માત્ર અમદાવાદ-ગાંધીનગરમાં જ સરકારે દારુના પરવાનામાંથી આટલા કરોડ ખંખેર્યા

એકલા અમદાવાદ અને ગાંધીનગર શહેર જિલ્લામાં દારુના પરવાના આપવાના કારણે રાજ્ય સરકારને 33.98 કરોડની કમાણી થઇ છે. ગુજરાત વિધાનસભામાં દારુના પરવાના ધરાવતી હોટલો દ્વારા સરકારને ટેક્સની કેટલી કમાણી થાય છે તે વિષય પર પુછાયેલા પ્રશ્નના જવાબમાં સરકારે આ જવાબ આપ્યો હતો.

 ગુજરાત વિધાનસભામાં કોંગ્રેસના ધારાસભ્ય ઇમરાન ખેડાવાલાએ સરકારને પ્રશ્ન પુછ્યો હતો કે 31 જાન્યુઆરી, 2025ની અમદાવાદ અને ગાંધીનગર જિલ્લામાં કેટલી હોટલોને દારૂ વેચાણ માટે પરવાના આપવામાં આવ્યા છે? જ્યારે છેલ્લા બે વર્ષમાં અમદાવાદ-ગાંધીનગર જિલ્લાની કેટલી હોટલના દારૂ વેચાણ માટેના પરવાના કયા કારણોસર રદ કરવામાં આવ્યા છે? તેમજ છેલ્લા બે વર્ષમાં વાર્ષિક દારૂના વેચાણથી ટેક્સમાંથી કેટલી આવક થઈ છે?

 આ સવાલનો જવાબ આપતા સરકારે ગૃહમાં જણાવ્યું કે જ્યમાં અમદાવાદ અને ગાંધીનગરમાં દારૂના પરવાના ધરાવતી હોટલોમાં દારૂના વેચાણથી ટેક્સમાંથી 01 ફેબ્રુઆરી, 2023 થી 31 જાન્યુઆરી 2024 સુધીમાં 14.45 કરોડ રૂપિયાની આવક થઈ છે. જ્યારે 01 ફેબ્રુઆરી, 2024 થી 31 જાન્યુઆરી, 2025 સુધીમાં 19.53 કરોડ રૂપિયાની આવક થઈ છે. 

 ઉપરાંત અમદાવાદ શહેરમાં 20 અને જિલ્લામાં 02 હોટેલમાં પરવાના છે. ગાંધીનગર શહેરમાં 04 અને જિલ્લામાં 02 હોટલોમાં દારૂના વેચાણ માટેના પરવાના આપવામાં આવ્યા છે. જેમાં એકપણ  હોટલના દારૂ વેચવાના પરવાના રદ્દ કરવામાં આવ્યા નથી.

 બીજી તરફ ખેડબ્રહ્માના ધારાસભ્ય ડો.તુષાર ચૌધરીએ પ્રશ્ન પુછ્યો હતો કે 31મી જાન્યુઆરી સુધીમાં બે વર્ષમાં સુરત શહેર જિલ્લામાં ચોરી, લૂંટ, ધાડ અને અપહરણ તથા દુષ્કર્મ, ખંડણી, વસુલી, છેતરપીંડી સહિત કેટલા ગુના નોંધાયા તથા કેટલા આરોપી પકડાયા અને કેટલા પકડવાના બાકી છે તથા વધતા ગુનાને અટકાવવા સરકાર દ્વારા શું પગલાં લેવાયા જેમાં સરકારે જવાબ આપ્યો હતો કે 2 વર્ષમાં આ કેસોમાં 12781 આરોપી પકડાયા છે અને 1795 આરોપી પકડાયા નથી. વધતા ગુના અટકાવવા નાઇટ પેટ્રોલીંગ, વાહન ચેકીંગ અને ગુનેગારોને પકડવાની કાર્યવાહી હાથ ધરાઇ છે.