Jamnagar: ઇમરજન્સી સાયરન વાગ્યું, લોકો માટે કડક આદેશ

જામનગર જિલ્લામાં ઇમરજન્સી સાયરન વગાડવામાં આવ્યું હતું, જે સુરક્ષા પરિસ્થિતિની ગંભીરતા દર્શાવે છે. લોકોને આદેશ આપવામાં આવ્યો છે કે તેઓ અનિવાર્ય કામ વિના ઘરની બહાર ન નીકળે. આ ઉપરાંત, જનતાને ખોટી અફવાઓ પર ધ્યાન ન આપવા અને શાંતિ જાળવવા પણ સૂચના આપવામાં આવી છે. સાથે લોકોને સલામત સ્થળો પર રહેવાના આદેશ આપવામાં આવ્યા છે, તથા વેપારીઓને આજના દિવસે વ્યાપાર ધંધા બંધ કરીને સલામતીના ભાગ રુપે યોગ્ય જગ્યાએ આશરો લેવાના આદેશ તંત્ર દ્વારા આપવામાં આવ્યા છે. તકેદારીઓના ભાગ રુપે તંત્ર દ્વારા લોકોને આ પ્રમાણેની સૂચના આપવામાં આવી છે.   જામનગર જિલ્લા મેજિસ્ટ્રેટ બી.એન.ખેર દ્વારા જિલ્લાના સમગ્ર વિસ્તારને ‘નો ડ્રોન ફ્લાય ઝોન’ જાહેર કરવામાં આવ્યો છે. આ નિર્ણય 24 મે, 2025 સુધી અમલમાં રહેશે. રાષ્ટ્રીય સુરક્ષા અને વ્યૂહાત્મક સ્થળોની સલામતીને ધ્યાનમાં રાખીને આ પગલું લેવામાં આવ્યું છે.    જામનગર જિલ્લો ભારતની પશ્ચિમ આંતરરાષ્ટ્રીય દરિયાઈ સીમા પર સ્થિત છે, જે તેને વ્યૂહાત્મક રીતે અત્યંત મહત્વપૂર્ણ બનાવે છે. જિલ્લામાં મિલિટરી સ્ટેશન, એરફોર્સ સ્ટેશન, આઈએનએસ વાલસુરા અને એશિયાની સૌથી મોટી ઓઈલ રિફાઈનરી જેવા સંવેદનશીલ સ્થળો આવેલા છે. આ ઉપરાંત, સિક્કા થર્મલ પાવર સ્ટેશન, જી.એસ.એફ.સી. અને અન્ય મોટા ઔદ્યોગિક એકમો પણ જિલ્લાના મહત્વને વધારે છે. જિલ્લામાં કુલ 154 ક્રિટિકલ અને સ્ટ્રેટેજિક સ્થળો છે, જેમાંથી 112 રેડ ઝોનમાં અને 42 યલો ઝોનમાં આવે છે.   હાલના સમયમાં પાકિસ્તાન સાથેના તણાવપૂર્ણ સંબંધોને ધ્યાનમાં રાખીને, સુરક્ષા વ્યવસ્થાને વધુ મજબૂત કરવા માટે ડ્રોન ઉડાડવા પર સંપૂર્ણ પ્રતિબંધ મૂકવામાં આવ્યો છે. આ સ્થળોની આસપાસ ડ્રોન દ્વારા ફોટોગ્રાફી અથવા વીડિયોગ્રાફી પર પણ કડક પ્રતિબંધ લાદવામાં આવ્યો છે. આ આદેશનો ભંગ કરનાર વ્યક્તિ સામે ભારતીય ન્યાય સંહિતા, 2023ની કલમ-223 હેઠળ કડક કાર્યવાહી કરવામાં આવશે.   વધુમાં, જિલ્લા વહીવટીતંત્ર દ્વારા નાગરિકો અને સંસ્થાઓને આ તમામ આદેશોનું કડક પાલન કરવા અને સુરક્ષા સંબંધિત નિયમોનું ઉલ્લંઘન ન કરવા અપીલ કરવામાં આવી છે. આ પગલાંનો હેતુ જામનગરની સુરક્ષા વ્યવસ્થાને અભેદ્ય બનાવવાનો અને રાષ્ટ્રીય હિતોનું રક્ષણ કરવાનો છે.