માર્ચમાં મે જેવો તાપ: ગુજરાતમાં પારો 39 ડિગ્રી પાર

ગુજરાતમાં આ વર્ષે ઉનાળાએ જાણે સમય પહેલા જ રૌદ્ર સ્વરૂપ ધારણ કરી લીધું છે. માર્ચ મહિનાના શરૂઆતના દિવસોમાં જ તાપમાનનો પારો 39 ડિગ્રીની નજીક પહોંચી જતાં રાજ્યભરમાં કાળઝાળ ગરમીનો અનુભવ થઈ રહ્યો છે.

હવામાન વિભાગે આગામી દિવસોમાં હીટવેવના દિવસોની સંખ્યા વધવાની અને દરિયાકાંઠાના વિસ્તારોમાં ભેજવાળી ગરમીથી અકળામણ થવાની આગાહી કરી છે.

રાજકોટ રાજ્યનું સૌથી ગરમ શહેર

હવામાન વિભાગના આંકડા મુજબ, સૌરાષ્ટ્ર અને ઉત્તર ગુજરાતમાં ગરમીનું જોર સૌથી વધુ જોવા મળ્યું છે. રાજકોટમાં મહત્તમ તાપમાન 39.2 ડિગ્રી સેલ્સિયસ નોંધાયું હતું, જે રાજ્યમાં સૌથી વધુ છે.

જ્યારે અમદાવાદ, ગાંધીનગર અને અમરેલી જેવા શહેરોમાં પણ પારો 38 ડિગ્રીની આસપાસ રહ્યો હતો. અમદાવાદમાં આગામી દિવસોમાં તાપમાન 39 થી 40 ડિગ્રી સુધી પહોંચવાની શક્યતા છે.

ગરમી અને બફારાનો ડબલ એટેક

દક્ષિણ ગુજરાતના સુરતમાં આજે મહત્તમ તાપમાન 37.9 ડિગ્રી નોંધાયું હતું, પરંતુ હવામાં 80% જેટલો ઉંચો ભેજ હોવાને કારણે શહેરીજનોએ ભારે બફારો અનુભવ્યો હતો.

પવનની ગતિ ઓછી રહેતા પરસેવાથી તરબતર થયેલા લોકોએ બપોરના સમયે એસી અને પંખાનો આશરો લેવો પડ્યો હતો.

'ડબલ સીઝન'થી સાવધાન

હાલમાં ગુજરાત 'બેવડી ઋતુ'નો સામનો કરી રહ્યું છે. વહેલી સવારે લઘુત્તમ તાપમાન 20 ડિગ્રીની આસપાસ રહેતા ગુલાબી ઠંડીનો અનુભવ થાય છે, જ્યારે બપોરે પારો 38 ડિગ્રીને વટાવી જાય છે.

તાપમાનમાં આવતા આ મોટા તફાવતને કારણે વાયરલ ઇન્ફેક્શન, શરદી-ઉધરસ અને ડિહાઇડ્રેશનના કેસોમાં સતત વધારો થઈ રહ્યો છે. આરોગ્ય નિષ્ણાતોએ બપોરે 12થી 4 વાગ્યા દરમિયાન સીધા તડકામાં જવાનું ટાળવા અને વધુમાં વધુ પાણી પીવાની સલાહ આપી છે.

આગામી આગાહી

હવામાન વિભાગના જણાવ્યા અનુસાર, 11 માર્ચ સુધી રાજ્યમાં હવામાન સૂકું રહેશે. જો પશ્ચિમી પવનો ફૂંકાશે તો તાપમાનમાં હજુ પણ 1 થી 2 ડિગ્રીનો વધારો થઈ શકે છે. દરિયાકાંઠાના વિસ્તારો જેમ કે વેરાવળ, દમણ અને દીવમાં પણ ભેજને કારણે ગરમી વધુ વર્તાશે.