ગુજરાતમાં મેઘતાંડવ: 265 તાલુકામાં ભારે વરસાદ

Gujarat Heavy Rain: ગુજરાતમાં છેલ્લા 24 કલાક દરમિયાન મેઘરાજાએ ધમાકેદાર બેટિંગ કરતાં રાજ્યના 265 તાલુકાઓમાં વ્યાપક વરસાદ નોંધાયો છે. સૌથી વધુ વરસાદ ઉત્તર ગુજરાતના પાટણ જિલ્લાના સાંતલપુરમાં 15 ઇંચ અને રાધનપુરમાં 13.46 ઇંચ ખાબક્યો છે. આ ઉપરાંત વાવ-થરાદના ભાભરમાં 11.30 ઇંચ, દિયોદરમાં 10.83 ઇંચ અને ખેડાના નડિયાદમાં 10.31 ઇંચ વરસાદ નોંધાયો છે. રાજ્યના 10 તાલુકાઓમાં 5 ઇંચથી વધુ વરસાદ થતાં ચારેય તરફ જળબંબાકારની સ્થિતિ સર્જાઈ છે. સવારના 6 થી 8 વાગ્યા દરમિયાન પણ 106 તાલુકામાં વરસાદી માહોલ રહ્યો હતો, જેમાં દિયોદર અને લાખાણીમાં 1.50 ઇંચથી વધુ વરસાદ પડ્યો હતો.

મોટા પાયે સ્થળાંતર, રેસ્ક્યૂ કામગીરી અને જાનહાનિ
ભારે વરસાદ અને પૂરની ગંભીર સ્થિતિને પગલે રાજ્યભરમાંથી 40,500 લોકોનું સુરક્ષિત સ્થળે સ્થળાંતર કરવામાં આવ્યું છે, જ્યારે 6,367 લોકોને સ્થાનિક તંત્ર અને બચાવ ટુકડીઓ દ્વારા રેસ્ક્યૂ કરવામાં આવ્યા છે. પૂરના ધસમસતા પ્રવાહમાં તણાઈ જવાથી સુરતમાં 2 અને નવસારીમાં 4 લોકોના મૃતદેહ મળી આવ્યા છે. અમરેલી જિલ્લામાં પૂરની વિષમ પરિસ્થિતિ વચ્ચે અઢી વર્ષની બાળકી અને એક ખેત મજૂરનું મોત નીપજ્યું છે. નવસારીના ભાટ ગામ નજીક ઝીંગા ફાર્મ પર ફસાયેલા 30 થી વધુ લોકોને એરલિફ્ટ કરીને સલામત સ્થળે ખસેડવામાં આવ્યા હતા.

હવામાન વિભાગની ચેતવણી: સાત જિલ્લામાં રેડ એલર્ટ
હવામાન વિભાગ દ્વારા અતિભારે વરસાદની આગાહી જારી કરવામાં આવી છે. રાજ્યના 7 જિલ્લાઓમાં અત્યંત ભારે વરસાદની શક્યતાને પગલે રેડ એલર્ટ જાહેર કરાયું છે. આ ઉપરાંત અમદાવાદ, રાજકોટ અને વાવ-થરાદ સહિતના 15 જિલ્લાઓમાં ઓરેન્જ એલર્ટ તથા કચ્છ, જામનગર, નર્મદા અને વલસાડ સહિતના 12 જિલ્લાઓમાં યલો એલર્ટ આપવામાં આવ્યું છે.

અમદાવાદ-રાજકોટ નેશનલ હાઈવે બંધ: 900 લોકોનું રેસ્ક્યૂ
અમદાવાદ-રાજકોટ નેશનલ હાઈવે પર બાવળા અને ચાંગોદર પાસે પૂરના પાણી ફરી વળતાં સનાથલથી બગોદરા સુધીનો માર્ગ બંને તરફ સંપૂર્ણ બંધ કરી દેવાયો છે. 12 કલાકથી વધુ સમય વિત્યા છતાં પાણી ન ઓસરતાં વાહનવ્યવહાર ઠપ્પ થઈ ગયો છે. બાવળાના ગેલોપ્સ પાર્ક પાસે પૂરના પાણીમાં ફસાયેલા 900 જેટલા લોકોને બચાવવા માટે પોલીસ અને SDRFની ટીમો દ્વારા રેસ્ક્યૂ ઓપરેશન ચલાવવામાં આવ્યું હતું. તંત્ર દ્વારા વાહનચાલકો માટે બગોદરાથી વેજળકા થઈને ધોલેરા એક્સપ્રેસ હાઈવે પર ડાઈવર્ઝન આપવામાં આવ્યું છે.

વીરપુર કાર દુર્ઘટના અને ઊંઝામાં કરૂણ મોત
24 જુલાઈના રોજ વહેલી સવારે વીરપુર જતા રસ્તે ધસમસતા પ્રવાહમાં ઇલેક્ટ્રિક કાર તણાઈ ગઈ હતી. 26 કલાક સુધી ચાલેલા સઘન રેસ્ક્યૂ ઓપરેશન બાદ 70 વર્ષીય ભીખાભાઈ ધનજીભાઈ ડોબરીયાનો મૃતદેહ થોરાળા ડેમમાંથી મળી આવ્યો છે. બીજી તરફ, ઊંઝાના ઊમિયાનગર વિસ્તારમાં રાત્રિના સમયે પોતાના છાપરામાં રસોઈ બનાવી રહેલી 38 વર્ષીય મહિલા રમીલાબેન બદ્રીલાલ કથોડી પર ઘર નજીક આવેલું ખીજડાનું ઝાડ ધરાશાયી થતાં તેમનું કરૂણ મોત નીપજ્યું હતું.

સુરેન્દ્રનગરનો ધોળીધજા ડેમ 100% ભરાયો
સુરેન્દ્રનગર જિલ્લાનો ધોળીધજા ડેમ નર્મદા કેનાલના વધારાના પાણીની આવકથી 100% ભરાઈ ગયો છે. આથી તંત્ર દ્વારા સુરેન્દ્રનગર, રતનપર, જોરાવરનગર, વઢવાણ અને શિયાણી સહિતના નીચાણવાળા 14 થી વધુ ગામોના લોકોને નદી પટમાં અવરજવર ન કરવા અને સલામત સ્થળે ખસેડાઈ જવા એડવાઈઝરી જારી કરવામાં આવી છે.

મધરાતે દિલધડક રેસ્ક્યૂ
સુરેન્દ્રનગરના પાટડી તાલુકાના કોચાડા ગામે ભારે વરસાદથી ફસાયેલા 6 નાગરિકોને પાટણ ફાયર બ્રિગેડ અને સ્થાનિક તંત્ર દ્વારા રાત્રે 1:10 થી 2:30 વાગ્યા દરમિયાન બોટ મારફતે સફળતાપૂર્વક બહાર કાઢવામાં આવ્યા હતા. સાંતલપુરના ગઢા ગામે પૂરના કારણે અનેક પશુઓના મોત થયા છે. ઉપરાંત, સાંતલપુરના ઝઝામ-ફાંગલી માર્ગ પર કાર બંધ પડતાં ફસાયેલા 8 મુસાફરોને પોલીસે સ્થાનિક યુવાનોની મદદથી બચાવી શાળામાં આશ્રય આપ્યો હતો. લોદરા-દહીસર માર્ગ પર કોઝવેના ધસમસતા પ્રવાહમાં પસાર થવા જતાં એક ટ્રક પલટી મારી ગઈ હતી.

દક્ષિણ ગુજરાતમાં ખાનાખરાબી અને રાહત કામગીરી
દક્ષિણ ગુજરાતના નવસારી જિલ્લામાં પૂરના કારણે ખેડૂતોના વ્યાપક પાકનું ધોવાણ થયું છે. પૂરથી પ્રભાવિત 50,000 થી વધુ લોકોને તાત્કાલિક રાહત અને સહાય પહોંચાડવા માટે ગૃહરાજ્ય મંત્રી હર્ષ સંઘવીએ ઉચ્ચ સ્તરીય બેઠક યોજીને સ્થિતિની સમીક્ષા કરી છે અને વહીવટી તંત્રને 24/7 સક્રિય રહેવાના આદેશ આપ્યા છે.