યુદ્ધની અસર: રાજ્યમાં અનેક જગ્યાએ ગેસ લેવા કતાર

પશ્ચિમ એશિયામાં ઈરાન, અમેરિકા અને ઈઝરાયલ વચ્ચે ફાટી નીકળેલા યુદ્ધની ભયાનક અસરો હવે સાત સમંદર પાર ભારત અને ખાસ કરીને આર્થિક રીતે ધમધમતા ગુજરાત રાજ્યમાં દેખાવા લાગી છે. રણમેદાનમાં ફૂટતા બોમ્બ અને મિસાઈલોની અસરથી અત્યારે ગુજરાતના મધ્યમ અને નાના વેપારીઓના રસોડા ઠંડા પડવા લાગ્યા છે. વૈશ્વિક સ્તરે તેલ અને ગેસના પરિવહનનો મુખ્ય માર્ગ 'હોર્મુઝ સ્ટ્રેટ' પ્રભાવિત થતા જ ભારતમાં ઈંધણના પુરવઠા પર મોટી બ્રેક લાગી છે. પરિણામે, ગુજરાતમાં કોમર્શિયલ ગેસ સિલિન્ડરનો ઉપયોગ કરતા લાખો વેપારીઓ માટે અસ્તિત્વનું સંકટ ઊભું થયું છે.

સપ્લાય ચેઈન ખોરવાતા એજન્સીઓના ગોડાઉન ખાલીખમ

ગુજરાતના મુખ્ય શહેરો જેવા કે અમદાવાદ, સુરત, રાજકોટ અને વડોદરામાં કોમર્શિયલ ગેસ સિલિન્ડરનો પુરવઠો રાતોરાત ઠપ થઈ ગયો છે. ઇન્ડિયન ગેસ (Indane), HP અને ભારત ગેસ જેવી મોટી કંપનીઓની એજન્સીઓ બહાર સવારથી જ બાટલા મેળવવા માટે વેપારીઓની લાંબી લાઈનો જોવા મળી રહી છે. સુરત જેવા ઔદ્યોગિક હબમાં સ્થિતિ વધુ ગંભીર છે, જ્યાં ગેસ એજન્સીઓના ગોડાઉનો અત્યારે ખાલીખમ છે.

ગુજરાત હોટલ એન્ડ રેસ્ટોરન્ટ એસોસિએશનના જણાવ્યા અનુસાર, જે હોટલો પાસે પાઈપલાઈન (PNG) ની સુવિધા છે તેઓ અત્યારે સુરક્ષિત છે, પરંતુ જે હજારો રેસ્ટોરન્ટ અને ફૂડ આઉટલેટ્સ માત્ર સિલિન્ડર પર નિર્ભર છે, તેમની મુશ્કેલીઓનો કોઈ પાર નથી. ઘણા નાના વેપારીઓએ તો સ્ટોક ન હોવાને કારણે પોતાની હોટલોને તાળા મારી દીધા છે.

લારી-ગલ્લા ધારકો અને નાના વેપારીઓની આપવીતી

આ સંકટની સૌથી વરવી અસર રોજનું કમાઈને રોજ ખાનારા શ્રમિક વર્ગ અને નાના ખાદ્ય પદાર્થના વેપારીઓ પર પડી છે. સુરતમાં ખમણનો વ્યવસાય કરતા દિનેશ પ્રસાદે પોતાની વ્યથા ઠાલવતા જણાવ્યું કે, "અમે પરદેશથી અહીં પેટિયું રળવા આવ્યા છીએ. છેલ્લા બે દિવસથી ગેસ એજન્સીઓના ધક્કા ખાઈ રહ્યા છીએ પણ ક્યાંય બાટલો મળતો નથી. જો ગેસ જ નહીં મળે તો અમારો ચૂલો કેવી રીતે સળગશે? ગ્રાહકો આવે છે પણ અમારી પાસે રાંધવા માટે ગેસ નથી. આ યુદ્ધે અમારા જેવા ગરીબોની રોજીરોટી છીનવી લીધી છે."

માત્ર સુરત જ નહીં, અમદાવાદમાં પણ લારી-ગલ્લા ધારકો અને કેટરર્સ સંચાલકો ચિંતામાં છે. લગ્નની સિઝન હોવાથી કેટરર્સ પાસે મોટા ઓર્ડર છે, પરંતુ ગેસની તંગીને કારણે તેઓ સમયસર રસોઈ કેવી રીતે પૂરી કરશે તે એક મોટો પ્રશ્ન છે.

સરકારની હૈયાધારણા અને વાસ્તવિકતા

જોકે, આ ગભરાટ વચ્ચે રાજ્ય સરકારે હૈયાધારણા આપી છે કે કોમર્શિયલ સિલિન્ડરની સપ્લાય જાળવી રાખવા માટે તમામ પ્રયાસો કરવામાં આવી રહ્યા છે. સરકારી સુત્રોના મતે, સપ્લાયમાં થોડો વિક્ષેપ જરૂર છે પરંતુ તે કાયમી નથી. બીજી તરફ, સ્થાનિક લોકોએ અછતના ડરથી અગાઉથી જ ઓનલાઈન બુકિંગ કરાવી દીધું છે, જેના કારણે 'પેનિક બુકિંગ' ની સ્થિતિ સર્જાઈ છે અને વેઇટિંગ લિસ્ટ લાંબુ થઈ ગયું છે.

ઔદ્યોગિક એકમો અને ફરસાણના કારખાના પર અસર

દિવાળી અને અન્ય તહેવારો સિવાય પણ ગુજરાતમાં ફરસાણનો મોટો વેપાર છે. ફરસાણના કારખાનાઓમાં મોટા પાયે કોમર્શિયલ સિલિન્ડરનો વપરાશ થાય છે. જો આગામી બે થી ત્રણ દિવસમાં સપ્લાય રાબેતા મુજબ નહીં થાય, તો બજારમાં ખાદ્ય ચીજવસ્તુઓના ભાવમાં મોટો ઉછાળો આવી શકે છે અથવા તો વસ્તુઓની અછત સર્જાઈ શકે છે.

નિષ્ણાતોના મતે, યુદ્ધ લાંબુ ચાલશે તો આ સમસ્યા માત્ર કોમર્શિયલ નહીં પણ ઘરેલુ ગેસ સુધી પણ પહોંચી શકે છે. અત્યારે તો ગુજરાતનો વેપારી વર્ગ આકાશ ભણી નજર માંડીને બેઠો છે કે ક્યારે યુદ્ધ વિરામ થાય અને ક્યારે હોર્મુઝ સ્ટ્રેટનો રસ્તો ખુલે, જેથી તેમનો ધંધો ફરી ધમધમતો થાય.