દેશમાં ભારે હિમવર્ષા અને વરસાદની આગાહી

સમગ્ર દેશમાં હાલ કાતિલ ઠંડીનો પ્રકોપ જોવા મળી રહ્યો છે, ત્યારે ભારતીય હવામાન વિભાગ (IMD) એ આગામી દિવસો માટે ગંભીર ચેતવણી જાહેર કરી છે. પંજાબ ઉપર સક્રિય થયેલા તીવ્ર પશ્ચિમી વિક્ષેપ (Western Disturbance) ને કારણે ૨૬ થી ૨૮ જાન્યુઆરી દરમિયાન ઉત્તર ભારતથી લઈને દરિયાકાંઠાના વિસ્તારો સુધી હવામાનમાં મોટો ફેરફાર થવાની સંભાવના છે.

પર્વતીય વિસ્તારોમાં હિમવર્ષા અને કરા પડવાની શક્યતા : 

હિમાચલ પ્રદેશ, જમ્મુ-કાશ્મીર, લદ્દાખ અને ઉત્તરાખંડમાં આગામી ૪૮ કલાકમાં હળવાથી મધ્યમ વરસાદ અને બરફવર્ષાની આગાહી છે. ૨૭ જાન્યુઆરીએ કેટલાક સ્થળોએ ભારે હિમવર્ષા સાથે કરા પડી શકે છે. આ દરમિયાન પહાડી વિસ્તારોમાં ૫૦ થી ૬૦ કિમીની ઝડપે ઠંડા પવનો ફૂંકાશે, જે પ્રવાસીઓ અને સ્થાનિકો માટે મુશ્કેલી સર્જી શકે છે.

મેદાની રાજ્યોમાં માવઠું અને શીતલહેર : 

પંજાબ, હરિયાણા, દિલ્હી, રાજસ્થાન અને ઉત્તર પ્રદેશમાં ૨૭ અને ૨૮ જાન્યુઆરીએ વીજળીના કડાકા સાથે વરસાદની સંભાવના છે. કેટલાક સ્થળોએ કરા પડવાથી ખેતીના પાકને નુકસાન થવાની ભીતિ છે. આ ઉપરાંત, દિલ્હી અને તેની આસપાસના વિસ્તારોમાં ૩૦ જાન્યુઆરી સુધી શીતલહેર અને ગાઢ ધુમ્મસની સ્થિતિ યથાવત રહેશે, જેના કારણે વિઝિબિલિટીમાં ઘટાડો થઈ શકે છે.

ગુજરાતના દરિયાકાંઠે તોફાની પવનની ચેતવણી : 

દક્ષિણ ભારતમાં કેરળ અને તમિલનાડુમાં વરસાદની શક્યતા છે, ત્યારે ઉત્તર ગુજરાતના દરિયાકાંઠે અને અરબી સમુદ્રમાં પવનની ગતિ તેજ બનશે. દરિયાકાંઠાના વિસ્તારોમાં ૪૦ થી ૫૦ કિમીની ઝડપે પવન ફૂંકાઈ શકે છે, જે ક્યારેક ૭૦ કિમી સુધી પહોંચવાની શક્યતા છે. ૨૬ જાન્યુઆરીએ દેશના અનેક ભાગોમાં વરસાદ અને વાવાઝોડા જેવું વાતાવરણ રહેવાની વકી છે.