ગુજરાતમાં સાઇબર ક્રાઇમની ઘાતક અસર દર્શાવતી એક અત્યંત કરુણ ઘટના વડોદરા જિલ્લાના કાયાવરોહણ ખાતે બની છે. 'ડિજિટલ અરેસ્ટ'ના નામે ઠગબાજોના ત્રાસનો ભોગ 65 વર્ષીય ખેડૂત બન્યા છે. ડિજિટલ અરેસ્ટના ત્રાસથી ખેડૂત અતુલભાઈ હીરાભાઈ પટેલ ઝેરી દવા પીને આત્મહત્યા કરી લેતાં રાજ્યમાં હાહાકાર મચી ગયો છે.
ડિજિટલ અરેસ્ટના કારણે આપઘાતની આ&nbsp;રાજ્યની પહેલી ઘટના હોવાનું માનવામાં આવી રહ્યું છે.
કાયાવરોહણના રામ ફળિયામાં રહેતા અતુલભાઈને અજાણ્યા ફોન પરથી પોતાની ઓળખ દિલ્હી ATSના અધિકારી તરીકે આપી હતી. અતુલભાઈના બેંક ખાતામાં ₹40 કરોડનું મોટું ફ્રોડ થયું છે અને આ અંગે તપાસ ચાલી રહી છે તેવો દાવો કર્યો હતો.&nbsp;
મૃતકના સંબંધી અંશ પટેલના જણાવ્યા મુજબ, ગઠીયાઓએ અતુલભાઈને માનસિક ત્રાસ આપ્યો હતો. દર 5 મિનિટે આવતા ઓડિયો- વિડિયો કોલ્સના ત્રાસથી અતુલભાઈ એટલા ગભરાઈ ગયા હતા. 'ડિજિટલ અરેસ્ટ'માં હોવાનું કહીને ઘરની બહાર ન નીકળવાની ધમકીઓ અને સતત દબાણ કરવામાં આવતું હતું.
માનસિક ત્રાસથી અતુલભાઈ એટલા ગભરાઈ ગયા તેમણે સોમવારની વહેલી સવારે ઘરે જ ઝેરી દવા પીને આત્મહત્યા કરી લીધી હતી.&nbsp;ખેડૂતના મૃત્યુ બાદ પરિવારજનોએ તેમના ફોનમાં આવેલા નંબર પર સંપર્ક કરતાં ઠગે પોતાનું આઈકાર્ડ મોકલીને પોતે ઇન્સ્પેક્ટર ગૌરવ ગ્રોવર હોવાનો દાવો કર્યો હતો.&nbsp;
આ ઘટના ભારતમાં વધી રહેલા 'ડિજિટલ અરેસ્ટ' અને સાઇબર ફ્રોડના જોખમને દર્શાવે છે. કેન્દ્ર સરકારે સંસદમાં આપેલી માહિતી મુજબ, 2022થી ફેબ્રુઆરી 2025 સુધીમાં દેશમાં ડિજિટલ અરેસ્ટના 2.42&nbsp;લાખ કેસ નોંધાયા છે, એટલે કે દરરોજ સરેરાશ 200 કેસ. આ ત્રણ વર્ષના ગાળામાં લોકોએ ₹2575 કરોડ ગુમાવ્યા છે. ગુજરાતમાં પણ છેલ્લા ચાર વર્ષમાં વિવિધ સાઇબર ફ્રોડમાં લોકોએ ₹2746 કરોડ ગુમાવ્યા છે.
વડોદરાની આ કરુણ ઘટના સામે ભોગ બનેલા ખેડૂતના પરિવારજનોએ ન્યાયની માંગણી કરી છે. સમગ્ર ઘટના પર&nbsp;ડભોઈ પોલીસે તપાસ શરૂ કરી છે અને ભેજાબાજોને પકડવા માટે કાર્યવાહી હાથ ધરી છે.

ડિજિટલ અરેસ્ટનો ભોગ બનેલ ખેડૂતનો આપઘાત

અતુલભાઈને 40 કરોડના ફ્રોડની ધમકી આપ્યા બાદ માનસિક ત્રાસથી આત્મહત્યાનું પગલું લીધું.

November 20, 2025 | 16:44 IST