વડોદરા શહેરના બકરાવાડી વિસ્તારમાં આવેલા નારાયણ એવન્યુમાં ગત મોડી રાત્રે હૃદય હચમચાવી દે તેવી હત્યાની ઘટના બની છે.
નજીવી બાબતે થયેલા ઘરકંકાસમાં ઉશ્કેરાયેલા પતિએ પોતાની જ પત્નીની ચાકુના અનેક ઘા ઝીંકી નિર્મમ હત્યા કરી નાખતા સમગ્ર વિસ્તારમાં ચકચાર મચી ગઈ છે. ઘટનાની જાણ થતાં જ પોલીસના ઉચ્ચ અધિકારીઓનો કાફલો સ્થળ પર દોડી ગયો હતો.
સામાન્ય બોલાચાલીમાં હત્યા
મળતી માહિતી મુજબ, નારાયણ એવન્યુમાં રહેતા બંટી નામના શખ્સને તેની પત્ની સાથે કોઈ વાત પર સામાન્ય બોલાચાલી થઈ હતી. આ તકરાર જોતજોતામાં ઉગ્ર બની ગઈ હતી અને ગુસ્સા પર કાબૂ ગુમાવનાર બંટીએ ઘરમાં રહેલા ચાકુ વડે પત્ની પર હિંસક હુમલા શરૂ કરી દીધા હતા.
પત્ની કંઈ સમજે તે પહેલા જ શરીર પર ઉપરાછાપરી ઘા વાગતા તે લોહીથી લથપથ હાલતમાં જમીન પર ઢળી પડી હતી. ગંભીર ઈજાઓને કારણે મહિલાનું ઘટનાસ્થળે જ કરુણ મોત નીપજ્યું હતું.
હત્યાની જાણ થતાં જ DCP ઝોન-4 એન્ડ્ર્યુ મેકવાન અને નવાપુરા પોલીસ સ્ટેશનનો સ્ટાફ ઘટનાસ્થળે પહોંચી ગયો હતો. પોલીસે FSLની મદદથી ઘટનાસ્થળેથી મહત્વના પુરાવા એકત્ર કર્યા છે.
વડોદરા પોલીસે સતર્કતા દાખવી ગણતરીના કલાકોમાં જ ભાગી છૂટેલા આરોપી પતિ બંટીને રાઉન્ડઅપ કરી લીધો છે.
નવાપુરા પોલીસ સ્ટેશનના PI બી.એમ.પરમારે જણાવ્યું હતું કે, પ્રાથમિક તપાસમાં હત્યાનું કારણ ઘરકંકાસ જણાઈ રહ્યું છે. પોલીસે મૃતદેહને પોસ્ટમોર્ટમ માટે સયાજી હોસ્પિટલ ખસેડ્યો છે અને હાલમાં આ મામલે કાયદેસરની ફરિયાદ નોંધવાની તજવીજ હાથ ધરવામાં આવી છે. આરોપી પતિની વધુ પૂછપરછમાં હત્યા પાછળના ચોક્કસ કારણો બહાર આવશે.

પતિએ પત્ની પર છરીનાં ઘા જીક્યા

વડોદરામાં ઘરકંકાસથી ઉશ્કરાયેલા પતિએ પત્નીને મોતને ઘાટ ઉતારી, વડોદરા પોલીસે પતિને દબોચ્યો

March 14, 2026 | 12:39 IST