હીરા અને ટેક્સટાઈલ નગરી સુરતમાં હાલ ગેસની ભીષણ અછતને કારણે ભારે અફરાતફરીનો માહોલ જોવા મળી રહ્યો છે. મધ્ય-પૂર્વના દેશોમાં ચાલી રહેલા સંઘર્ષની માઠી અસર હવે સુરતના શ્રમિકોના રસોડા સુધી પહોંચી છે. સ્થિતિ એટલી હદે વણસી છે કે રાંધણ ગેસ ન મળવાને કારણે પરપ્રાંતિય શ્રમિકોએ ફરી એકવાર કોરોના કાળની જેમ પોતાના વતન તરફ હિજરત શરૂ કરી દીધી છે.
સિલિન્ડરના ભાવ ૫ હજારને પાર: કાળાબજાર ચરમસીમાએ
ઈરાન અને ઈઝરાયેલ વચ્ચેના તણાવને કારણે હોર્મુઝની ખાડીમાં સર્જાયેલી અનિશ્ચિતતાની અસર સુરતમાં રાંધણ ગેસના સપ્લાય પર પડી છે. આ તકનો લાભ ઉઠાવી કાળાબજારિયા સક્રિય થયા છે. મળતી માહિતી મુજબ, સામાન્ય ભાવે મળતા ગેસ સિલિન્ડર માટે અત્યારે કાળાબજારમાં ૪,૦૦૦ થી ૫,૦૦૦ રૂપિયા વસૂલવામાં આવી રહ્યા છે. આટલી ઊંચી કિંમત ચૂકવવા છતાં પણ સમયસર સિલિન્ડર ન મળતા શ્રમિકોમાં ભારે રોષ અને લાચારી જોવા મળી રહી છે.
અંજની ઈન્ડસ્ટ્રીઝમાં ૫૦ ટકા શ્રમિકો ઘટ્યા :&nbsp;
સુરતના અંજની ઈન્ડસ્ટ્રીઝ જેવા મોટા ઔદ્યોગિક વિસ્તારોમાં કામ કરતા અંદાજે ૪૦ થી ૫૦ ટકા શ્રમિકોએ પોતાના વતન જવાનું પસંદ કર્યું છે. શ્રમિકોનું માનવું છે કે જો અહીં જમવાનું જ નહીં મળે તો કામ કરવાનો કોઈ અર્થ નથી. રેલવે સ્ટેશન અને બસ સ્ટેન્ડ પર શ્રમિકોના ટોળેટોળા જોવા મળી રહ્યા છે, જે દ્રશ્યો વર્ષ ૨૦૨૦ના લોકડાઉન જેવી ભયાનકતાની યાદ અપાવે છે.
ટેક્સટાઈલ ઉદ્યોગ બંધ થવાની કગાર પર :&nbsp;
સુરતની આર્થિક કરોડરજ્જુ ગણાતો ટેક્સટાઈલ ઉદ્યોગ અત્યારે બેવડા ફટકા સહન કરી રહ્યો છે. એકતરફ યાર્નના ભાવમાં તોતિંગ વધારો થયો છે અને બીજી તરફ હવે કારીગરોની અછત સર્જાઈ છે. જો આ જ રીતે શ્રમિકોનું પલાયન ચાલુ રહ્યું તો આગામી દિવસોમાં અનેક લૂમ્સ અને ડાઈંગ હાઉસ બંધ કરવાની નોબત આવી શકે છે. ઉદ્યોગકારોએ ચિંતા વ્યક્ત કરી છે કે ગેસના પુરવઠામાં સુધારો નહીં થાય તો સુરતના અર્થતંત્રને મોટું નુકસાન થશે.
સરકાર પાસે મદદની આશા :&nbsp;
સુરતના વેપારી સંગઠનો અને ઉદ્યોગપતિઓએ રાજ્ય અને કેન્દ્ર સરકારને આ મામલે તાત્કાલિક દખલ કરવા વિનંતી કરી છે. કાળાબજારિયા પર લગામ કસવા અને શ્રમિકોને રાહત મળે તેવો વચ્ચેનો રસ્તો કાઢવા રજૂઆત કરવામાં આવી છે. જો વહેલી તકે ઉકેલ નહીં આવે તો ટેક્સટાઈલ માર્કેટમાં ઉત્પાદન ઠપ થઈ જવાની પૂરેપૂરી શક્યતા છે.&nbsp;

શ્રમિકોનું વતન તરફ પલાયન

રાંધણ ગેસની અછત અને કાળાબજારથી કંટાળી ટેક્સટાઈલ શ્રમિકોની હિજરત, ઉદ્યોગો બંધ થવાની ભીતિ

March 15, 2026 | 18:05 IST