અમદાવાદ સહિત 13 જિલ્લાઓમાં વરસાદની આગાહી

Gujarat Rain Forecast: ગુજરાતમાં ચોમાસાની સત્તાવાર શરૂઆત સાથે જ મેઘરાજાએ દક્ષિણ ગુજરાત અને સૌરાષ્ટ્રમાં ધમાકેદાર બેટિંગ શરૂ કરી દીધી છે. હવામાન વિભાગે (IMD) આગામી 7 દિવસ માટે રાજ્યમાં વરસાદની તીવ્ર આગાહી જાહેર કરી છે. ખાસ કરીને દક્ષિણ ગુજરાતમાં ભારેથી અતિભરે વરસાદની સંભાવના વ્યક્ત કરવામાં આવી છે. આજે 24 જૂનના રોજ અમદાવાદ સહિત રાજ્યના 13 જિલ્લાઓમાં વીજળીના કડાકા-ભડાકા સાથે હળવાથી મધ્યમ વરસાદ પડવાની પ્રબળ શક્યતા છે. દક્ષિણ-પશ્ચિમ ચોમાસું દેશના અન્ય રાજ્યો જેમ કે મહારાષ્ટ્ર, તેલંગાણા, ઓડિશા, ઝારખંડ અને બિહારમાં સફળતાપૂર્વક પ્રવેશી ચૂક્યું છે, અને આગામી 2 થી 3 દિવસમાં તે સમગ્ર ગુજરાતને આવરી લે તે માટે પરિસ્થિતિ સંપૂર્ણપણે સાનુકૂળ બની ગઈ છે.

છેલ્લા 24 કલાકમાં દક્ષિણ ગુજરાતમાં મેઘમહેર
છેલ્લા 24 કલાક દરમિયાન દક્ષિણ ગુજરાતના વલસાડ, નવસારી અને સુરત તેમજ સૌરાષ્ટ્રના અમરેલી અને ગીર સોમનાથ જિલ્લામાં ભારે વરસાદ નોંધાયો છે. આ વરસાદી આંકડાઓમાં વલસાડ જિલ્લો સમગ્ર રાજ્યમાં મોખરે રહ્યો છે. વલસાડના ઉમરગામ તાલુકામાં સૌથી વધુ 4.33 ઇંચ વરસાદ ખાબક્યો છે, જેના કારણે નીચાણવાળા વિસ્તારોમાં પાણી ભરાઈ ગયા હતા. આ ઉપરાંત વલસાડના જ કપરાડામાં 1.46 ઇંચ અને વાપીમાં 1.42 ઇંચ વરસાદ નોંધાયો છે. ડાંગ જિલ્લાના મુખ્ય મથક આહવા-ડાંગમાં પણ 3.07 ઇંચ અને તાપીના ઉકાઈમાં 1.1 ઇંચ જેટલો નોંધપાત્ર વરસાદ પડ્યો છે. સુરતના માંડવી, અરેઠ, માંગરોળ, ઉમરપાડા અને નવસારીના ચીખલી, ગણદેવી તથા જલાલપોર પંથકમાં પણ સતત વરસાદી માહોલ જળવાયેલો રહ્યો છે.

સૌરાષ્ટ્ર અને મધ્ય ગુજરાતના વિસ્તારો પણ ભીંજાયા
બીજી તરફ, સૌરાષ્ટ્ર અને મધ્ય ગુજરાતના કેટલાક ભાગોમાં પણ મેઘરાજાની સારી હાજરી જોવા મળી છે. સૌરાષ્ટ્રના રાજકોટ જિલ્લાના ગોંડલ તાલુકામાં 2.13 ઇંચ જેટલો સારો વરસાદ નોંધાયો છે, જ્યારે કોટડા સાંગાણીમાં 0.79 ઇંચ વરસાદ પડ્યો છે. મધ્ય ગુજરાત અને આદિવાસી બેલ્ટની વાત કરીએ તો, નર્મદાના સાગબારામાં 0.75 ઇંચ તેમજ પંચમહાલના જાંબુઘોડા અને છોટા ઉદેપુરના કવાંટમાં સરખો એટલે કે 0.51 ઇંચ વરસાદ નોંધાયો છે. આ સિવાય બોટાદ, રાણપુર, અમરેલીના સાવરકુંડલા અને જાફરાબાદ જેવા વિસ્તારોમાં 0.04 ઇંચ થી લઈને 0.31 ઇંચ સુધીના હળવા વરસાદી ઝાપટાં પડ્યા છે, જેનાથી સમગ્ર પંથકમાં લાંબા સમયના ઉકળાટ બાદ ઠંડક પ્રસરી ગઈ છે.

આજે અમદાવાદ સહિત આ જિલ્લાઓમાં વરસાદની શક્યતા
આજે 24 જૂનના રોજ ઉત્તર અને મધ્ય ગુજરાતના અમદાવાદ, ગાંધીનગર, મહેસાણા, અરવલ્લી, ખેડા અને દાહોદ સહિતના જિલ્લાઓમાં છૂટાછવાયા સ્થળોએ હળવાથી મધ્યમ વરસાદની સંભાવના છે. જ્યારે દક્ષિણ ગુજરાતના વડોદરા, ભરુચ, સુરત, નવસારી, વલસાડ, ડાંગ અને તાપી જિલ્લાના અનેક સ્થળોએ મધ્યમથી ભારે વરસાદ પડી શકે છે. અમદાવાદ શહેરમાં મહત્તમ તાપમાન 40.4 ડિગ્રી સેલ્સિયસ નોંધાયું હતું અને દિવસભર વાદળછાયું વાતાવરણ રરહેવાની સંભાવના છે. હવામાન વિભાગના મતે શહેરમાં આગામી કલાકોમાં વાદળછાયા આકાશ સાથે એકથી બે વખત ભારે વરસાદી ઝાપટાં અથવા ગાજવીજ સાથે વરસાદ પડવાની સંભાવના છે.

આવતીકાલે 25 જૂન માટે ભારે વરસાદની ચેતવણી
હવામાન વિભાગે આવતીકાલે એટલે કે 25 જૂનના રોજ દક્ષિણ ગુજરાતના સુરત, નવસારી, વલસાડ, ડાંગ તેમજ કેન્દ્રશાસિત પ્રદેશ દમણ, દાદરા અને નગર હવેલીમાં અત્યંત ભારે વરસાદની ‘ઓરેન્જ એલર્ટ’ જેવી ચેતવણી જાહેર કરી છે. આ ઉપરાંત સૌરાષ્ટ્રના અમરેલી અને ભાવનગર જિલ્લામાં પણ ભારે વરસાદની સંભાવના વ્યક્ત કરવામાં આવી છે. આ સમયગાળા દરમિયાન દરિયાકાંઠાના અને પડોશી વિસ્તારોમાં 40 થી 50 km/h ની ઝડપે તીવ્ર પવન ફૂંકાવાની, વીજળીના કડાકા થવાની અને ભારે ગાજવીજ સાથે આકાશી આફત તૂટી પડવાની આશંકા હોવાથી માછીમારોને દરિયો ન ખેડવા સૂચના અપાઈ છે.

મહીસાગરમાં અસહ્ય ઉકળાટ વચ્ચે વાદળછાયું વાતાવરણ
મહીસાગર જિલ્લામાં આજે વહેલી સવારથી જ આકાશ કાળાડિબાંગ વાદળોથી ઘેરાયેલું જોવા મળી રહ્યું છે. સૂર્યનારાયણની વાદળો સાથેની સંતાકુકડીના કારણે સ્થાનિક લોકોને આકરા તડકાથી થોડી રાહત મળી છે. ઉલ્લેખનીય છે કે જિલ્લામાં ગત 19 જૂનના રોજ સારો વરસાદ વરસ્યો હતો, પરંતુ ત્યાર બાદ વાતાવરણ અચાનક શુષ્ક થઈ ગયું હતું. લોકો છેલ્લા કેટલાક દિવસોથી આકરી ગરમી અને અસહ્ય ભેજવાળા ઉકળાટથી પરેશાન બન્યા છે, ત્યારે આજના વાદળછાયા વાતાવરણે જિલ્લામાં વિધિવત ચોમાસાના આગમનની પ્રતીતિ કરાવી છે અને ગમે ત્યારે વરસાદ તૂટી પડે તેવી સ્થિતિ છે.

રાજકોટ 40.5°C સાથે રાજ્યનું સૌથી ગરમ શહેર
વરસાદી માહોલ વચ્ચે પણ રાજ્યના કેટલાક શહેરોમાં કાળઝાળ ગરમી અને બફારાનો પ્રકોપ યથાવત રહ્યો છે. સમગ્ર ગુજરાતમાં રાજકોટ 40.5°C મહત્તમ તાપમાન સાથે રાજ્યનું સૌથી ગરમ શહેર નોંધાયું છે. તેનાથી સહેજ પાછળ અમદાવાદ 40.4°C અને સુરેન્દ્રનગર 40°C તાપમાન સાથે કાળઝાળ ગરમીની ઝપેટમાં રહ્યા હતા. આ સિવાય ઉત્તર ગુજરાતના ડીસામાં 39.6°C, વડોદરામાં 38.6°C અને કચ્છના ભુજમાં 38°C તાપમાન નોંધાતા સ્થાનિક લોકો ગરમી અને ઉકળાટથી તોબા પોકારી ઉઠ્યા હતા. જોકે, વરસાદી સિસ્ટમ સક્રિય થતાં જ આગામી 24 કલાકમાં તાપમાનનો પારો 2 થી 3 ડિગ્રી ગગડવાની આશા છે.

દેશભરમાં ચોમાસાની સ્થિતિ
રાષ્ટ્રીય સ્તરની વાત કરીએ તો, દેશના મધ્યપ્રદેશ, ઉત્તરપ્રદેશ, રાજસ્થાન, પંજાબ, હિમાચલ પ્રદેશ, હરિયાણા અને દિલ્હી-NCR માં પ્રી-મોન્સુન પ્રવૃત્તિઓ વેગવંતી બની છે. મધ્યપ્રદેશના 17 જિલ્લામાં મંગળવારે સારો પ્રી-મોન્સુન વરસાદ થયો હતો. બિહારમાં ચોમાસાના આગમન સાથે જ વીજળી પડવાની જુદી-જુદી ઘટનાઓમાં 3 લોકોના કમનસીબ મોત નીપજ્યા છે. રાજસ્થાનમાં 1 થી 21 જૂન સુધીમાં સામાન્ય કરતાં 41% વધુ વરસાદ નોંધાઈ ચૂક્યો છે, જ્યાં સામાન્ય રીતે 28 mm વરસાદ થતો હોય છે ત્યાં આ વર્ષે 39.3 mm સરેરાશ વરસાદ થઈ ગયો છે. દિલ્હી-NCR અને ઉત્તર પ્રદેશના 6 શહેરોમાં 60 kmph ની ઝડપે ધૂળભરી આંધી ચાલી હતી, જેના કારણે બપોરે જ અંધારું છવાઈ ગયું હતું. બીજી તરફ, મહારાષ્ટ્રની આર્થિક રાજધાની મુંબઈમાં ચોમાસું તેના નિયત સમય કરતાં 13 દિવસના વિલંબ બાદ 24 જૂન, મંગળવારના રોજ પહોંચ્યું છે. સામાન્ય રીતે મુંબઈમાં 10 જૂન સુધીમાં ચોમાસું બેસી જતું હોય છે, પરંતુ આ વર્ષે મોડું પહોંચતા જ પ્રથમ દિવસે જ મુંબઈના અનેક વિસ્તારોને મેઘરાજાએ ધમરોળી નાખ્યા હતા.