આરોગ્ય કર્મચારીઓની હડતાળ પર 3 મહિના માટે વિરામ, છૂટા કરાયેલા કર્મચારીઓ પરત ફરશે

છેલ્લા કેટલાંક દિવસોથી રાજ્યભરના સરકારી આરોગ્ય કેન્દ્રો અને હોસ્પિટલોમાં કામગીરીને અસર કરતી આરોગ્ય કર્મચારીઓની હડતાળ હવે તાત્કાલિક અસરથી સ્થગિત કરવામાં આવી છે. ગુજરાત આરોગ્ય કર્મચારી મહાસંઘ દ્વારા મહત્વપૂર્ણ નિર્ણય લેવામાં આવ્યો છે કે હડતાળને હાલના માટે ત્રણ મહિનાના વિરામ સાથે મોકૂફ રાખવામાં આવે.

આંદોલનની પાછળના બે મુખ્ય મુદ્દાઓ પૈકી એક – ખાતાકીય પરીક્ષા મુદ્દે સરકારે સમાધાન કર્યું છે, જયારે બીજો મુદ્દો એટલે કે ટેક્નિકલ કર્મચારીઓ સંબંધિત પ્રશ્નો અંગેની માગ હતી. આરોગ્ય મંત્રી ઋષિકેશ પટેલની અધ્યક્ષતામાં યોજાયેલી બેઠકમાં સરકાર તરફથી ત્રિમાનિય સમયગાળામાં નિરાકરણ લાવવાની બાહેંધરી આપવામાં આવી છે.

આ અંગે મહાસંઘના પ્રમુખ રણજીતસિંહ મોરીએ જણાવ્યું હતું કે, “અમે અમારા બે મુખ્ય પ્રશ્નો અંગે સરકાર સામે હડતાળ પર હતા. ખાતાકીય પરીક્ષા મુદ્દે સમાધાન થયું છે અને ટેક્નિકલ કર્મચારીઓના પ્રશ્નો માટે સરકાર દ્વારા ત્વરિત પગલાં લેવા માટે ત્રણ મહિનાની અંદર નિર્ણય લેવાની ખાતરી આપવામાં આવી છે.”

તેમણે વધુમાં જણાવ્યું હતું કે, ગઈકાલે તમામ 33 જિલ્લાઓના પ્રમુખો સાથે બેઠક યોજી સમગ્ર પરિસ્થિતિ પર ચર્ચા કરવામાં આવી હતી. સર્વસંમતિએ નિર્ણય લેવામાં આવ્યો કે હાલના સંજોગોમાં સરકાર ઉપર વિશ્વાસ મૂકીને હડતાળ મોકૂફ રાખવામાં આવે. આ ઉપરાંત, છૂટા કરાયેલા કર્મચારીઓને ફરજ પર પરત લેવા અંગે પણ સ્પષ્ટ બાહેંધરી સરકાર તરફથી આપવામાં આવી છે અને તેમની નોકરી સતત ગણાશે.

આ નિર્ણયથી રાજ્યભરના આરોગ્ય વિભાગમાં સ્થિરતા પાછી ફરવાની આશા છે. હડતાળને કારણે જાહેર આરોગ્ય વ્યવસ્થામાં ઊભી થયેલી અવ્યવસ્થા અને દર્દીઓની પરેશાની હવે ઘટશે તેવી સંભાવના છે. મહાસંઘે ચેતવણી આપી છે કે જો સરકાર ત્રિમાનિય ગાળામાં કોઈ ચોક્કસ પગલાં નહીં લે, તો આંદોલન ફરીથી શરૂ કરવામાં આવશે.