રાજકોટમાં 12 કલાકમાં ચાર વખત ભૂકંપ

રાજકોટ જિલ્લાના ઉપલેટા અને ધોરાજી પંથકમાં રાતથી સવાર સુધીમાં વારંવાર ભૂકંપના આંચકા અનુભવાતા લોકોમાં ભયનો માહોલ ફેલાયો છે. છેલ્લા 12 કલાકમાં ઉપલેટામાં ચાર વખત અને આસપાસના વિસ્તારોમાં કુલ પાંચથી વધુ આંચકા નોંધાતા સ્થાનિક રહેવાસીઓ ગભરાટમાં ઘરની બહાર દોડી આવ્યા હતા.

જોકે સદનસીબે અત્યાર સુધી કોઈ જાનહાનિ કે મોટા નુકસાનના અહેવાલ નથી.

શુક્રવાર 9 જાન્યુઆરીની વહેલી સવારે 6:19 વાગ્યે 3.8ની તીવ્રતાનો જોરદાર ભૂકંપનો આંચકો અનુભવાયો હતો. ઇન્સ્ટિટ્યૂટ ઓફ સિસ્મોલોજિકલ રિસર્ચ (ISR) અનુસાર આ આંચકાનું કેન્દ્રબિંદુ ઉપલેટાથી અંદાજે 28 કિલોમીટર દૂર નોંધાયું હતું. આ કંપન માત્ર ઉપલેટા અને ધોરાજી પૂરતું સીમિત ન રહીને જેતપુર, જેતલસર, પેઢલા, સરધારપુર તેમજ આસપાસના ગ્રામ્ય વિસ્તારોમાં પણ અનુભવાયું હતું.

આ પહેલા ગુરુવારે રાત્રે 8:44 વાગ્યે 3.3ની તીવ્રતાનો આંચકો નોંધાયો હતો. ત્યારબાદ શુક્રવારની વહેલી સવારે 6:19 અને 6:58 વાગ્યે ફરી બે આંચકા આવ્યા, જ્યારે ધોરાજીમાં 7:01 વાગ્યે ધરા ધ્રૂજી હતી. દોઢ કલાકના ગાળામાં સતત આંચકાઓ આવતા લોકોમાં ભારે ફફડાટ ફેલાયો હતો. કેટલાક વિસ્તારોમાં સલામતીના પગલા રૂપે શાળાઓમાં રજા જાહેર કરવામાં આવી હતી.

સ્થાનિકોએ જણાવ્યું કે આંચકાઓ દરમિયાન મકાનોની બારીઓ અને વાસણો ખખડવાનો અવાજ સંભળાયો હતો, જેના કારણે લોકોમાં 2001ના વિનાશકારી ભૂકંપની યાદો તાજી થઈ ગઈ હતી. ખાસ કરીને ગ્રામ્ય વિસ્તારોમાં વૃદ્ધો અને બાળકોમાં વધુ ભય જોવા મળ્યો હતો.

પ્રશાસન તરફથી જણાવાયું છે કે હાલ પરિસ્થિતિ પર સતત નજર રાખવામાં આવી રહી છે. તલાટીઓ અને સરપંચોને તેમના વિસ્તારની સ્થિતિ અંગે માહિતી એકત્ર કરવા સૂચના આપવામાં આવી છે. હાલ સુધી કોઈ જાનમાલના નુકસાનના અહેવાલ ન મળતા લોકોએ થોડી રાહતનો શ્વાસ લીધો છે, પરંતુ વારંવાર આવતા આંચકાઓને કારણે ચિંતા યથાવત છે.