વીજપોલ વળતર મુદ્દે કિસાન સંઘનું સરકારને અલ્ટીમેટમ!

Farmers' anger amidst Vibrant Gujarat:  રાજ્યમાં વિકાસ અને રોકાણના દાવાઓ સાથે વાયબ્રન્ટ ગુજરાતની ચર્ચા ચાલી રહી છે. ત્યારે મોરબી અને જેતપરના ખેડૂતો 12 દિવસથી હક્ક અને ન્યાય માટે ઉપવાસ આંદોલન ચલાવી રહ્યા છે. વીજપોલ સ્થાપન અને જમીનના યોગ્ય વળતર અંગે ખેડૂતોમાં ભારે અસંતોષ જોવા મળી રહ્યો છે. કોંગ્રેસ અને AAP બાદ હવે ભારતીય કિસાન સંઘ મેદાનમાં ઉતર્યું છે. વીજ પોલ મુદ્દે રાજ્ય સરકારને અલ્ટીમેટમ આપી રાજ્યવ્યાપી આંદોલનની ચીમકી ઉચ્ચારી છે.

કિસાન સંઘે સરકાર સામે ઉઠાવ્યા સવાલ
કિસાન સંઘે રાજ્ય સરકાર સામે ખેડૂતોના પ્રશ્નો પ્રત્યે ઉદાસીનતા દાખવવાનો આક્ષેપ કર્યો છે. સંઘના આગેવાનોનું કહેવું છે કે, ગુજરાતે ખેડૂતોના હિત માટે ઐતિહાસિક આંદોલનો જોયા છે. ત્યાં આજે ખેડૂતોને પોતાના હકો માટે દિવસો સુધી ભૂખ્યા રહેવું પડે છે તે ચિંતાજનક સ્થિતિ છે. ખેડૂતોની માંગણીઓનો ઉકેલ લાવવાને બદલે સરકાર અન્ય કાર્યક્રમોમાં વ્યસ્ત હોવાનો કિસાન સંઘે આક્ષેપ કર્યો છે.

'ભાજપ સરકાર ખેડૂતો પ્રત્યે ગંભીર નથી'-કિસાન સંઘ
કિસાન સંઘે રાજ્ય સરકાર પર આક્ષેપ કરતાં જણાવ્યું કે, 'જે ધરતી પર સરદાર પટેલે ખેડૂતો માટે બારડોલી સત્યાગ્રહ કર્યો હતો. તે જ ગુજરાતમાં આજે ખેડૂતોને પોતાના હક્ક માટે 12-12 દિવસ સુધી ભૂખ્યા બેસવું પડે તે શરમજનક બાબત છે. તેમણે આક્ષેપ કર્યો કે, ભાજપ સરકારને તો જાણે ખેડૂતોની કોઈ ચિંતા જ નથી. ખેડૂતોના પ્રશ્નો સાંભળવાને બદલે મંત્રીઓ કાર્યક્રમો અને વીઆઇપી સંસ્કૃતિમાં વ્યસ્ત છે.'

વીજપોલ નીતિ અને વળતર મુખ્ય મુદ્દો
આંદોલનનું કેન્દ્રબિંદુ ખેડૂતોની જમીનમાં ઉભા થતા વીજપોલ અને તેના કારણે થતું નુકસાન છે. ખેડૂતોનું કહેવું છે કે, વીજ લાઈન અને પોલના કારણે ખેતીની જમીનનો ઉપયોગ મર્યાદિત થઈ જાય છે, જેના બદલામાં પૂરતું અને ન્યાય સંગત વળતર મળતું નથી. વિકાસના પ્રોજેક્ટમાં ખેડૂતોની જમીનનો ઉપયોગ થાય છે. પરંતુ વળતર બાબતે સ્પષ્ટ નીતિનો અભાવ હોવાથી રોષ વધી રહ્યો છે.

રાજ્યવ્યાપી આંદોલનની ચેતવણી
કિસાન સંઘે સરકારને ચેતવણી આપી છે કે, મોરબી અને જેતપરના ખેડૂતોની માંગણીઓનો તાત્કાલિક ઉકેલ નહીં આવે તો આ લડત સમગ્ર ગુજરાતમાં ફેલાશે. સંઘે જણાવ્યું છે કે આગામી દિવસોમાં તેઓ સત્તાવાર રીતે આંદોલનમાં જોડાશે અને જિલ્લાવાર કાર્યક્રમો જાહેર કરવામાં આવશે. ખેડૂતોના પ્રશ્નો ઉકેલવામાં વધુ વિલંબ થશે તો સ્થિતિ વધુ ગંભીર બની શકે છે.

આંદોલનમાં રાજકીય રંગ ચઢ્યાની ચર્ચા
ખેડૂત આંદોલન વચ્ચે રાજકીય પક્ષોની સક્રિયતા પણ ચર્ચાનો વિષય બની છે. કોંગ્રેસ, આમ આદમી પાર્ટી અને હવે કિસાન સંઘના પ્રવેશ બાદ કેટલાક વર્ગોમાં આંદોલનને રાજકીય દિશા આપવામાં આવી રહી હોવાના આક્ષેપો થઈ રહ્યા છે. કેટલાક ખેડૂતોનું માનવું છે કે પ્રશ્નોના ઉકેલ કરતાં રાજકીય લાભ મેળવવાનો પ્રયાસ વધુ દેખાઈ રહ્યો છે.

60 ગામોના સરપંચોનું સમર્થન
મોરબી-જેતપર ખેડૂત આંદોલનને દિવસેને દિવસે વધુ જનસમર્થન મળી રહ્યું છે. આસપાસના 60થી વધુ ગામોના સરપંચોએ ઉપવાસ છાવણીની મુલાકાત લઈને ખેડૂતોને સમર્થન જાહેર કર્યું છે. આ પગલાથી આંદોલનને વધુ મજબૂતી મળી છે અને સરકાર પર દબાણ પણ વધ્યું છે.

ગોંડલમાં પણ શરૂ થયા પ્રતિક ઉપવાસ
આંદોલનની અસર હવે અન્ય વિસ્તારોમાં પણ જોવા મળી રહી છે. ગોંડલ તાલુકાના માવિયા ગામમાં ખેડૂતો દ્વારા પ્રતિક ઉપવાસ શરૂ કરવામાં આવ્યા છે. કાલાવડથી ઘેલા સોમનાથ સુધીની હાઈ-ટેન્શન વીજ લાઈન અને જમીન વળતર જેવા મુદ્દાઓને લઈને ખેડૂતોમાં અસંતોષ છે. મહિલાઓ સહિત મોટી સંખ્યામાં ગ્રામજનો આ પ્રતિક ઉપવાસમાં જોડાઈ રહ્યા છે.

ઉકેલની રાહમાં ખેડૂતો
ખેડૂતોની માંગ સ્પષ્ટ છે કે વીજપોલ અને વીજ લાઈન સંબંધિત પ્રોજેક્ટ માટે રાજ્ય સરકાર એક પારદર્શક અને ન્યાયસંગત વળતર નીતિ જાહેર કરે. હાલ ખેડૂતો અને સરકાર વચ્ચે સમાધાનના પ્રયાસો ચાલી રહ્યા છે. પરંતુ કોઈ સ્પષ્ટ પરિણામ ન આવતા આંદોલન વધુ ઉગ્ર બનવાની શક્યતા વ્યક્ત કરવામાં આવી રહી છે.