ગુજરાતમાં ગરમીનો પ્રકોપ અને માવઠાની આગાહી

ગુજરાતમાં અત્યારે ઉનાળાની શરૂઆતમાં જ આકરા તાપનો અનુભવ થઈ રહ્યો છે, ત્યાં બીજી તરફ હવામાન વિભાગે વરસાદની આગાહી કરીને ખેડૂતો અને નાગરિકોની ચિંતામાં વધારો કર્યો છે. રાજ્યમાં હાલ એક તરફ તાપમાનનો પારો 40 ડિગ્રીને પાર કરી રહ્યો છે, તો બીજી તરફ સાયક્લોનિક સર્ક્યુલેશન સિસ્ટમ સક્રિય થવાને કારણે વાતાવરણમાં પલટો આવવાની પૂરેપૂરી શક્યતા છે.

કયા જિલ્લાઓમાં વરસાદની આગાહી ?

હવામાન વિભાગના જણાવ્યા અનુસાર, સાયક્લોનિક સર્ક્યુલેશન સિસ્ટમ સક્રિય થવાને કારણે ઉત્તર ગુજરાત અને કચ્છના વિસ્તારોમાં વરસાદી માહોલ જોવા મળી શકે છે. જેમાં મુખ્યત્વે:

બનાસકાંઠા, સાબરકાંઠા અને પાટણ

કચ્છ, મોરબી, જામનગર અને દેવભૂમિ દ્વારકા

આ ઉપરાંત, આગામી 19 અને 20 માર્ચ દરમિયાન દક્ષિણ ગુજરાત અને સૌરાષ્ટ્રના વિવિધ ભાગોમાં પણ ગાજવીજ સાથે હળવા વરસાદની સંભાવના વ્યક્ત કરવામાં આવી છે.

ગરમીના આંકડા અને યલો-ઓરેન્જ એલર્ટ : 

છેલ્લા કેટલાક દિવસોથી રાજ્યમાં સૂર્યદેવ આકરા પાણીએ જોવા મળી રહ્યા છે. સામાન્ય રીતે માર્ચ મહિનામાં આટલી ગરમી પડતી નથી, પરંતુ આ વર્ષે પારો સામાન્ય કરતા 7 થી 13 ડિગ્રી વધુ નોંધાયો છે.

રાજકોટ: રાજ્યનું સૌથી ગરમ શહેર (38 ડિગ્રી)

ઉત્તર ગુજરાત: ડીસામાં ગરમીનું ઓરેન્જ એલર્ટ જાહેર કરાયું હતું, જ્યાં તાપમાન 41 ડિગ્રીએ પહોંચ્યું છે.

અન્ય શહેરો: અમદાવાદ, ગાંધીનગર અને ડીસામાં 36 ડિગ્રી, જ્યારે અમરેલી અને ભુજમાં 37 ડિગ્રી તાપમાન નોંધાયું છે.

એન્ટિસાયક્લોન સિસ્ટમ જવાબદાર : 

હવામાન નિષ્ણાતોના મતે, અચાનક વધેલી આ ગરમી પાછળ એન્ટિસાયક્લોન સિસ્ટમ જવાબદાર છે. જ્યારે દરિયાઈ પવનોની ગતિ ધીમી પડે છે ત્યારે આવી સિસ્ટમ સર્જાય છે. હાલ ગુજરાત અને તેની આસપાસના વિસ્તારોમાં સૂકા પૂર્વીય પવનો ફૂંકાઈ રહ્યા છે, જે ગરમીમાં સતત વધારો કરી રહ્યા છે. દિલ્હી અને મુંબઈ જેવા મહાનગરોમાં પણ છેલ્લા 50 વર્ષનો રેકોર્ડ તૂટ્યો હોય તેવી સ્થિતિ સર્જાઈ છે.

માર્ચમાં જ જો આવી સ્થિતિ હોય, તો એપ્રિલ અને મે મહિનામાં ગરમીનું સ્તર ક્યાં પહોંચશે તે વિચારીને જ લોકોમાં ચિંતા પ્રસરી છે. હાલ બપોરના સમયે રસ્તાઓ સુમસામ ભાસી રહ્યા છે અને લોકો ઠંડા પીણાનો સહારો લઈ રહ્યા છે.