ગુજરાતના વાતાવરણમાં પલટોઃ ભાવનગર અને ધોલેરામાં ભરઉનાળે કરા સાથે વરસાદ

બેનિફિટ ન્યૂઝ ડેસ્ક

શુક્રવારે ગુજરાતના વાતાવરણમાં અચાનક પલટો આવ્યો હતો. ભાવનગર શહેર અને ધોલેરા પંથકમાં ભર ઉનાળે વરસાદ ખાબક્યો હતો. કરાં સાથે વરસાદ પડતાં કેરીના પાકને નુકસાન થવાની શક્યતાએ ખેડૂતોમાં ચિંતા પ્રસરી હતી. જો કે, વરસાદથી વાતાવરણમાં ઠંડક પ્રસરતાં તાપમાનમાં 3 થી 4 ડિગ્રીનો ઘટાડો થયો હતો. જેના કારણે લોકોએ કાળઝાળ ગરમીથી રાહત અનુભવી હતી. 

ભાવનગરના સુભાષનગર, મસ્તરામબાપા મંદિર, ચિત્રા યાર્ડ, આખલોલ જકાતનાકા, નારી ચોકડી અને વરતેજ વિસ્તારમાં વરસાદી ઝાપટાં પડ્યા હતા. ભાવનગર પંથકના કેટલાક ગામડાઓમાં પણ વરસાદ થયાના અહેવાલ છે. છેલ્લાં ત્રણ-ચાર દિવસથી શહેરમાં ગરમી વધતાં તાપમાનનો પારો ઉંચકાઈને 43 ડિગ્રી સુધી પહોંચી ગયુ હતુ. વરસાદના કારણે વાતાવરણમાં ઠંડક પ્રસરતાં 3 થી 4 ડિગ્રી તાપમાન ઘટી ગયું હતું. 

હવામાન વિભાગે આગામી દિવસોમાં ગરમીનું પ્રમાણ વધવાની આગાહી કરી છે. પરંતુ ભાવનગરમાં બપોર બાદ વાદળછાયું વાતાવરણ રહ્યું હતું. હાલમાં કેરીનો પાક તૈયાર થઈ ચૂક્યો છે. ભર ઉનાળે કમોસમી વરસાદ પડતાં કેરીના પાકને નુકસાન થવાની સંભાવનાએ ખેડૂતોમાં ચિંતા પ્રસરી છે.  

ભાવનગર બાદ અમદાવાદના ધોલેરા પંથકમાં પણ કરા સાથે વરસાદ થયો હતો. વરસાદ થવાના કારણે છેલ્લા એક સપ્તાહથી પડી રહેલી કાળઝાળ ગરમીથી રાહત મળી હતી. જ્યારે ઉનાળુ પાક હજુ ખેતરમાં હોવાથી ખેડૂતો કમોસમી વરસાદથી ચિંતિત બન્યા હતા. 

ગાજવીજ સાથે વરસાદની હવામાન વિભાગની આગાહી...

હવામાન વિભાગે હિમાચલપ્રદેશ, ઉત્તરાખંડ, જમ્મુ અને કાશ્મીર, મેઘાલય, કેરળ, તમિલનાડુ તેમજ આસામમાં હળવાથી મધ્યમ વરસાદની અને રાજસ્થાન, હરિયાણા અને પંજાબમાં 40 થી 50 કિમીની ઝડપે પવન ફૂંકાવાની સાથે વાવાઝોડાની આગાહી કરી છે. રાજસ્થાનના 20 જિલ્લામાં એલર્ટ આપવામાં આવ્યું છે. હિમાચલ, ઉત્તરાખંડ, બિહાર, ઝારખંડમાં ગાજવીજ સાથે વરસાદની આગાહી કરવામાં આવી છે.

હવામાનની પેટર્ન બદલાઇ...

વેસ્ટર્ન ડિસ્ટર્બન્સના કારણે દેશભરમાં હવામાનની પેટર્ન બદલાઈ ગઈ છે. તેની અસર વાતાવરણમાં જોવા મળી રહી છે. ઘણાં રાજ્યોમાં વાદળછાયું વાતાવરણ જોવા મળ્યું છે. જ્યારે કેટલાક વિસ્તારોમાં ધૂળની આંધી સાથે વરસાદ પડ્યો છે.