<p dir="auto">ભરૂચ જિલ્લાના જંબુસર તાલુકાના આસરસા ગામ નજીક શનિવારે (6 ડિસેમ્બર) સાંજે આસરસા ખાડીમાં ONGCના ઓઇલ-ગેસ સર્વે માટે જઈ રહેલી બોટ અચાનક પલટી મારી ગઈ હતી. આ દુર્ઘટનામાં બોટ માલિક રોહિતભાઈ વસાવાનું મોત થયું છે, જ્યારે એક શ્રમિક નરેશ રાઠોડ (ઉં.વ. આશરે 30) હજુ લાપતા છે. બાકીના 23 શ્રમિકોને સ્થાનિક માછીમારો અને ગામલોકોએ સુરક્ષિત બહાર કાઢ્યા છે.</p>
<h4 dir="auto">કેવી રીતે થઈ દુર્ઘટના?&nbsp;</h4>
<ul dir="auto">
<li>બોટ આસરસા ખાડીના કિનારેથી માત્ર 50-60 મીટર દૂર ઊભી હતી.</li>
<li>શ્રમિકોને ટ્રેનિંગ આપવા બોટમાં ચઢાવવામાં આવ્યા હતા.</li>
<li>અચાનક ભરતીનું પાણી આવતાં બધા શ્રમિકો એક જ બાજુએ ભેગા થઈ ગયા.</li>
<li>બોટનું બેલેન્સ બગડ્યું અને માત્ર <strong>5-7 સેકન્ડમાં</strong> બોટ ઊંધી વળી ગઈ.</li>
<li>બોટ માલિક રોહિતભાઈ કેબિનમાં ફસાઈ ગયા અને બોટ નીચે દબાઈ જતાં તેમનું મોત થયું.</li>
<li>લાઇફ જેકેટ ન પહેરનાર નરેશ રાઠોડ પાણીના પ્રવાહમાં તણાઈ ગયા.</li>
</ul>
<h4 dir="auto">બચાવ કામગીરી</h4>
<ul dir="auto">
<li>ઘટના સ્થળે સ્થાનિક માછીમારો અને ગામના યુવાનોએ તુરંત બચાવ કામગીરી શરૂ કરી.</li>
<li>23 શ્રમિકોને સુરક્ષિત બહાર કાઢી જંબુસર રેફરલ હોસ્પિટલમાં સારવાર અપાઈ.</li>
<li>રોહિતભાઈનો મૃતદેહ બોટમાંથી બહાર કાઢવામાં આવ્યો.</li>
<li>લાપતા નરેશ રાઠોડની શોધખોળ માટે કોસ્ટ ગાર્ડ અને સ્થાનિક પોલીસ-ફાયર બ્રિગેડની ટીમો રવહેલી સવારથી કામે લાગી છે.</li>
</ul>
<h4 dir="auto">પ્રત્યક્ષદર્શીઓના નિવેદન</h4>
<p dir="auto">મૃતક રોહિતભાઈના પુત્ર પ્રતીક વસાવાએ જણાવ્યું: &ldquo;પાણીની ભરતી આવી એટલે એકસાથે 50-60 લોકો બોટમાં ચઢી ગયા. કોઈએ લાઇફ જેકેટ પણ નહોતા પહેર્યા. બોટ એક તરફ નમી અને પલટી ગઈ. મારા પિતા કેબિનમાં ફસાઈ ગયા.&rdquo;</p>
<p dir="auto">બચી ગયેલા શ્રમિક ગોપાલ દાસે કહ્યું: &ldquo;અમે લંગર લેવાની તૈયારી કરી રહ્યા હતા, એટલામાં બોટ હલવા લાગી અને 5-7 સેકન્ડમાં જ ઊંધી વળી ગઈ.&rdquo;</p>
<h4 dir="auto">પ્રોજેક્ટની પૃષ્ઠભૂમિ</h4>
<ul dir="auto">
<li>ONGCએ અરબી સમુદ્રમાં ઓઇલ-ગેસ સર્વે માટે એશિયન એનર્જી સર્વિસિસ લિમિટેડને કોન્ટ્રાક્ટ આપ્યો છે.</li>
<li>કંપનીએ આસરસા ગામની 19 બોટ ભાડે લીધી છે.</li>
<li>નવા શ્રમિકોને ટ્રેનિંગ આપવા શનિવારે પહેલી વખત બોટમાં ચઢાવવામાં આવ્યા હતા.</li>
</ul>
<p dir="auto">જંબુસરના ધારાસભ્ય દેવકુમારસિંહ (ડી.કે.) સ્વામી ઘટના બાદ હોસ્પિટલ પહોંચ્યા અને બચાવ કામગીરીનું નિરીક્ષણ કર્યું.પોલીસે આકસ્મિક મોતનો ગુનો નોંધી વધુ તપાસાત હાથ ધરી છે. લાપતા નરેશ રાઠોડની શોધખોળ ચાલુ છે.</p>

દરિયાકાંઠે બોટ પલટી

બોટ માલિકનું મોત, એક શ્રમિક હજુ લાપતા, 23ને સુરક્ષિત બચાવાયા

December 7, 2025 | 16:33 IST