નવસારી શહેરમાં ઉનાળાની શરૂઆતમાં જ ગરમીએ આકરા પાણીએ જોવા મળી રહી છે. સોમવારે ગરમીનો પારો 40 ડિગ્રીએ પહોંચતા જ શહેરના અત્યંત વ્યસ્ત ગણાતા મોટા બજાર વિસ્તારમાં વહીવટી તંત્ર દ્વારા તાજેતરમાં કરવામાં આવેલી કામગીરીની પોલ ખુલી ગઈ છે.
રોડ 'ગુંદર' જેવો બન્યો
નવસારી ટાઉન પોલીસ મથકથી લઈને ટાટા સ્કૂલ સુધીના મુખ્ય માર્ગ પર રોડ સરફેસ સ્મૂથ કરવા માટે લગાવવામાં આવેલો ડામર ગરમી સહન ન કરી શકતા પ્રવાહી બનીને રસ્તા પર પથરાઈ ગયો છે. હાલમાં ઈદની ખરીદી માટે બજારમાં મોટી સંખ્યામાં લોકો ઉમટી રહ્યા છે ત્યારે પગપાળા જતા લોકોના ચંપલ રસ્તા પર જ ચોંટી ગયા હતા.
પરિસ્થિતિ એટલી ગંભીર હતી કે એક રિપોર્ટર અને સ્થાનિક લોકોએ મહિલાઓને ઉંચકીને રસ્તાની સાઈડમાં સુરક્ષિત પહોંચાડવી પડી હતી.
પીગળેલા ડામરને કારણે આ રસ્તો ટુ-વ્હીલર ચાલકો માટે અત્યંત જોખમી બન્યો છે. ટાયર સ્લિપ થવાનો ભય રહેતા વાહનચાલકોમાં ફફડાટ વ્યાપ્યો છે. સ્થાનિકોમાં ભારે રોષ છે કે કરોડોના ખર્ચે બનેલા રસ્તાઓ સામાન્ય ગરમીમાં પણ કેમ ટકી શકતા નથી?
લોકો હવે માંગ કરી રહ્યા છે કે નગરપાલિકા દ્વારા આ માર્ગ પર તાત્કાલિક ધૂળ કે રેતી નાખીને રાહત આપવામાં આવે.
હવામાન વિભાગે આજથી 15 માર્ચ સુધી રાજ્યના 17 જિલ્લાઓમાં હીટવેવનું એલર્ટ જાહેર કર્યું છે. જેમાં નવસારી ઉપરાંત અમદાવાદ, સુરત, રાજકોટ અને વડોદરા જેવા શહેરોનો સમાવેશ થાય છે.
જાણકારો મુજબ જો તાપમાન આ જ ગતિએ વધશે તો એપ્રિલ અને મે મહિનામાં પારો 45 ડિગ્રીને વટાવી શકે છે.

નવસારીમાં ગરમીથી ડામર પીગળ્યો

મોટા બજારમાં ઈદની ખરીદી કરવા આવેલા લોકો બેહાલ; ટુ-વ્હીલર ચાલકોમાં ફફડાટ

March 9, 2026 | 17:47 IST