ઉત્તર ગુજરાત યુનિવર્સિટીની ગંભીર બેદરકારી : ગત વર્ષનું બેઠે બેઠું પેપર પૂછાયું

સુરેશ વણોલ, અમદાવાદ

પાટણની હેમચંદ્રાચાર્ય ઉત્તર ગુજરાત યુનિવર્સિટીમાં વધુ એક છબરડો સામે આવ્યો છે. યુનિવર્સિટી દ્વારા લેવામાં આવેલી LLB સેમેસ્ટર-4ની પરીક્ષામાં ન્યાયશાસ્ત્રના પેપરમાં ઘોર બેદરકારી જોવા મળી છે. ન્યાયશાસ્ત્રનું વર્ષ 2024નું પેપર આ વર્ષે પણ બેઠે બેઠું પૂછાયું છે. વિદ્યાર્થી નેતા યુવરાજસિંહ જાડેજાએ સમગ્ર મામલાનો પર્દાફાશ કરી યુનિવર્સિટીના સત્તાધીશોની કામગીરી સામે સવાલ ઉઠાવ્યા છે. 

વિદ્યાર્થી નેતા યુવરાજસિંહ જાડેજાના મતે, વર્ષ 2024માં લેવાયેલું ન્યાયશાસ્ત્રનું પેપર આ વર્ષે પણ બેઠે બેઠું પૂછવામાં આવ્યું છે. એટલું જ નહીં, પેપર ઉપર માર્ચ-2024, સમય તેમજ પ્રશ્ન ક્રમાંકમાં કોઈપણ જાતનો ફેરફાર કરવામાં આવ્યો નથી. પાટણની શેઠ એમ.એન. લો કોલેજ અને ઉંઝાની લો કોલેજમાં પરીક્ષાર્થીઓને આપવામાં આવેલા પેપરમાં આ છબરડો થયો હતો. યુનિવર્સિટીના સત્તાધીશો અને પરીક્ષા નિયામકે પેપરને તપાસવાની તસ્દી લીધી ન હોય તેમ લાગી રહ્યું છે. 

પાટણની શેઠ એમ.એન. લો કોલેજ અને ઊંઝાની લો કોલેજના વિદ્યાર્થીઓને આપવામાં આવેલા પેપરમાં ભૂલ જોવા મળી હતી. વિદ્યાર્થીઓએ જોયું કે આ તો ગયા વર્ષનું જ પેપર આપવામાં આવ્યું છે ત્યારે તેઓ ચોંકી ગયા હતા. વિદ્યાર્થી નેતા યુવરાજસિંહ જાડેજાએ છબરડાને સામે લાવીને યુનિવર્સિટીની કામગીરી પર સવાલ ઉઠાવ્યા છે. આ ઘટના યુનિવર્સિટીની પરીક્ષા પ્રણાલીની વિશ્વસનીયતા પર મોટો પ્રશ્ન ઊભો કરે છે અને વિદ્યાર્થીઓના ભવિષ્ય સાથે ચેડાં થયા હોવાનું સ્પષ્ટપણે દેખાય છે. હવે જોવાનું એ રહે છે કે યુનિવર્સિટી આ મામલે શું કાર્યવાહી કરે છે. 

રાજકોટની એજન્સીનો છબરડો, વિદ્યાર્થી નેતાએ કર્યો ખુલાસો...

વિદ્યાર્થી નેતા યુવરાજસિંહે જણાવ્યું કે, રાજકોટની #INFINITY_INFOWAY_LIMITED નામની એજન્સીએ ઓનલાઈન પેપર અપલોડ કરવામાં ભૂલ કરી છે. ગયા વર્ષનું પેપર આ વર્ષે પૂછાઈ ગયું, જેના કારણે વિદ્યાર્થીઓમાં ભારે રોષ જોવા મળી રહ્યો છે. વિદ્યાર્થી નેતાએ વધુમાં કહ્યું કે, આને જાણીજોઈને કરેલું કૃત્ય ગણાવ્યું છે અને એજન્સીને તાત્કાલિક #બ્લેક_લિસ્ટ કરવાની માંગ કરી છે. જ્યારે પરીક્ષા પછી પેપર વેબસાઈટ પરથી ગાયબ થઈ જાય છે, તો 2024 નું પેપર કેવી રીતે ઉપલબ્ધ થયું? આ ઘટના એજન્સી અને વેબસાઈટની સુરક્ષા પર સવાલ ઉભા કરે છે. વિદ્યાર્થીઓએ આ મામલે તાત્કાલિક તપાસ અને કાર્યવાહીની માંગ કરી છે. એજન્સીની ભૂલનો ભોગ વિદ્યાર્થીઓ બની રહ્યા છે, જે યોગ્ય નથી.