રાજ્યમાં મેઘતાંડવ: 24 કલાકમાં 255 તાલુકામાં વરસાદ

Gujarat Heavy Rain Alert: ગુજરાતમાં ચોમાસાની ઋતુએ રૌદ્ર સ્વરૂપ ધારણ કર્યું છે. છેલ્લા 24 કલાક દરમિયાન રાજ્યના 255 તાલુકાઓમાં સાર્વત્રિક વરસાદ નોંધાયો છે, જેમાં સુરતના અંબિકામાં સૌથી વધુ 24 ઇંચ જેટલો વરસાદ ખાબક્યો છે. આ સિવાય અન્ય 12 તાલુકાઓમાં પણ 10 ઇંચથી વધુ વરસાદ પડતાં ચારેકોર જળબંબાકારની સ્થિતિ સર્જાઈ છે. અતિવૃષ્ટિ અને પૂરના કારણે સર્જાયેલી બે જુદી જુદી દુર્ઘટનાઓમાં કુલ 4 લોકોએ પોતાના જીવ ગુમાવ્યા છે. નવસારીમાં વીજ કરંટ લાગવાથી 3 લોકોના કરુણ મોત નીપજ્યા છે, જ્યારે આણંદમાં ખુલ્લી કાંસમાં 3 બાળકો તણાયા હતા, જેમાં 1 બાળકીનું મોત થયું છે અને 2 બાળકોને સલામત રીતે ઉગારી લેવાયા છે. બીજી તરફ, કુદરતી હોનારત વચ્ચે તંત્ર દ્વારા પૂરના પાણીમાં ફસાયેલા લોકો માટે રેસ્ક્યૂ કામગીરી પણ વેગવંતી બનાવાઈ છે. જેમાં છોટાઉદેપુરના નસવાડીમાં અશ્વિન નદીમાંથી અને તિલકવાડામાં પૂરના પાણી વચ્ચે ઝાડ પર આશરો લઈ બેઠેલા યુવકનું સફળ રેસ્ક્યૂ કરવામાં આવ્યું છે.

આજે વિવિધ જિલ્લાઓમાં એલર્ટ
આજે 1 ઓગસ્ટના રોજ સવારના 6:00 થી 8:00 વાગ્યા સુધીના માત્ર બે જ કલાકમાં રાજ્યના 135 તાલુકાઓમાં 1 mm થી લઈને સાડા ત્રણ ઇંચ સુધીનો વરસાદ નોંધાયો છે. ખાસ કરીને સુરેન્દ્રનગરના ચૂડામાં માત્ર બે કલાકની અંદર જ 3.46 ઇંચ વરસાદ ખાબકી ગયો છે. હવામાન વિભાગ દ્વારા પરિસ્થિતિની ગંભીરતાને ધ્યાને રાખીને આજે અમદાવાદ અને રાજકોટ સહિત રાજ્યના 6 જિલ્લાઓમાં અતિભારે વરસાદનું રેડ એલર્ટ જારી કરવામાં આવ્યું છે. આ ઉપરાંત અમરેલી અને ગાંધીનગર સહિત 11 જિલ્લાઓમાં ઓરેન્જ એલર્ટ તથા જૂનાગઢ, વડોદરા અને સુરત સહિત 13 જિલ્લાઓમાં યલો એલર્ટ જાહેર કરાયું છે. અતિભારે વરસાદની આ આગાહી અને મુશ્કેલ સ્થિતિને પગલે તંત્ર દ્વારા સુરક્ષાના ભાગરૂપે 10 જિલ્લાઓમાં તમામ શાળાઓ અને કોલેજોમાં રજા જાહેર કરી દેવામાં આવી છે.

નવસારીમાં પૂરની તારાજી: 160થી વધુ રસ્તા બંધ, 1 લાખ લોકો પ્રભાવિત
દક્ષિણ ગુજરાતના નવસારી જિલ્લામાં વરસાદે ભારે તારાજી સર્જી છે. નવસારી શહેરમાંથી પસાર થતી પૂર્ણા નદી ભયજનક સપાટી વટાવીને 28 ફૂટે પહોંચી ગઈ છે. જેના કારણે ગધેવાન, કાલીયાવાડી, કાછિયાવાડી અને શાંતાદેવી રોડ સહિતનો શહેરનો 30% થી વધુ વિસ્તાર પૂરના પાણીમાં ગરકાવ થઈ ગયો છે. ચાલુ મોસમમાં આ ત્રીજી વખત પૂર આવવાના કારણે સમગ્ર જિલ્લામાં જનજીવન સંપૂર્ણપણે અસ્તવ્યસ્ત થઈ ગયું છે અને વેપાર-ધંધા અટકી પડતાં કરોડો રૂપિયાનું નુકસાન થયું છે. માર્ગ અને મકાન વિભાગ (પંચાયત) હસ્તકના 155 રસ્તાઓ પર પૂરના પાણી ફરી વળવાથી અને 4 રેલવે અંડરપાસ ભરાઈ જવાથી કુલ 160 રસ્તાઓ વાહનવ્યવહાર માટે બંધ કરી દેવાયા છે. જેમાં સૌથી વધુ અસર વાંસદા તાલુકામાં થઈ છે, જ્યાં 53 રસ્તાઓ બંધ છે. આ સિવાય ગણદેવીમાં 33, ચીખલીમાં 32, નવસારીમાં 20, જલાલપોરમાં 18 અને ખેરગામમાં 4 રસ્તાઓ બંધ થતાં વાહનવ્યવહાર ઠપ થઈ ગયો છે અને 1,00,000 થી વધુ લોકો પ્રભાવિત થયા છે. સતત પૂરના કારણે શિક્ષણકાર્ય પણ ખોરવાયું છે, જેને લઈને સ્થાનિકોમાં વહીવટી તંત્ર સામે ભારે રોષ જોવા મળી રહ્યો છે.

અમદાવાદમાં રેડ એલર્ટ વચ્ચે અંડરપાસ બંધ, SBI POના ઉમેદવારોની હાલાકી
અમદાવાદ અને તેની આસપાસના વિસ્તારોમાં મોડી રાત્રે પડેલા અતિભારે વરસાદને કારણે નીચાણવાળા વિસ્તારો અને અંડરપાસમાં પાણી ભરાઈ જતાં શહેરીજનોને ભારે હાલાકી ભોગવવી પડી રહી છે. ચાંદલોડિયા રેલવે અંડરપાસ સંપૂર્ણપણે ગરકાવ થઈ જતાં વાહનચાલકોને લાંબા ફેરા ફરવાની ફરજ પડી છે, જ્યારે અંડરપાસ નજીક આવેલા પ્રસિદ્ધ રુદ્રેશ્વર મહાદેવ મંદિર પરિસરમાં પણ ઘૂંટણસમા પાણી ભરાઈ જતાં દર્શનાર્થીઓ મુશ્કેલીમાં મુકાયા હતા. બીજી તરફ, સરકારે રેડ એલર્ટના કારણે તમામ શાળાઓ અને કોલેજોમાં સત્તાવાર રજા જાહેર કરી હોવા છતાં, બોપલના સ્ટર્લિંગ સિટી સ્થિત TCS iON ઝોન સેન્ટર ખાતે સ્ટેટ બેંક ઓફ ઈન્ડિયા (SBI) દ્વારા પ્રોબેશનરી ઓફિસર (PO) ની પરીક્ષા યોજવામાં આવી હતી. આના કારણે દૂર-દૂરથી આવેલા પરીક્ષાર્થીઓ કાદવ, કીચડ અને પાણીમાંથી પસાર થઈને સેન્ટર પર પહોંચવા મજબૂર બન્યા હતા. વધુમાં, સવારના સમયે દુકાનો બંધ હોવાના કારણે જે ઉમેદવારો ઉતાવળમાં ઝેરોક્ષ કોપી લાવવાનું ભૂલી ગયા હતા, તેમણે ભારે રઝળપાટ અને નિરાશાનો સામનો કરવો પડ્યો હતો.

વડોદરામાં રાત્રિ રેસ્ક્યૂ: હોસ્ટેલમાંથી 150 વિદ્યાર્થીઓને સલામત સ્થળે ખસેડાયા
વડોદરા શહેરમાં અને ગ્રામ્ય વિસ્તારમાં પણ વરસાદી ઈમરજન્સી જેવી સ્થિતિનું નિર્માણ થયું છે. વડોદરાના વાઘોડિયા રોડ પર આવેલી સુમનદીપ વિદ્યાપીઠની લક્ષ્મી હોસ્ટેલમાં મધ્યરાત્રિના 3:00 વાગ્યે અચાનક પૂરના પાણી ભરાઈ જતાં ભારે દોડધામ મચી ગઈ હતી. ઘટનાની ગંભીરતાને જોઈને વાઘોડિયા મામલતદાર અને પોલીસની ટીમે ત્વરિત કામગીરી હાથ ધરી હતી અને મધ્યરાત્રિએ જ રેસ્ક્યૂ ઓપરેશન ચલાવીને હોસ્ટેલમાંથી 100 છાત્રાઓ, 40 છાત્રો અને 10 શ્રમિકો મળીને કુલ 150 લોકોને સલામત સ્થળે ખસેડ્યા હતા. આ ઉપરાંત વડોદરા જિલ્લા કલેક્ટર ડૉ. અનિલ ધામેલિયાએ પણ મોડી રાત્રે દેવ ડેમની રૂબરૂ મુલાકાત લીધી હતી. ઉપરવાસમાં થઈ રહેલા સતત વરસાદને કારણે ડેમમાં પાણીની આવક વધી રહી હોવાથી તેમણે ગેટ ઓપરેશન અને જળસપાટીની સમીક્ષા કરી સ્થળ પર હાજર અધિકારીઓને જરૂરી માર્ગદર્શન અને સૂચનાઓ આપી હતી.

વલસાડમાં કટોકટી: રાશન તણાયું, માનવતાવાદી મદદ માટે ગુહાર અને મધ્યરાત્રિએ રેસ્ક્યૂ
વલસાડ જિલ્લામાં પણ અતિભારે વરસાદને કારણે સ્થિતિ ખૂબ જ નાજુક બની છે. વલસાડ શહેરના નીચાણવાળા કાશ્મીર નગર, બરુડિયાવાડ, તળિયાવાડ અને બંદર રોડ જેવા વિસ્તારોમાં 23 જુલાઈ બાદ ફરી એકવાર પૂરના પાણી ફરી વળ્યા છે. ખાસ કરીને કાશ્મીર નગરના ફળિયા નંબર-2 માં ગળાડૂબ પાણી ભરાતાં 70 થી વધુ ઘરો ગરકાવ થઈ ગયા છે અને લોકોનું રાશન તથા ઘરવખરીનો તમામ સરસામાન પાણીમાં તણાઈ ગયો છે. પૂરના પાણી ઓસર્યા બાદ હવે કાદવ-કીચડના કારણે રોગચાળો ફેલાવાની ભીતિ સેવાઈ રહી છે, જેથી સ્થાનિકોએ વહીવટી તંત્ર પાસે જેસીબીથી સફાઈ, પીવાનું પાણી, વીજળી અને દવાનો છંટકાવ કરવાની માંગ કરી છે. આ બધી વિપરીત પરિસ્થિતિઓ વચ્ચે, વલસાડમાં ઔરંગા નદીનું જળસ્તર વધતાં બંદર રોડ બ્રિજ પર 3 યુવકો પૂરના ધસમસતા પાણી વચ્ચે ફસાયા હતા, જેમને વલસાડ નગરપાલિકાની ફાયર બ્રિગેડની ટીમે અંધારી રાત્રે કિલર રેસ્ક્યૂ ઓપરેશન હાથ ધરીને સલામત રીતે બહાર કાઢ્યા હતા.

રાજકોટમાં મહાનગરપાલિકાનું એલર્ટ, સિઝનનો 12 ઇંચ વરસાદ
રાજકોટ શહેર અને જિલ્લામાં શુક્રવાર રાતથી જ હવામાન વિભાગ દ્વારા રેડ એલર્ટ જાહેર કરવામાં આવ્યું છે. રાજકોટ શહેરમાં આખી રાત અવિરત ધીમી ધારે ઝરમર વરસાદ વરસતો રહ્યો હતો, જેમાં સવારે 6:00 વાગ્યા સુધીમાં 1 ઇંચ અને સવારે 10:00 વાગ્યા સુધીમાં કુલ 2 ઇંચ વરસાદ નોંધાયો છે. આ સાથે શહેરમાં મોસમનો કુલ સરેરાશ વરસાદ 12 ઇંચ પર પહોંચ્યો છે. જેમાં સેન્ટ્રલ ઝોનમાં 309 mm, ઇસ્ટ ઝોનમાં 280 mm અને વેસ્ટ ઝોનમાં 332 mm વરસાદ નોંધાયો છે. રાજકોટ મહાનગરપાલિકાના ડેપ્યુટી એક્ઝિક્યુટિવ એન્જિનિયર મહેશ રાઠોડના જણાવ્યા અનુસાર, સોરઠીયાવાડી સર્કલ નજીક આવેલી લલૂડી વોકળી જેવા નીચાણવાળા વિસ્તારોમાં પાણી ભરાવાની શક્યતાને પગલે મનપાએ તૈયારીઓ કરી લીધી છે. સ્થાનિકોને આશ્રય આપવા માટે બે જગ્યાએ શેલ્ટર હોમની વ્યવસ્થા કરાઈ છે અને મનપાની ટીમ દ્વારા માઇકિંગ કરીને લોકોને સતર્ક રહેવા એનાઉન્સમેન્ટ કરવામાં આવી રહ્યું છે.

ભાદર-2 અને આજી-2 ડેમના દરવાજા ખોલાયા: 25થી વધુ ગામોને હાઈ એલર્ટ
ઉપરવાસમાં ભારે વરસાદના કારણે રાજકોટ જિલ્લાના જળાશયોમાં પાણીની આવક વધી રહી છે. ધોરાજી પાસે આવેલા ભાદર-2 ડેમની પૂર્ણ જળસપાટી 53.1 મીટર છે, જેની સામે હાલનું જળસ્તર 52.5 મીટર સુધી પહોંચી ગયું છે. ડેમમાં પાણીની આવક અને જાવક 673 ક્યુસેક થતાં તંત્ર દ્વારા ડેમનો 1 દરવાજો 0.15 મીટર ખોલવામાં આવ્યો છે. ભાદર-2 માંથી પાણી છોડાતાં રાજકોટ, ઉપલેટા, પોરબંદર અને બોટાદના 25 થી વધુ નીચાણવાળા ગામોને હાઈ એલર્ટ કરાયા છે. જેમાં ધોરાજીના ભોળા, ભલ, છાડવાવદર, સુપેડી તથા ઉપલેટાના ડુમીયાણી, ચિખલિયા, સમઢિયાળા, ગણોદ, ભીમોરા, લાઠ, મેલી, નિલાખા સહિતના ગામોનો સમાવેશ થાય છે. આ ઉપરાંત પોરબંદરના કુતિયાણા તાલુકાના ભોગસર, છત્રાવા, કટવાણા, કુતિયાણા તથા માણાવદર અને નવી બંદર સહિતના વિસ્તારોને ખાસ ચેતવણી અપાઈ છે. આ જ રીતે રાજકોટના આજી-2 ડેમનું જળસ્તર 72.5 મીટરે પહોંચતાં તેના 2 દરવાજા 0.102 મીટર ખોલીને 380 ક્યુસેક પાણી છોડાયું છે, જેનાથી પડધરી તાલુકાના અડબાલકા, બાઘી, દહીંસરડા, ખંઢેરી સહિતના 10 ગામોને એલર્ટ કરાયા છે.

બોટાદનો ખાંભડા ડેમ છલકાયો: ગઢડામાં 4 ઇંચ વરસાદ અને 9 ગામોને સાવચેત કરાયા
બોટાદ જિલ્લામાં પણ મેઘરાજાની મહેરબાનીથી સાર્વત્રિક વરસાદી માહોલ જામ્યો છે. જિલ્લામાં રાત્રિ દરમિયાન અવિરત વરસાદ પડતાં ગઢડામાં સૌથી વધુ 4 ઇંચ, બોટાદમાં 3.75 ઇંચ, બરવાળામાં 3 ઇંચ અને રાણપુરમાં 2 ઇંચ વરસાદ નોંધાયો છે. કોઈ મોટું નુકસાન થયા વગર ધીમી ધારે વરસાદ પડતાં ખેડૂતો અને સ્થાનિકોમાં આનંદ છવાયો છે. બીજી તરફ, ભારે આવકના કારણે બોટાદનો ખાંભડા ડેમ છલકાઈ જતાં સવારે 6:55 કલાકે ડેમનો 1 દરવાજો 45 cm ખોલીને 1730 ક્યુસેક પાણી નદીમાં છોડવામાં આવ્યું છે. આના પગલે ખાંભડા, બેલા, કુંડલ અને ટીંબલા સહિત નીચાણવાળા 9 ગામોને એલર્ટ કરી દેવાયા છે. તંત્ર દ્વારા નાગરિકોને નદીના પટ, કોઝવે કે પુલ તરફ ન જવાની કડક સૂચના આપવામાં આવી છે અને અફવાઓથી દૂર રહી સત્તાવાર સૂચનાઓનું પાલન કરવા અપીલ કરવામાં આવી છે.

અમરેલીના નાના લીલીયામાં કાચો શેડ ધરાશાયી
અમરેલી જિલ્લાના લીલીયા તાલુકાના નાના લીલીયા ગામમાં મોડી રાત્રે પડેલા ભારે વરસાદના કારણે એક ખેડૂતનો કાચો નળિયાવાળો પશુશેડ ધરાશાયી થયો હતો. શેડ તૂટી પડવાથી નીચે પાર્ક કરેલું મીની ટ્રેક્ટર દબાઈ જતાં તેને નુકસાન થયું હતું, પરંતુ સદનસીબે તે સમયે કોઈ વ્યક્તિ કે પશુ હાજર ન હોવાથી મોટી હોનારત ટળી હતી. બીજી તરફ, ભરૂચ જિલ્લાના નેત્રંગ અને વાલિયા તાલુકામાં છેલ્લા 2 દિવસથી સતત વરસી રહેલા અતિભારે વરસાદના કારણે જળબંબાકારની સ્થિતિ સર્જાઈ છે. સતત વરસાદને પગલે નેત્રંગ તાલુકામાં આવેલો પ્રખ્યાત ધાણીકુટ ધોધ સોળે કળાએ ખીલી ઊઠ્યો છે અને તેનું અતિ સુંદર પરંતુ રૌદ્ર સ્વરૂપ જોવા મળી રહ્યું છે, જેને જોવા માટે સ્થાનિકોમાં ભારે કૌતુક સર્જાયું છે.