સુરેન્દ્રનગર જિલ્લામાં પાક નુકસાન સહાય અને ગણોતધારા મુદ્દે ખેડૂતોમાં રોષ

સુરેન્દ્રનગર જિલ્લાના દસાડા, લખતર અને વઢવાણ તાલુકાના 12 હજાર ખેડૂતોને હજુ સુધી પાક નુકસાન સહાય મળી નથી. જ્યારે ગણોતધારાના કારણે હજારો દસ્તાવેજ અટવાઈ જતાં ખેડૂતોમાં રોષ જોવા મળી રહ્યો છે. અનેક વખત રજૂઆતો કરવા છતાં પરિણામ નહી મળતાં ખેડૂતોએ આંદોલન કરવાનો નિર્ણય કર્યો છે. તેના ભાગરૂપે 25 ફેબ્રુઆરીના રોજ પાટડીથી ટ્રેકટર રેલી યોજીને સુરેન્દ્રનગર કલેક્ટર કચેરી પહોંચી ખેડૂતો રામધૂન બોલાવશે.

પાટડી ખાતે ખેડૂત હિત રક્ષક સમિતિની બેઠક યોજાઈ હતી. જેમાં ખેડૂતો વિવિધ પ્રશ્નો મુદ્દે ચર્ચા કરવામાં આવી હતી. દસાડા તાલુકાના હિંમતપુરા, નારણપુરા, બામણવા, જરવલા, સુરજપુરા અને પાટડી સહિતના ગામોમાં ગણોતધારાની 192 અને 193 ની નોંધના કારણે ખેડૂતો 5-6 વર્ષથી પોતાની જમીન વેચાણ કરી શકતા નથી. જમીનના દસ્તાવેજ પણ થઈ શકતાં નથી. ગણોતધારાની નોંધ રદ્દ કરવા, પ્રોપર્ટી કાર્ડમાં કે-1, કે-2 સત્તા પ્રકાર હોવાથી દસ્તાવેજ પણ થતાં નહી હોવાથી કાયમી નિકાલ કરવા અનેર વખત રજૂઆત કરવામાં આવી છે. તેમ છતાં કોઇ ઉકેલ નહીં આવતા 25 ફેબ્રુઆરીના રોજ ખેડૂતોએ  પાટડીના બામણવાથી સુરેન્દ્રનગર જિલ્લા કલેકટર કચેરી સુધી ટ્રેકટર રેલી કાઢવાનો નિર્ણય કર્યો છે.

ગણોતધારાની કલમ રદ કરવા ઉપરાંત દસાડા, વઢવાણ અને લખતર તાલુકાના 12 હજાર ખેડૂતોને હજુ સુધી પાક નુકસાન સહાય મળી નથી. આ મુદ્દે વહીવટીતંત્ર અને રાજ્ય સરકારને રજૂઆત કરવા છતાં કોઈ ઉકેલ આવ્યો નથી. જંત્રીનો વધારો પરત ખેંચી પાક નુકશાની અંગે જાહેર કરવામાં આવેલ સહાય બાકી રહેલા ખેડૂતોને ચુકવવાની માંગ કરવાનો નિર્ણય કરાયો હતો. ઉલ્લેખનીય છે કે, ગણોતધારાની 192 અને 193ની કલમો લગાવતાં દસાડા તાલુકામાં 3 હજાર જેટલાં દસ્તાવેજ અટવાઈ ગયા છે. ગણોતધારાના કારણે ખેડૂતો પોતાની જમીનનું વેચાણ પણ કરી શકતાં નથી. આ કલમના કારણે ખેતીની જમીન પર 20 ટકા અને બિનખેતીની જમીન પર 30 ટકા પ્રીમિયમની વસૂલાત કરાય છે. તેથી ગણોતધારાની 192 અને 193 કલમ હટાવવા ખેડૂતોએ માંગ કરી છે.