જામનગર નજીક આવેલા હાપા ઇન્ડસ્ટ્રીયલ એરિયામાં રવિવારે એક મોટી દુર્ઘટના ઘટી હતી. અહીં આવેલી જાણીતી 'મધુસુદન મસાલા' ફેક્ટરીમાં અચાનક આગ ફાટી નીકળતા અફરાતફરીનો માહોલ સર્જાયો હતો. આ આગમાં ફેક્ટરીના બહારના ભાગમાં રાખવામાં આવેલો અંદાજે 35 ટન જેટલો સૂકા મરચાનો જથ્થો સંપૂર્ણપણે સળગીને ખાખ થઈ ગયો છે.
આગની ઘટના અને વાતાવરણમાં ફેલાયેલી બળતરા :&nbsp;
પ્રાપ્ત વિગતો અનુસાર, હિરેનભાઈ કોટેચાની માલિકીની આ ફેક્ટરીમાં રવિવારે રજાના દિવસે અચાનક કોઈ અકસ્માતે આગ લાગી હતી. ફેક્ટરીના મેદાનમાં મરચાનો વિશાળ જથ્થો ખુલ્લામાં રાખવામાં આવ્યો હતો, જેણે જોતજોતામાં વિકરાળ સ્વરૂપ ધારણ કરી લીધું હતું. મરચામાં આગ લાગવાને કારણે આસપાસના વિસ્તારમાં ધુમાડાના ગોટેગોટા ઉડ્યા હતા. આ ધુમાડાને કારણે સ્થાનિકો અને રાહદારીઓની આંખોમાં સખત બળતરા થવા લાગી હતી, જેના કારણે સમગ્ર વિસ્તારમાં સ્થિતિ ગંભીર બની હતી.
ફાયર વિભાગની કપરી કામગીરી :&nbsp;
આગની જાણ થતા જ જામનગર ફાયર બ્રિગેડની ટીમ તાત્કાલિક ઘટનાસ્થળે દોડી ગઈ હતી. મરચાના તીખા ધુમાડાને કારણે શ્વાસ લેવામાં અને આંખો ખોલવામાં તકલીફ પડતી હોવાથી ફાયર જવાનોએ ખાસ પ્રકારના પ્રોટેક્ટિવ ડ્રેસ અને માસ્ક પહેરીને ઓપરેશન પાર પાડ્યું હતું. અલગ-અલગ ત્રણ ફાયર ટેન્ડરોની મદદથી સતત સવા કલાક સુધી પાણીનો મારો ચલાવવામાં આવ્યો હતો. ફાયર વિભાગની સતર્કતાને કારણે આગ ફેક્ટરીની અંદર સુધી પહોંચી શકી નહોતી, જેના પરિણામે લાખોની કિંમતની મશીનરી બચી ગઈ હતી.
આર્થિક નુકસાનનો અંદાજ :&nbsp;
પ્રાથમિક અંદાજ મુજબ, 35 ટન જેટલા મરચાનો જથ્થો બળી જવાથી કારખાનેદારને લાખો રૂપિયાનું આર્થિક નુકસાન થયું છે. જોકે, કોઈ જાનહાનિના સમાચાર નથી. હાલમાં આગ લાગવાનું ચોક્કસ કારણ જાણવા મળ્યું નથી, પરંતુ શોર્ટ સર્કિટ અથવા અન્ય કોઈ કારણસર આગ લાગી હોવાની આશંકા સેવાઈ રહી છે. વહીવટી તંત્ર દ્વારા નુકસાનના સર્વેની કામગીરી શરૂ કરવામાં આવી છે.&nbsp;

જામનગર મસાલા ફેક્ટરી આગ

હાપા ઇન્ડસ્ટ્રીયલ એરિયામાં મધુસુદન મસાલા ફેક્ટરીમાં ભીષણ આગ; ફાયર બ્રિગેડે ભારે આગ બુઝાવી.

March 8, 2026 | 18:30 IST