સુરતમાં ગોડાદરામાં પોલીસનું દિલધડક એક્શન

સુરતનું ગોડાદરા વિસ્તાર હાલમાં કોઈ હાઈ-વોલ્ટેજ એક્શન ફિલ્મ કે ગેંગસ્ટર મૂવીના શૂટિંગ લોકેશનમાં ફેરવાઈ ગયું હોય તેવા દ્રશ્યો સર્જાયા હતા. સામાન્ય રીતે ફિલ્મોમાં કે હકીકતમાં કોઈ મોટી ગુનાહિત ઘટના બની ગયા પછી પોલીસ ઘટનાસ્થળે પહોંચતી હોય છે, પરંતુ સુરત પોલીસે અહીં અદભૂત સતર્કતા દાખવી ગણતરીની મિનિટોમાં હુમલાખોરોને રસ્તા પર જ દબોચી લીધા હતા. હુમલો કરવા આવેલા બદમાશો બાઇક પરથી ફંગોળાયા અને પોલીસે તેમની પાછળ ફિલ્મી સ્ટાઈલમાં દોડી તેમને જમીનદોસ્ત કરી દીધા હતા. આ સમગ્ર ઓપરેશનના સીસીટીવી (CCTV) હાલ સોશિયલ મીડિયા પર વાયરલ થયા છે, જે પોલીસની બહાદુરીની સાક્ષી પૂરે છે.

૯ શખ્સો, ૩ બાઈક અને ૬ ધારદાર 'રેનબો' ચપ્પુ

CCTVમાં દેખાતા દૃશ્યો કોઈપણ નાગરિકને હચમચાવી દે તેવા ભયાનક છે. સોસાયટીમાં રાત્રિના સમયે શાંતિનો માહોલ હતો ત્યારે અચાનક એક પછી એક ત્રણ બાઈક ગલીમાં પ્રવેશ કરે છે. દરેક બાઈક પર ત્રણ-ત્રણ એટલે કે કુલ ૯ જેટલા અસામાજિક તત્વો સવાર હતા. આ તમામ હુમલાખોરોના હાથમાં 'રેનબો' કલરના અત્યંત ધારદાર ૬ જેટલા મસમોટા ચપ્પુ અને અન્ય હથિયારો હતા. તેઓ ફરિયાદી સચિન ચૌધરી પર જીવલેણ હુમલો કરવાના સ્પષ્ટ ઈરાદે જ આવ્યા હતા. હુમલાખોરોનો આ આતંક જોઈને સોસાયટીના રહીશોમાં ભારે ફફડાટ અને ભયનો માહોલ ફેલાઈ ગયો હતો.

લોહીલુહાણ ખેલ પાછળ માત્ર ૧,૦૦૦ રૂપિયાનો વિવાદ

પોલીસની પ્રાથમિક તપાસમાં બહાર આવ્યું છે કે, આ આખી ઘટના પાછળ માત્ર ૧,૦૦૦ રૂપિયાનો નજીવો આર્થિક વિવાદ જવાબદાર હતો.

• ઉછીના નાણાંની માંગ: ફરિયાદી સચિન ધર્મેન્દ્રભાઈ ચૌધરી પાસે આરોપીઓએ અગાઉ ઉછીના આપેલા ૧,૦૦૦ રૂપિયાની કડક માંગણી કરી હતી.

• મામલો બિચક્યો: સચિને અત્યારે આ રકમ આપવાની અસમર્થતા દર્શાવતા મામલો એકાએક બીચક્યો હતો.

• ધમકી: આરોપી કનૈયા, દીપક અને તેના અન્ય મિત્રોએ સચિનને ફોન પર બીભત્સ ગાળો આપી જાનથી મારી નાખવાની ધમકી આપી હતી. સચિનને અહેસાસ થઈ ગયો હતો કે આ લોકો હુમલો કરશે, તેથી તેણે તુરંત પોલીસ કંટ્રોલ રૂમમાં ફોન કર્યો હતો.

પોલીસની એન્ટ્રી: ગુંડાઓના હોશ ઉડી ગયા

અત્યાર સુધી આપણે બોલિવૂડ ફિલ્મોમાં જોયું છે કે, જ્યારે હીરો પર હુમલો થાય ત્યારે પોલીસ છેલ્લી ઘડીએ પહોંચે છે પણ ગોડાદરામાં ચિત્ર બિલકુલ અલગ હતું. સચિનનો ઈમરજન્સી કોલ મળતા જ ગોડાદરા પોલીસ સ્ટેશનના સર્વેલન્સ સ્ટાફના હરવિજયસિંહ, સંદીપભાઈ અને વિશાલભાઈ તાત્કાલિક એક્શનમાં આવ્યા હતા. હુમલાખોરો સોસાયટીમાં ઘૂસીને સચિનને નિશાન બનાવે તે પહેલા જ પોલીસ કાફલો ત્યાં સજ્જ થઈને પહોંચી ગયો હતો. પોલીસની ગાડીઓ અને જવાનોને અચાનક સામે જોઈને હુમલો કરવા આવેલા ગુંડાઓના હોશ ઉડી ગયા હતા.

દિલધડક પીછો: હવામાં ફંગોળાયું બાઈક

પોલીસને જોઈને હુમલાખોરોએ પકડાઈ જવાના ડરથી ભાગવાનો નિષ્ફળ પ્રયાસ કર્યો હતો. CCTVમાં સ્પષ્ટ દેખાય છે કે, એક બાઈક પર સવાર હુમલાખોરો ભાગવા માટે જોરદાર એક્સિલરેટર આપે છે ત્યારે એક બાહોશ પોલીસકર્મી પાછળથી એક આરોપીને પકડીને ખેંચી રસ્તા પર પટકે છે. જેના કારણે ચાલુ બાઈક હવામાં એક ટાયર પર (વીલી) થઈ જાય છે અને સંતુલન ગુમાવતા બંને રસ્તા પર પટકાય છે.

બીજી તરફ, પોલીસ જવાનો હાથમાં દંડા લઈને તેમની પાછળ જીવના જોખમે દોડે છે. એક હુમલાખોર ગલીમાં સંતાઈને ભાગવાની કોશિશ કરે છે પણ પોલીસે તેને પકડીને રસ્તા પર પાડી દીધો હતો. એક આરોપીએ પોલીસની પકડમાંથી છૂટવા માટે જોરદાર ઝપાઝપી કરી હતી, જોકે પોલીસે તેને જમીન પર પછાડ્યો અને તે ફરીથી ભાગી ન જાય તે માટે એક પોલીસ જવાન તેના ખભા પર બેસી ગયો હતો. રસ્તાની વચ્ચે ચાલેલું આ દ્રશ્ય જોઈને સ્થાનિકો સ્તબ્ધ થઈ ગયા હતા.

ઝડપાયેલા આરોપીઓની યાદી

ગોડાદરા પોલીસે જે છ મુખ્ય આરોપીઓની ધરપકડ કરી છે, તેમાં નીચેનાનો સમાવેશ થાય છે: ૧. મનિષ ઉર્ફે કાલિયા ગુપ્તા ૨. પ્રિયેશ ઉર્ફે સાહુલ દુબે ૩. દીપક યાદવ ૪. અમિત ઉર્ફે બીડી યાદવ ૫. પ્રકાશ ઉર્ફે વિક્કી સોની ૬. અભિષેક ઉર્ફે બચ્ચી યાદવ

આ તમામ આરોપીઓ મૂળ ઉત્તર પ્રદેશ અને બિહારના વતની છે અને સુરતના લિંબાયત તથા ગોડાદરા વિસ્તારમાં રહીને કલરકામ કે હીરા મજૂરી કરે છે. તેમની સાથે એક કાયદાના સંઘર્ષમાં આવેલ કિશોર પણ સામેલ હતો. પોલીસે તમામ આરોપીઓને રસ્તા પર લાઈનમાં બેસાડી તેમની કડક પૂછપરછ કરી અને તલાશી લેતા તેમની પાસેથી ઘાતક હથિયારો મળી આવ્યા હતા.