પેટ્રોલ-ડીઝલની અછતની અફવા પર સરકારની સ્પષ્ટતા

મિડલ ઈસ્ટમાં ચાલી રહેલા યુદ્ધની પરિસ્થિતિને પગલે ગુજરાતમાં પેટ્રોલ અને ડીઝલની અછત સર્જાશે તેવી અફવાઓએ સોશિયલ મીડિયામાં જોર પકડ્યું છે. આ અફવાઓને કારણે રાજ્યના અનેક પેટ્રોલ પંપો પર વાહનચાલકોની લાંબી કતારો જોવા મળી રહી છે. લોકોમાં વ્યાપેલી આ ભીતિ અને 'પેનિક બાઈંગ'ની સ્થિતિને કાબૂમાં લેવા માટે ગુજરાત સરકારના અન્ન અને નાગરિક પુરવઠા વિભાગે મહત્વની માર્ગદર્શિકા જાહેર કરી છે.

કેન અને બેરલમાં ઈંધણ ભરવા પર પ્રતિબંધ : 

રાજ્યમાં કૃત્રિમ અછત ન સર્જાય અને પંપો પર થતી અંધાધૂંધીને નિયંત્રિત કરી શકાય તે માટે સરકારે મોટો નિર્ણય લીધો છે. હવેથી પેટ્રોલ પંપો પર માત્ર વાહનોની ટાંકીમાં જ ઈંધણ ભરી શકાશે. કોઈપણ વ્યક્તિને કેન, બોટલ કે બેરલ જેવા પાત્રોમાં પેટ્રોલ અથવા ડીઝલ આપવામાં આવશે નહીં. આ પગલાનો મુખ્ય હેતુ સંગ્રહખોરી અટકાવવાનો અને જરૂરિયાતવાળા વાહનચાલકોને સરળતાથી ઈંધણ મળી રહે તે સુનિશ્ચિત કરવાનો છે.

સંગ્રહખોરો સામે કડક કાર્યવાહીની ચીમકી : 

અન્ન અને નાગરિક પુરવઠા વિભાગે સ્પષ્ટ ચેતવણી આપી છે કે જો કોઈ પેટ્રોલ પંપ સંચાલક કે વિક્રેતા જાણીજોઈને કૃત્રિમ અછત ઊભી કરશે અથવા ઈંધણનો ગેરકાયદે સંગ્રહ કરશે, તો તેમની સામે 'આવશ્યક ચીજવસ્તુ અધિનિયમ-1955' હેઠળ કડક કાયદેસરની કાર્યવાહી કરવામાં આવશે. તંત્ર દ્વારા સતત મોનિટરિંગ કરવામાં આવી રહ્યું છે જેથી જનતાને હાલાકી ન ભોગવવી પડે.

પૂરતો સ્ટોક ઉપલબ્ધ: અફવાઓથી દૂર રહેવા અપીલ

સરકારે જનતાને આશ્વાસન આપ્યું છે કે રાજ્યમાં પેટ્રોલ અને ડીઝલનો પૂરતો જથ્થો ઉપલબ્ધ છે. રિફાઇનરીઓ તરફથી પુરવઠો નિયમિત રીતે મળી રહ્યો છે અને વિતરણ વ્યવસ્થામાં કોઈ પણ પ્રકારનો અવરોધ નથી. આ ઉપરાંત, ઉદ્યોગો અને હોટલ-રેસ્ટોરન્ટ માટે કોમર્શિયલ એલપીજી (LPG) ના જથ્થામાં પણ વધારો કરવાનો નિર્ણય લેવાયો છે.

તંત્રએ લોકોને વિનંતી કરી છે કે ખોટી અફવાઓને કારણે પેટ્રોલ પંપ પર ભીડ ન કરે. ઈંધણના ભાવમાં પણ કોઈ વધારો કરવામાં આવ્યો નથી, તેથી સંગ્રહ કરવાની કોઈ આવશ્યકતા નથી.