લીલી પરિક્રમા માર્ગના 80% રસ્તાઓ ધોવાયા

ગુજરાતના જૂનાગઢ ખાતે ગરવા ગઢ ગિરનારની પવિત્ર લીલી પરિક્રમા આગામી 2 નવેમ્બરથી શરૂ થવાની છે, જે માટે જિલ્લા વહીવટી તંત્ર દ્વારા તમામ તૈયારીઓને આખરી ઓપ આપી દેવાયો હતો. પરંતુ, છેલ્લા 2 દિવસથી જૂનાગઢ પંથકમાં પડી રહેલા કમોસમી વરસાદે તંત્રની મહેનત અને આયોજનો પર પાણી ફેરવી દીધું છે, જેના કારણે ઊંડી ચિંતાની લાગણી પ્રસરી છે. ગિરનાર પર્વત અને અભ્યારણ્ય વિસ્તારમાં 2થી 3 ઈંચ વરસાદ નોંધાયો છે, જેના પરિણામે 36 કિલોમીટર લાંબી પરિક્રમા રૂટના લગભગ 80 ટકા રસ્તાઓનું ગંભીર ધોવાણ થવા લાગ્યું છે. આ રસ્તાઓ માટીકામથી તૈયાર કરવામાં આવ્યા હોવાથી, સતત વરસાદને લીધે ઉપરની માટી ધોવાઈ રહી છે.

પરિક્રમા રૂટ ઉપર વાહન વ્યવહાર પ્રતિબંધિત

ગિરનાર ક્ષેત્રના DCF અક્ષય જોશીએ માહિતી આપી કે, વરસાદ પહેલા આખો પરિક્રમા રૂટ સંપૂર્ણપણે તૈયાર કરી દેવાયો હતો, પરંતુ કમોસમી વરસાદના લીધે રૂટનું ધોવાણ ચાલુ થઈ ગયું છે. જો આવી જ સ્થિતિ ચાલુ રહેશે તો 80 ટકા માટીકામ ધોવાઈ જશે, અને ત્યારબાદ પરિક્રમા રૂટ ઉપર વાહન વ્યવહાર સંપૂર્ણ રીતે પ્રતિબંધિત કરવો પડશે. જો માટીકામ ધોવાઈ જશે તો તંત્રને ફરીથી સમારકામ માટે ઓછામાં ઓછા 7 દિવસનો સમય લાગી શકે છે, જેમાં અમુક મહત્વના ક્રિટીકલ પોઈન્ટ્સને પ્રાથમિકતા આપવામાં આવશે.

આ પણ વાંચો: ગિરનાર લીલી પરિક્રમા: 2025માં 1 નવેમ્બરથી શરૂ

લીલી પરિક્રમાના આયોજન અંગે મહત્વનો નિર્ણય

વરસાદની પરિસ્થિતિ અને રસ્તાઓના ધોવાણને ધ્યાનમાં રાખીને, જૂનાગઢ જિલ્લા વહીવટીતંત્રે પરિક્રમાર્થીઓને ખાસ અપીલ કરી છે. પરિક્રમાર્થીઓને વિનંતી કરવામાં આવી છે કે, તેઓ હાલની અણધારી પરિસ્થિતિને ધ્યાનમાં રાખીને 31 ઓક્ટોબર સુધી ગિરનાર ક્ષેત્ર તરફ ન આવે. વરસાદ રોકાયા પછી રસ્તાઓની સાચી સ્થિતિનો ખ્યાલ આવશે, ત્યારબાદ તંત્ર દ્વારા બેઠક કરીને લીલી પરિક્રમાના આયોજન અંગે મહત્વનો નિર્ણય જાહેર કરવામાં આવશે.