25 દિવસમાં જ વડોદરાની ખુશ્બુ પતિથી વિખૂટી પડી ગઇ, પોલીસને તેણે શું જણાવ્યું ?

જ્યારે 25 દિવસ પહેલા વડોદરા જિલ્લાના પાદરા તાલુકાના લુણા ગામની ખુશ્બુ પટેલ અમેરિકા જવાની હતી ત્યારે તે ખુબ ખુશ અને રોમાંચ અનુભવતી હતી. તેના લગ્ન 8 માસ પહેલાં જ થયા હતા અને હવે તે પોતાના પતિ પાસે જવાની હતી પણ ગેરકાયદેસર રોકાયેલા લોકોને અમેરિકાએ હાંકી કાઢવાનું પગલું ભર્યું અને 104 ભારતીયોને ભારત પરત મોકલ્યા તેમાં ખુશ્બુનો પણ નંબર આવી ગયો હતો અને માત્ર 25 દિવસમાં જ તે પોતાના ગામમાં પરત આવી ગઇ છે. આજે સવારે તે લુણા પહોંચી હતી ત્યારે તેના માતા પિતામાં દર્દના આંસુ હતા. જો કે તેમને સંતોષ હતો કે તેમની દીકરી સહીસલામત ઘેર પહોંચી ગઇ છે. 

અમેરિકામાં ગેરકાયદે ઘૂસેલા 33 ગુજરાતીઓ સહિત 104 ભારતીયોને ડિપોર્ટ કરાતા 5 તારીખે અમેરિકન એરફોર્સના વિમાનમાં અમૃતસર લાવવામાં આવ્યા હતા. જ્યાંથી 33 ગુજરાતીઓ આજેૉ વહેલી સવારે વિમાન માર્ગે અમદાવાદ એરપોર્ટ પર પહોંચ્યા હતા. ડિપોર્ટ થયેલા ગુજરાતીઓમાં 28 લોકો ઉત્તર ગુજરાતના છે. જ્યારે 4 લોકો મધ્ય ગુજરાતના અને એક દક્ષિણ ગુજરાતનો છે. ત્યારે પોલીસ દ્વારા તેમના વાહનમાં જ આ લોકોને તેમના વતન લઈ જવામાં આવ્યા હત વડોદરાની લુણા ગામની યુવતી તેના ઘરે પહોંચતા જ પરિવારજનો ભાવુક બન્યા હતા.

વડોદરાના લુણા ગામની ખુશ્બુ પટેલ નામની યુવતી અમેરિકાથી ડિપોર્ટ થયા બાદ અમદાવાદ અને ત્યાંથી વડોદરા લાવવામાં આવી હતી. તે પોતાના ગામમાં પહોંચે તે પહેલાં તેની  પાદરા પોલીસ સ્ટેશનમાં પૂછપરછ કરાયા બાદ તેના ગામ લુણા લઈ જવામાં આવી હતી. પાદરા પોલીસે તેની પૂછપરછ કરી તે કેવી રીતે અમેરિકા ગઇ હતી અને ત્યાં તેની સાથે શું થયું તેની તમામ હકિકત તેની પાસેથી જાણી હતી અને ત્યારબાદ તેને ઘેર મોકલવામાં આવી હતી

 ખુશ્બુ પટેલ તેના ઘરે પહોંચતા જ પિતા જયંતીભાઈ પટેલ ભાવુક બન્યા હતા. પિતાએ રડતા રડતા કહ્યું હતું કે, તેને કેમ પાછી મોકલી છે તેની મને કંઇ જ ખબર નથી. મીડીયા આવ્યું ત્યારે મને ખબર પડી કે આવુ થયું છે. બાકી અમને કંઇ જ ખબર નથી. મારી દીકરી ઘેર આવી ગઇ તેનો મને આનંદ છે.

પરિવારજનોએ માહિતી આપી હતી કે  ખુશ્બુનું અમદાવાદમાં રહેતા  યુવક સાથે આઠ મહિના પહેલા લગ્ન થયુ હતું. ખુશ્બુ તાજેતરમાં જ અમેરિકા ગઇ હતી. તે અમેરિકા પહોંચી તેને હજુ તો 25 દિવસ જ થયા છે. પરંતુ તેને ડિપોર્ટ કેમ કરી તે વાત અમને સમજાતી નથી. અમે હાલમાં તો ચિંતામાં છીએ કે આગળ શું થશે. ઉજ્જવળ ભવિષ્ય માટે તે અમેરિકા ગઇ હતી. 

ઉલ્લેખનીય છે કે લુણા ગામાની યુવતી ખુશ્બુના પિતા જયંતીભાઇ પટેલ ખેઙૂત છે. ખુશ્બુએ ધો.12 સુધી અભ્યાસ કર્યો હોવાનું અને થોડો સમય વડોદરાના અટલાદરા વિસ્તારમાં પણ રહેતી હતી એવી જાણકારી મળી રહી છે.