જિલ્લા ઓરેન્જ અને 9 જિલ્લા યલો એલર્ટ પર

હવામાન વિભાગે 19 જૂને આપેલી ભારે વરસાદની આગાહીના પગલે રાજ્યના 4 જિલ્લા સુરત, નવસારી, ડાંગ અને વલસાડ યલો એલર્ટ ઉપર છે. જ્યારે ગીર સોમનાથ, અમરેલી, ભાવનગર, ભરૂચ, તાપી, સાબરકાંઠા, અરવલ્લી, મહીસાગર અને દાહોદ જિલ્લામાં યલો એલર્ટ અપાયું છે.

June 18, 2025 | 19:54 IST