ગુજરાત યુનિવર્સિટીના હોસ્ટેલમાંથી દારૂની બોટલો મળી

રાજ્યની પ્રતિષ્ઠિત ગુજરાત યુનિવર્સિટી ફરી એકવાર નકારાત્મક કારણોસર ચર્ચામાં આવી છે. યુનિવર્સિટી કેમ્પસમાં આવેલી હોસ્ટેલના ધાબા પરથી વિદેશી દારૂની ખાલી બોટલો મળી આવતા શૈક્ષણિક આલમમાં ચકચાર મચી ગઈ છે. આ ઘટનાએ યુનિવર્સિટીના સુરક્ષા તંત્ર અને વહીવટ પર ગંભીર સવાલો ઉભા કર્યા છે.

મોડી રાત્રે તપાસમાં ભાંડો ફૂટ્યો : 

ઘટનાની વિગત એવી છે કે, 27મી જાન્યુઆરી 2026ની મોડી રાત્રે હોસ્ટેલના D-બ્લોક વિસ્તારમાં તપાસ હાથ ધરવામાં આવી હતી. આ દરમિયાન બ્લોકના ધાબા પરથી મોંઘા વિદેશી દારૂની ખાલી બોટલોનો મોટો જથ્થો મળી આવ્યો હતો. બોટલોની સંખ્યા જોતા એવું સ્પષ્ટ જણાય છે કે અહીં લાંબા સમયથી દારૂની મહેફિલો જામતી હતી. અગાઉ પણ જ્યારે ઉચ્ચ અધિકારીઓ અને મંત્રીઓએ મુલાકાત લીધી હતી, ત્યારે આવી જ સ્થિતિ જોવા મળી હતી, જે સાબિત કરે છે કે ભૂતકાળની ઘટનાઓમાંથી કોઈ બોધપાઠ લેવાયો નથી.

સુરક્ષા અને વહીવટી તંત્રની નિષ્ફળતા : 

હોસ્ટેલ કેમ્પસમાં 24 કલાક સિક્યુરિટી ગાર્ડ્સ અને વોર્ડનની હાજરી હોવા છતાં, પ્રતિબંધિત વસ્તુઓ અંદર કેવી રીતે પહોંચી તે એક મોટો રહસ્ય છે. શું આમાં વિદ્યાર્થીઓ સામેલ છે કે બહારના તત્વો, તેની તપાસ થવી અનિવાર્ય છે. સત્તાધીશોની નાક નીચે ચાલતી આવી પ્રવૃત્તિઓએ યુનિવર્સિટીની ગરિમાને ઠેસ પહોંચાડી છે.

લોકોમાં ભારે આક્રોશ : 

સોશિયલ મીડિયા અને શૈક્ષણિક વર્તુળોમાં આ ઘટનાને લઈને ભારે રોષ જોવા મળી રહ્યો છે. વાલીઓ અને નાગરિકો એવી માંગ કરી રહ્યા છે કે હોસ્ટેલના વહીવટી તંત્ર સામે કડક પગલાં લેવામાં આવે અને જે કોઈ પણ આ મહેફિલોમાં સામેલ હોય તેમની સામે કાયદેસરની કાર્યવાહી કરવામાં આવે જેનાથી આગામી દિવસોમાં યુનિવર્સિટી સત્તાધીશો આ મામલે શું સ્પષ્ટતા કરે છે તે જોવું રહેશે.