khambhat : કાયદાના હાથે કોઈ બચી શકતું નથી, સાત વર્ષની બાળકીના હત્યારાને ફાંસીની સજા

ખંભાતની સેશન્સ કોર્ટે એક લોહી થીજાવી દેનારા કેસમાં આખરે ન્યાયનો ડંકો વગાડ્યો છે. કોર્ટે સાત વર્ષની માસૂમ બાળકી પર આતતાયી દુષ્કર્મ ગુજારીને તેની નિર્મમ હત્યા કરનાર પાપી આરોપી અર્જુન ઉર્ફે દડો અંબાલાલ ગોહેલને ફાંસીના માંચડે લટકાવવાનો આદેશ આપ્યો છે.

તમને જણાવી દઈએ કે, 2019 માં દિવાળીના પવિત્ર દિવસે આ ભયાનક ઘટના બની હતી. આ રાક્ષસે બેસતા વર્ષના શુભ દિવસે બિસ્કિટની લાલચ આપીને ફૂલ જેવી બાળકીને પોતાની હવસનો શિકાર બનાવવા માટે લઈ ગયો હતો. ત્યારબાદ તેણે આ નાની બાળકી પર ક્રૂર દુષ્કર્મ આચર્યું અને તેના કુમળા જીવને કચડી નાખ્યો હતો. બાળકીનો ક્ષત-વિક્ષત મૃતદેહ કામનાથ મહાદેવ મંદિરની પાછળ આવેલા ગંદા પાણીના કાંસમાંથી અર્ધનગ્ન હાલતમાં મળી આવ્યો હતો.

આ ઘૃણાસ્પદ અપરાધ અંગે ખંભાત ગ્રામ્ય પોલીસ સ્ટેશનમાં તાત્કાલિક ફરિયાદ નોંધવામાં આવી હતી. કેસની સુનાવણી દરમિયાન સરકારી વકીલ રઘુવીર પંડ્યાએ ધારદાર દલીલો રજૂ કરીને આરોપીના ગુનાને સાબિત કર્યો હતો. તમામ નક્કર પુરાવાઓ અને વિશ્વસનીય સાક્ષીઓને ધ્યાનમાં લઈને કોર્ટે આ નરાધમને કસૂરવાર ઠેરવ્યો અને તેને તેના પાપની સજા રૂપે ફાંસીના ફંદા પર લટકાવવાનો આદેશ આપ્યો છે. આ ચુકાદો પીડિત પરિવારને થોડી શાંતિ અને સમાજને એક કડક સંદેશ આપશે કે આવા જઘન્ય કૃત્યો કરનારાઓને કોઈ પણ ભોગે બક્ષવામાં નહીં આવે.