નવા વર્ષ 2026ના સ્વાગતની તૈયારીઓ વચ્ચે સમગ્ર ગુજરાતમાં કાયદો અને વ્યવસ્થાની સ્થિતિ જાળવવા રાજ્ય પોલીસ તંત્ર હરકતમાં આવ્યું છે. 31 ડિસેમ્બરની ઉજવણીમાં કોઈ અનિચ્છનીય ઘટના ન બને અને નશાખોરો પર લગામ કસી શકાય તે હેતુથી સુરત, રાજકોટ સહિતના મહાનગરોમાં પોલીસે લોખંડી બંદોબસ્ત ગોઠવી દીધો છે. ગુજરાત સરકારના 'ડ્રગ ફ્રી' અભિયાન હેઠળ આ વખતે ટેકનોલોજીના માધ્યમથી સઘન તપાસ કરવામાં આવી રહી છે.&nbsp;
રાજ્યના તમામ મોટા શહેરોમાં પોલીસ કડક બની છે. ચાર રસ્તા પર ટુ-વ્હીલર અને ફોર- વ્હીલર એમ બન્નેમાં સઘન ચેકિંગ હાથ ધરવામાં આવી રહ્યું છે.&nbsp;
સુરતમાં પોલીસની લાલ આંખ
Y-જંકશનથી અડાજણ સુધી કડક પહેરો ડાયમંડ સિટી સુરતમાં પોલીસ કમિશનરના માર્ગદર્શન હેઠળ DCP, ACP અને PI કક્ષાના ઉચ્ચ અધિકારીઓ રસ્તા પર ઉતર્યા છે. શહેરના તમામ 12 પ્રવેશદ્વારો અને મુખ્ય પોઈન્ટ્સ પર પોલીસ ચોકીઓ કાર્યરત કરવામાં આવી છે. ખાસ કરીને Y-જંકશન અને અડાજણ જેવા ધમધમતા વિસ્તારોમાં વાહનોનું સઘન ચેકિંગ હાથ ધરાયું છે. પોલીસ 'બ્રેથ એનેલાઇઝર' દ્વારા વાહનચાલકોની તપાસ કરી રહી છે જેથી દારૂ પીધેલી હાલતમાં ફરતા તત્વો સામે કડક કાયદેસરની કાર્યવાહી કરી શકાય.
રાજકોટમાં સ્પેશ્યલ ડ્રાઈવ
ડ્રગ્સ ટેસ્ટિંગ કિટ અને મોબાઈલ ફોરેન્સિક વેનનો ઉપયોગ રાજકોટ શહેરમાં પણ પોલીસની સ્પેશિયલ ડ્રાઇવ શરૂ કરવામાં આવી છે. અહીં SOG (સ્પેશિયલ ઓપરેશન ગ્રુપ) અને સ્થાનિક પોલીસે જામનગર રોડ સહિતના એન્ટ્રી પોઈન્ટ્સ સીલ કર્યા છે. રાજકોટ પોલીસ આ વખતે વધુ આક્રમક મૂડમાં છે, જ્યાં ડ્રગ્સ ટેસ્ટિંગ કિટ અને મોબાઈલ ફોરેન્સિક વેનનો ઉપયોગ કરીને શંકાસ્પદ રાહદારીઓના સ્થળ પર જ સેમ્પલ લેવામાં આવી રહ્યા છે. પ્યાસીઓને ઝડપી લેવા માટે પોલીસની આધુનિક રણનીતિથી અસામાજિક તત્વોમાં ફફડાટ ફેલાયો છે.
આરોગ્ય વિભાગ એક્શનમાં
કેક અને બેકરી પ્રોડક્ટ્સનું ચેકિંગ માત્ર સુરક્ષા જ નહીં, પરંતુ લોકોના સ્વાસ્થ્ય બાબતે પણ તંત્ર ગંભીર છે. રાજકોટ મહાનગરપાલિકાના આરોગ્ય વિભાગ દ્વારા 31st ની પાર્ટીઓમાં વપરાતી કેક, પેસ્ટ્રી અને બેકરી પ્રોડક્ટ્સની ગુણવત્તા તપાસવા માટે વિશેષ અભિયાન ચલાવવામાં આવ્યું છે. સિંધી કોલોનીની પ્રખ્યાત જલારામ બેકરી સહિતના એકમોમાં આરોગ્ય અધિકારી સી.ડી. વાઘેલાની ટીમ દ્વારા તપાસ હાથ ધરાઈ હતી. જોકે કોઈ અખાદ્ય વસ્તુ મળી નથી, પરંતુ હાઈજેનિક સ્થિતિ જાળવવા બાબતે આકરી નોટિસ ફટકારવામાં આવી છે.
સમગ્ર રાજ્યમાં પોલીસ અને મહાનગરપાલિકાના આ સંયુક્ત પ્રયાસોનો ઉદ્દેશ્ય સ્પષ્ટ છે: 'નવા વર્ષની ઉજવણી સુરક્ષિત અને સ્વસ્થ રહે.'

ન્યૂ યર સેલિબ્રેશન પૂર્વે રાજ્ય પોલીસની બાજ નજર

ન્યૂ યર સેલિબ્રેશન પૂર્વે ગુજરાતના તમામ શહેરોમાં પોલીસનું નશા કરનારને પકડવા વિશેષ ડ્રાઇવ..

December 31, 2025 | 15:56 IST