Lunawada માં નામકરણનો વિવાદ, ભાજપના નિર્ણયથી રાજકારણ ગરમાયું...

મહીસાગર જિલ્લાના લુણાવાડા (Lunawada) નગરના 592 માં સ્થાપના દિવસે, નગરપાલિકા દ્વારા બે મહત્વપૂર્ણ સ્થળોના નામ બદલવામાં આવતાં શહેરીજનોમાં ચોંકાવનારી પ્રતિક્રિયા જોવા મળી હતી. વર્ષોથી એક જ રાજકીય પક્ષની સરકાર અને નગરપાલિકામાં સત્તા સ્થાને હોવા છતાં, આ સ્થળોના નામોમાં કોઈ ફેરફાર કરવામાં આવ્યો ન હતો. પરંતુ, અચાનક અને કોઈ સ્પષ્ટ કારણ વિના આ નામો બદલવામાં આવતાં સ્થાનિકોમાં અચરજ અને અસંતોષ ફેલાયો છે.

ભાજપ શાસિત નગરપાલિકાએ લુણાવાડા (Lunawada) નગરમાં કોંગ્રેસના પૂર્વ વડાપ્રધાનોના નામે ઓળખાતા સ્થળોના નામોમાં પરિવર્તન કર્યું છે. જવાહર બાગનું નામ બદલીને 'વખત બાગ' કરવામાં આવ્યું છે, જ્યારે ઇન્દિરા મેદાનનું નામ બદલીને 'આઝાદ મેદાન' કરવામાં આવ્યું છે. આ ફેરફારોએ સ્થાનિક રાજકારણમાં વિવાદ અને ચર્ચા જગાવી છે.

ઇતિહાસની વાત કરીએ તો, જવાહર બાગને પહેલાં 'વિક્ટોરિયા જ્યુબિલી ગાર્ડન' તરીકે ઓળખવામાં આવતું હતું. ત્યારબાદ, આ બાગનું નામ 'જવાહર બાગ' રાખવામાં આવ્યું હતું. અને હવે, અચાનક તેનું નામ બદલીને 'વખત બાગ' કરવામાં આવ્યું છે. આ જ રીતે, ઇન્દિરા મેદાનનું નામ પણ બદલીને 'આઝાદ મેદાન' કરવામાં આવ્યું છે.

બંને સ્થળોના નામમાં એકાએક કરવામાં આવેલા આ ફેરફારોએ નગરજનોને અચંબિત કરી દીધા છે. સ્થાનિક લોકો આ અણધાર્યા નિર્ણય પાછળના કારણો જાણવા માટે આતુર છે. આ ઘટનાએ સ્થાનિક રાજકારણમાં તીવ્ર ચર્ચા અને વિરોધને જન્મ આપ્યો છે. આ ફેરફારોને લઈને વિવિધ રાજકીય પક્ષો અને નાગરિકો વચ્ચે મતભેદ જોવા મળી રહ્યા છે. લોકો આ નિર્ણયને રાજકીય પ્રેરિત માની રહ્યા છે અને આ ફેરફારો પાછળ કોઈ નક્કર કારણ ન હોવાનો આક્ષેપ કરી રહ્યા છે. આ ઘટનાએ લુણાવાડા (Lunawada) નગરની રાજકીય સ્થિતિને જટિલ બનાવી દીધી છે અને આગામી સમયમાં આ મુદ્દો વધુ ગરમાવો પકડે તેવી શક્યતા છે.