લો..હવે યુનિવર્સિટી પણ નકલી...

ગુજરાતમાં નકલી ચીજોની ભરમાળ જોવા મળી રહી છે ત્યારે હવે પાટણમાં નકલી યુનિવર્સિટી ચાલતી હોવાનો સનસનીખેજ આરોપ પાટણના ધારાસભ્ય કિરીટ પટેલે લગાવ્યો છે. તેમણે આરોપ લગાવતાં કહ્યું છે કે પાટણની એમ.કે.યુનિવર્સિટી યુજીસીના ધારાધોરણ મુજબ ચાલતી નથી. યુનિવર્સિટીના સ્થળે્ કૃષિ ગોડાઉન ચાલતું હોવાનો તેમણે આરોપ લગાવ્યો છે. તેમણે સમગ્ર કૌંભાડની સીઆઇડી ક્રાઇમ દ્વારા તપાસ કરાવાની માગ કરી છે. 

કિરીટ પટેલે સમગ્ર મામલે સરકારના મંત્રી ઋષિકેશ પટેલને પત્ર લખ્યો છે. તેમણે પત્રમાં આરોપ લગાવ્યો કે વર્ષ 2023માં કેન્દ્ર સરકારે મંજૂર કરેલી એમ.કે.યુનિવર્સિટી નિયત સરનામા એડ્રેસના બદલે અન્ય સ્થળે ચાલે છે. યુજીસી એ જ્યારે મંજૂરી આપી ત્યારે  આ યુનિવર્સિટીનું સરનામું હનુમાનપુરા દર્શાવાયું છે જ્યારે આ સ્થળે માત્ર યુનિવર્સિટીનું બોર્ડ લગાવેલું છે. જ્યાં એક ખેતર આવેલું છે. યુનિવર્સિટીનું બિલ્ડીંગ દર્શાવાયું છે ત્યાં ખેતપેદાશના ગોડાઉન જેવું છે. 

તેમણે ઋષિકેશ પટેલને રજૂઆત કરી હતી કે એમ.કે.યુનિવર્સિટીનો સોદો કરી દેવાયો છે અને રાજસ્થાનની સનરાઇઝ યુનિવર્સિટી ના માલિક જીતેન્દ્ર યાદવને આ યુનિવર્સિટી વેચી દેવાઇ છે. જીતેન્દ્ર યાદવ નકલી ડિગ્રી કૌંભાડમાં હાલ રાજસ્થાનની જેલમાં છે. હાલ માતરવાડીમાં એમ.કે.યુનિવર્સિટીની બિલ્ડીંગ દર્શાવાઇ છે જ્યાં એક પણ વિદ્યાર્થી અભ્યાસ કરતો નથી. યુનિવર્સિટીમાં અધ્યાપક સહિત કોઇ સ્ટાફની સુવિધા નથી. તેમણે આ મામલે સીઆઇડી ક્રાઇમ દ્વારા તપાસ કરાવાની માગ કરી છે.