Surat : ડુમસ જમીન કૌભાંડનો પર્દાફાશ, ભાગેડુ અનંત પટેલ પૂણેથી CID ક્રાઇમની ઝપટમાં!

સુરતના ડુમસ વિસ્તારમાં આચરવામાં આવેલા ₹2000 કરોડના કથિત જમીન કૌભાંડમાં એક મોટો ખુલાસો થયો છે. આ પ્રકરણના મુખ્ય સૂત્રધાર અનંત પટેલની પૂણેથી ધરપકડ કરવામાં આવી છે, જેના પગલે કૌભાંડમાં સંડોવાયેલા અન્ય આરોપીઓમાં ફફડાટ વ્યાપી ગયો છે.

સરકારી જમીન ગણોતિયાના નામે ચઢાવી વેચી દેવાઈ...

આ કૌભાંડમાં સરકારી માલિકીની કરોડો રૂપિયાની જમીનને ગેરકાયદેસર રીતે ગણોતિયાના નામે ચઢાવી દેવામાં આવી હતી અને ત્યારબાદ તેને બિલ્ડરોને વેચી દેવામાં આવી હતી. આ સમગ્ર પ્રકરણમાં નરેશ શાહ નામના વ્યક્તિએ બોગસ પ્રોપર્ટી કાર્ડ બનાવી, તેના આધારે ગેરકાયદેસર રીતે બાંધકામની મંજૂરીઓ પણ મેળવી હોવાનું તપાસમાં સામે આવ્યું છે.

છ મહિના બાદ FIR, કેટલાક આરોપીઓના નામ ગુમ...

આઝાદ રામોલિયા દ્વારા કરવામાં આવેલી ફરિયાદના છ મહિના બાદ પોલીસ દ્વારા આખરે FIR નોંધવામાં આવી છે. જોકે, આશ્ચર્યજનક રીતે, FIR માંથી કેટલાક મહત્વના આરોપીઓના નામ ગાયબ હોવાને કારણે તપાસ સામે સવાલો ઉઠી રહ્યા છે. આ કૌભાંડમાં નકલી સર્ટિફિકેટના આધારે સરકારી જમીનનું ગેરકાયદેસર વેચાણ થયું હોવાનું પણ બહાર આવ્યું છે, જે સરકારી તંત્રની બેદરકારી અને ભ્રષ્ટાચાર પર પ્રકાશ પાડે છે.

અનંત પટેલની ધરપકડ બાદ હવે આ કૌભાંડના અન્ય પડદાફાશ થશે અને તેમાં સંડોવાયેલા તમામ આરોપીઓ કાયદાના સકંજામાં આવશે તેવી આશા સેવાઈ રહી છે. આ પ્રકરણ ગુજરાતના જમીન કૌભાંડોના ઇતિહાસમાં એક મોટો અધ્યાય બનશે તેવી શક્યતા છે.